អតីតអ្នកធ្វើបាតុកម្មប្រឆាំង លោក ហ៊ុន សែន ងាកមកអំពាវនាវឲ្យគាំទ្របក្សកាន់អំណាច
ប្រធានសម្ព័ន្ធខ្មែរ-អាមេរិកាំង ដែលធ្លាប់ធ្វើបាតុកម្មប្រឆាំងលោក ហ៊ុន សែន ពេលទៅក្រៅប្រទេសកន្លងមកបានងាកមកអំពាវនាវឲ្យគាំទ្រលោក ហ៊ុន សែន និងលោក ហ៊ុន ម៉ាណែត នៅក្នុងការបោះឆ្នោតខាងមុខនេះ។ បើតាមលោក ទូច វិបុល មូលហេតុដែលខ្លួនផ្លាស់ប្តូរបែបនេះដោយអះអាងថានៅក្នុងគណបក្សប្រឆាំងមិនមានបេក្ខជនណាមានសមត្ថភាពដឹកនាំប្រទេសឡើយ ប្រសិនបើជាប់ឆ្នោត។ ប៉ុន្តែសមាជិកបក្សប្រឆាំងខ្លះ យល់ថា ការចុះចូលនេះដោយសារបុគ្គលនោះចង់បានប្រយោជន៍ផ្ទាល់ខ្លួន បន្ទាប់ពីគណបក្សភ្លើងទៀនមិនផ្តល់តំណែងនៅក្នុងបក្សតាមការស្នើសុំ។
ចុះផ្សាយនៅថ្ងៃ៖
ស្តាប់ - ០២:០០
លើសពីញត្តិគាំទ្រ លោក ទូច វិបុល បានថ្លែងជាវីដេអូបរិហារពីភាពខ្សោយរបស់គណបក្សប្រឆាំងថា គ្មានសមត្ថភាពដឹកនាំប្រទេសឡើយ ប្រសិនបើជាប់ឆ្នោតនៅពេលខាងមុខ។ អតីតអ្នកធ្វើបាតុកម្មប្រឆាំងលោក ហ៊ុន សែន នៅពេលទៅអាមេរិកកន្លងមកបានលើកសរសើរលោក ហ៊ុន សែន និងកូនប្រុស ថាមានសមត្ថភាព និងបទពិសោធន៍គ្រប់គ្រាន់ក្នុងការដឹកនាំ ទោះបីជាកត់សំគាល់ថា ការអនុវត្តកន្លងមិនត្រឹមត្រូវខ្លះក៏ដោយ។
កាលពីការបោះឆ្នោតឃុំ សង្កាត់ លោក ទូច វិបុល ធ្លាប់អំពាវនាវឲ្យពលរដ្ឋទៅបោះឆ្នោតឲ្យគណបក្សភ្លើងទៀន តែពេលនេះលោកផ្លាស់ប្តូរជំហរវិញ ដោយអំពាវនាវឲ្យបោះឆ្នោតឲ្យគណបក្សប្រជាជនកម្ពុជា។ ការផ្លាស់ប្តូរជំហរ ត្រូវបានលោក អ៊ុំ សំអាន អតីតតំណាងរាស្ត្រគណបក្សប្រឆាំងយល់ថា ដោយសារបុគ្គលនោះចង់បានប្រយោជន៍ផ្ទាល់ខ្លួន និងមានឱកាសផ្តល់ឲ្យ ខណៈជិតបោះឆ្នោត។
បើតាមលោក អ៊ុំ សំអាន ការសុំចូលរបស់ទូច វិបុល ជាមួយបក្សកាន់អំណាច គឺបន្ទាប់ពីគណបក្សភ្លើងទៀនមិនផ្តល់តំណែងនៅក្នុងបក្សតាមការស្នើសុំ។
លោក ទូច វិបុល ដែលរស់នៅសហរដ្ឋអាមេរិក គឺជាអតីតថ្នាក់ដឹកនាំនៃ ចលនានិស្សិតដើម្បីលទ្ធិប្រជាធិបតេយ្យ។កាលនៅជានិស្សិត លោក វិបុល ធ្លាប់បានចូលរួមប្រឆាំងនឹងលទ្ធផលនៃការបោះឆ្នោត និងប្រឆាំងបេក្ខភាព លោក ហ៊ុន សែន ជានាយករដ្ឋមន្រ្តី ក្រោយការបោះឆ្នោតជាតិ លើកទី២ នៅខែកក្កដា ឆ្នាំ ១៩៩៨។
នៅចុងឆ្នាំ ២០០០ លោក វិបុល បានទទួលសិទ្ធិជ្រកកោនខាងនយោបាយ ទៅរស់នៅសហរដ្ឋអាមេរិក ។ចន្លោះឆ្នាំ ២០១២ ដល់ឆ្នាំ ២០១៤ លោក ទូច វិបុល បានរៀបចំ មូលនិធិសង្គ្រោះជាតិ ដែលដឹកនាំដោយលោក សម រង្ស៊ី និងលោក កឹម សុខា ។ តាមរយ:មូលនិធិនេះ លោក វិបុល បានជួយដល់មេធាវី រីឆាត រ៉ចជ័រ (Richard Rogers) ដែលបានដាក់ពាក្យបណ្ដឹងទៅកាន់តុលាការឧក្រិដ្ឋកម្មអន្តរជាតិ ស្តីពីបទប្រល័យពូជសាសន៏ និងប្រឆាំងមនុស្សជាតិ ពីជនមានអំណាច ដែលពាក់ព័ន្ធនឹងការបណ្តេញប្រជាពលរដ្ឋ ចេញពីលំនៅឋានទាំងបង្ខំ។ នេះបើតាម លោក ម៉ែន ណាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ