ក្រុមអង្គការសង្គមស៊ីវិលអំពាវនាវឲ្យទម្លាក់ចោលសេចក្តីព្រាងច្បាប់ស្តីពីសណ្តាប់ធ្នាប់សាធារណៈ
អង្គការសង្គមស៊ីវិលជាង៦០កាលពីម្សិលមិញបានចេញសេចក្តីថ្លែងការណ៍រួមមួយ ដោយអំពាវនាវឲ្យទម្លាក់ចោលសេចក្តីព្រាងច្បាប់ថ្មីមួយស្តីពីសណ្តាប់ធ្នាប់សាធារណៈដែលកំពុងនៅក្នុងដៃក្រសួងមហាផ្ទៃ។ ក្រុមសិទ្ធិមនុស្សចាត់ទុកច្បាប់នេះថា មានលក្ខណៈគាបសង្កត់សេរីភាពសំដែងមតិ ហើយផ្តល់អំណាចទូលាយពេកដល់អាជ្ញាធរមូលដ្ឋានក្នុងការសម្រេចឲ្យ ឬមិនឲ្យប្រើប្រាស់ទីកន្លែងសាធារណៈ។ ទោះជាយ៉ាងណាមន្ត្រីក្រសួងមហាផ្ទៃអះអាងថា ច្បាប់នេះនឹងមិនគ្របដណ្តប់លើការធ្វើបាតុកម្មនោះឡើយ។
ចុះផ្សាយនៅថ្ងៃ៖
ស្តាប់ - ០១:៥៦
សេចក្តីព្រាងច្បាប់ស្តីពីសណ្តាប់ធ្នាប់សាធារណៈ គឺត្រូវបានក្រសួងមហាផ្ទៃតាក់តែងឡើងក្នុងគោលបំណងបញ្ញត្តិអំពីការប្រើប្រាស់ទីកន្លែងសាធារណៈ និងការបង្ហាញឥរិយាបថនៅទីសាធារណៈ។ ប៉ុន្តែក្រុមអង្គការសិទ្ធិមនុស្ស យល់ថា ប្រសិនបើច្បាប់នេះ ចូលជាធរមាន ច្បាប់នេះនឹងមានលក្ខណៈគាបសង្កត់សេរីភាពសំដែងមតិ ហើយផ្តល់អំណាចទូលាយពេក ដល់អាជ្ញាធរមូលដ្ឋានក្នុងការសម្រេចឲ្យឬមិនឲ្យប្រើប្រាស់ទីកន្លែងសាធារណៈ។ អ្នកប្រកបមុខរបរសេដ្ឋកិច្ចក្រៅប្រព័ន្ធ នៅតាមដងផ្លូវនឹងរងគ្រោះធ្ងន់ធ្ងរ ដោយសារតែមានចំណុចខ្លះ ក្នុងច្បាប់នេះហាមឃាត់។ នេះបើតាមសេចក្តីថ្លែងការណ៍របស់ក្រុមអង្គការសង្គមស៊ីវិលចុះថ្ងៃទី១៣សីហា។
លោក អ៊ុក គឺមលេខ រដ្ឋលេខាធិការក្រសួងមហាផ្ទៃ ធ្លាប់បានថ្លែងប្រាប់វិទ្យុបារាំងអន្តរជាតិRFI ថា គោលបំណងនៃការបង្កើតច្បាប់នេះឡើង ដោយសារតែកម្ពុជានៅមិនទាន់មានច្បាប់គ្រប់គ្រងសណ្តាប់ធ្នាប់សាធារណៈនៅឡើយ ពោលគឺមានតែអនុក្រឹត្យតាំងពីឆ្នាំ១៩៩៤។ ម្យ៉ាងទៀតច្បាប់នេះគឺចង់គ្រប់គ្រងសណ្តាប់ធ្នាប់ សោភ័ណ្ឌភាព និងបរិស្ថាននៅតាមដងផ្លូវសាធារណៈឲ្យមានរបៀបរៀបរយ ហើយលោកច្រានចោលការលើកឡើងថា ច្បាប់នេះធ្វើឲ្យប៉ះពាល់ដល់សិទ្ធិធ្វើបាតុកម្ម។ ច្បាប់ស្តីពីសិទ្ធិធ្វើបាតុកម្មគឺត្រូវបានបង្កើតឡើងរួចហើយ។
សម្រាប់ លោក អំ សំអាត នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ កត់សំគាល់ថា សេចក្តីព្រាងច្បាប់នេះមានទាំងចំណុចវិជ្ជមាន និងចំណុចអវិជ្ជមាន។ ចំណុចវិជ្ជមានគឺរក្សាសណ្តាប់ធ្នាប់ សោភ័ណ្ឌភាពទីក្រុង។ ប៉ុន្តែចំណុចអវិជ្ជមាន ច្បាប់នេះបានផ្តល់អំណាចច្រើនដល់អាជ្ញាធរមូលដ្ឋានក្នុងការសម្រេចថាឲ្យឬមិនឲ្យមានការជួបពលរដ្ឋនៅតាមមូលដ្ឋាន។ លើសពីនេះ លោកថា ច្បាប់នេះនឹងមានការប៉ះពាល់ផ្ទាល់ទៅដល់អ្នកប្រកបរបរតាមដងផ្លូវ ខណៈសេដ្ឋកិច្ចពួកគេកំពុងជួបប្រទះក្នុងវិបត្តិកូវីដ១៩ផងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ