លិខិតចំហ៖ អ្នកកាសែត The Diplomat បានស្នើនិក្ខេបបទថ្នាក់បណ្ឌិតពីលោក ហ៊ុន ម៉ាណែត
ក្នុងលិខិតចំហដែលចេញនៅថ្ងៃទី០៨វិច្ឆិកានេះ អ្នកកាសែត The Diplomat បញ្ជាក់ថាខ្លួនបានទាក់ទងទៅអង្គភាពព័ត៌មានរបស់នាយករដ្ឋមន្ត្រីកម្ពុជា ដើម្បីស្នើសុំនិក្ខេបបទបណ្ឌិតរបស់លោក ហ៊ុន ម៉ាណែត។ ក្នុងលិខិតចំហនោះ ការស្នើសុំធ្វើឡើង បន្ទាប់ពីលោកនាយករដ្ឋមន្ត្រីបើកភ្លើងខៀវកាលពីថ្ងៃទី០២វិច្ឆិកា និងបន្ទាប់ពីសកលវិទ្យាល័យបដិសេធមិនបញ្ចេញនិក្ខេបបទនោះជាច្រើនដង។
ចុះផ្សាយនៅថ្ងៃ៖
ស្តាប់ - ០២:៤០
ក្នុងលិខិតចំហដែលចេញនៅថ្ងៃទី០៨វិច្ឆិកានេះ លោក David Whitehouse អ្នកកាសែត The Diplomat ថាលោកបានទាក់ទងទៅអង្គភាពព័ត៌មានរបស់នាយករដ្ឋមន្ត្រីកម្ពុជា ដើម្បីស្នើសុំការចម្លងនិក្ខេបថ្នាក់បទបណ្ឌិតនៅសកលវិទ្យាល័យ Bristol របស់លោក ហ៊ុន ម៉ាណែត។ តាមអ្នកកាសែតជនជាតិបារាំងនោះ គិតត្រឹមថ្ងៃចេញលិខិតចំហ លោកនាយករដ្ឋមន្ត្រី ហ៊ុន ម៉ាណែត នៅមិនទាន់ឆ្លើយតបយ៉ាងណានោះទេ ចំពោះសំណើរ។
គួររំព្ញកថា លោក ហ៊ុន ម៉ាណែត កាលពីថ្ងៃទី០២វិច្ឆិកា បានប្រកាសបើកភ្លើងខៀវផ្តល់និក្ខេបបទថតចម្លងកម្រាស់២៣២ទំព័រ ទៅឱ្យអ្នកកាសែតបរទេសរូបនោះ ប្រសិនបើមានការស្នើសុំមកលោក។
ការស្នើទៅនាយករដ្ឋមន្ត្រីកម្ពុជារបស់អ្នកកាសែតនេះ ធ្វើឡើងបន្ទាប់ពីសកលវិទ្យាល័យ Bristol បានបដិសេធមិនបញ្ចេញនិក្ខេបបទនោះជាច្រើនដង។ ក្នុងលិខិតចំហនោះដែរមានលើកឡើងទៀតថា នៅថ្ងៃទី៣វិច្ឆិកា សកលវិទ្យាល័យ Bristol បានឱ្យដំណឹងជាថ្មីមកលោក David Whitehouse អំពីការបដិសេធជាថ្មីពីលោក ហ៊ុន ម៉ាណែត ជាម្ចាស់សាម៉ី។
លោក Davit Whitehouse ដាក់មន្ទិលថាហេតុអ្វីបានជាបណ្ឌិតសេដ្ឋកិច្ច ដែលតាំងពីបានក្លាយជានាយករដ្ឋមន្ត្រីនៃប្រទេសអភិវឌ្ឍន៍តិចតួចមក មិនចង់ធ្វើឱ្យគេបើកចំហពីការសិក្សារបស់ខ្លួនដូច្នេះ។ អ្នកកាសែតរូបនេះបានអះអាងធ្វើយ៉ាងណាទទួលនិក្ខេបបទថតចម្លងរបស់លោកនាយករដ្ឋមន្ត្រីកម្ពុជា តាមរយៈការដាក់បណ្តឹងឧទ្ធរណ៍ប្រឆាំងនឹងការលាក់បាំងព័ត៌មាន ទៅកាន់ស្នងការព័ត៌មានរបស់រដ្ឋាភិបាលអង់គ្លេស។
សូមជម្រាបជូនថា លោក ហ៊ុន ម៉ាណែត បានអះអាងថានិក្ខេបបទបណ្ឌិតរបស់លោក បានឆ្លងទីប្រឹក្សាជាប់រហូតក្នុងរយៈពេល៥ឆ្នាំ ហើយលោកបានឆ្លងកាត់ការការពារនិក្ខេបបទជាមួយសាស្ត្រាចារ្យជិត១០នាក់ ដោយមិនមានវត្តមានទីប្រឹក្សារបស់លោកទេ។ ដោយលើកឡើងពីប្រធានបទស្តីពីសហគ្រាសធុនតូច និងមធ្យម នៅតាមបណ្តាប្រទេសក្រីក្រ ដែលជាកត្តាកំណើនសេដ្ឋកិច្ច លោកនាយករដ្ឋមន្ត្រីថាលោកធ្វើនិក្ខេបបទនេះមិនខុសទេ ដោយនិក្ខេបបទនេះវាស្របទៅនឹងគោលនយោបាយរបស់រដ្ឋាភិបាលកម្ពុជាបច្ចុប្បន្ន។
គួរដឹងថា ការទាមទារចង់បាននិក្ខេបបទបណ្ឌិតរបស់លោកនាយករដ្ឋមន្ត្រីកម្ពុជាយកមកបង្ហាញជាសាធារណៈនេះ ក៏ត្រូវបានគេមើលឃើញថា គឺជាកម្មវត្ថុការប្រើប្រាស់ដើម្បីវាយប្រហារនយោបាយ។ កាលពីថ្ងៃទី១៨ ខែកញ្ញាកន្លងទៅ លោក សម រង្ស៊ី បានដាក់ការមន្ទិលសង្ស័យអំពីសញ្ញាបត្របណ្ឌិត ដែលលោក ហ៊ុន ម៉ាណែត ទទួលបានកាលពីឆ្នាំ ២០០៩ ពីសាកលវិទ្យាល័យ Bristol ចក្រភពអង់គ្លេសថា ជានិក្ខេបបទ ជួលជនបរទេសឲ្យសរសេរ និងដែលមិនពាក់ព័ន្ធអ្វីនឹងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ