ឧត្តមក្រុមប្រឹក្សានិងពិគ្រោះចង់ពង្រីកវិសាលភាព ទោះរងការរិះគន់ថាគ្មានភាពចាំបាច់
ឧត្តមក្រុមប្រឹក្សាពិគ្រោះនិងផ្តល់យោបល់ ដែលមានគណបក្សនយោបាយក្រៅរដ្ឋាភិបាលចំនួន២៩ ជាសមាជិក នៅថ្ងៃទី៦ធ្នូនេះ បានជួបប្រជុំគ្នាជាមួយលោកនាយករដ្ឋមន្ត្រី ហ៊ុន ម៉ាណែត ជាលើកទី១ សម្រាប់អាណត្តិទី៧នេះ។ លោក ឈឹម ផលវរុណ ប្រធានឧត្តមក្រុមប្រឹក្សាពិគ្រោះនិងផ្តល់យោបល់លើកឡើងថា ឧត្តមក្រុមប្រឹក្សានេះនឹងពង្រីកវិសាលភាពចំនួនគណបក្សនយោបាយចូលរួម ខណៈមានការលើកឡើងថាកម្ពុជាគ្មានភាពចាំបាច់មានឧត្តមក្រុមប្រឹក្សានិងពិគ្រោះយោបល់ ដោយសាររដ្ឋាភិបាលអាណត្តិថ្មីមានទីប្រឹក្សានិងមន្ត្រីនយោបាយច្រើនលើសលប់។
ចុះផ្សាយនៅថ្ងៃ៖
ស្តាប់ - ០៣:១៦
ក្រុមប្រឹក្សាពិគ្រោះនិងផ្តល់យោបល់ ដែលមានគណបក្សនយោបាយក្រៅរដ្ឋាភិបាលចំនួន២៩ ជាសមាជិក នៅថ្ងៃទី៦ធ្នូ បានជួបប្រជុំគ្នាជាមួយលោកនាយករដ្ឋមន្ត្រី ហ៊ុន ម៉ាណែត ជាលើកទី១ សម្រាប់អាណត្តិទី៧នេះ។ លោក ឈឹម ផលវរុណ ប្រធានឧត្តមក្រុមប្រឹក្សាពិគ្រោះនិងផ្តល់យោបល់ លើកឡើងថា ឧត្តមក្រុមប្រឹក្សាមួយនេះគ្រោងនឹងពង្រីកវិសាលភាពចំនួនគណបក្សនយោបាយក្រៅរដ្ឋាភិបាលចូលរួមបន្ថែមទៀត ដោយមើលឃើញពីភាពសំខាន់នៃការចូលរួមពហុគំនិតក្នុងន័យស្ថាបនា លើកស្ទួយការអនុវត្តជាក់ស្តែងនៃគោលនយោបាយបច្ចកោណរបស់រដ្ឋាភិបាល។
ជាមួយគ្នានេះ រដ្ឋាភិបាលបានអះអាងផ្តល់ឯករាជ្យភាពនិងអធិបតេយ្យភាពដល់ប្រតិភូគណបក្សនីមួយៗ ដែលជាសមាជិកឧត្តមក្រុមប្រឹក្សានិងពិគ្រោះយោបល់នេះ និងដោយផ្តល់ថវិកា៤លានរៀលក្នុងមួយខែ ដើម្បីចាត់ចែងស្វ័យទទួលខុសត្រូវ ដោយធ្វើយ៉ាងណាបានជាសមិទ្ធផលរាយការណ៍ទៅរដ្ឋាភិបាលវិញ។
សូមជម្រាបជូនថា ព្រះករុណាព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី កាលពីថ្ងៃទី៣១ខែតុលា បានត្រាស់បង្គាប់តែងតាំង និងផ្តល់ឋានៈដល់សមាសភាពប្រតិភូនៃឧត្តមក្រុមប្រឹក្សាពិគ្រោះនិងផ្តល់យោបល់ចំនួន១៤៥រូប។ អ្នកទាំងជាង១៤០រូបនោះ ជាប្រតិភូគណបក្សនយោបាយ ក្នុងនោះសមាសភាព២៩រូបទៀត មានឋានៈស្មើរដ្ឋមន្ត្រី, ២៩រូប ឋានៈស្មើរដ្ឋលេខាធិការ, ២៩រូប ឋានៈស្មើអនុរដ្ឋលេខាធិការ និង២៩រូបទៀត ឋានៈស្មើអគ្គនាយក។
ជាការកត់សម្គាល់ ឧត្តមក្រុមប្រឹក្សានិងពិគ្រោះយោបល់នេះ ត្រូវបានគេរិះគន់ថា បង្កើតឡើងដើម្បីបម្រើប្រយោជន៍នយោបាយ ហើយគ្មានភាពចាំបាច់សម្រាប់កម្ពុជានោះទេ ព្រោះកម្ពុជាមានមន្ត្រីរដ្ឋាភិបាលនិងទីប្រឹក្សាច្រើនលើសលប់រួចទៅហើយ។
គួរដឹងដែរថា នេះជាលើកទី២ហើយដែលរដ្ឋាភិបាលសម្រេចបង្កើតក្រុមការងារឧត្តមប្រឹក្សា និងពិគ្រោះយោបល់នេះ ដើម្បីផ្ដល់ឱកាសឱ្យគណបក្សនយោបាយមិនឈ្នះឆ្នោតអាចចូលរួមធ្វើការងារជាមួយរដ្ឋាភិបាល។
កាលពីអាណត្តិទី៦ ដែលមានអតីតនាយករដ្ឋមន្ត្រី លោក ហ៊ុន សែន បានសម្រេចបង្កើតឧត្តមក្រុមប្រឹក្សា ពិគ្រោះនិងផ្តល់យោបល់នេះ ដោយផ្តល់ភារកិច្ចផ្តួចផ្តើម តាក់តែង ឬ ផ្តល់យោបល់លើការរៀបចំគោលនយោបាយ ក៏ដូចជាលើសេចក្តីព្រាងលិខិតបទដ្ឋានគតិយុត្តផ្សេងៗរបស់រដ្ឋាភិបាល។ និងដែលមានតួនាទីតាមដានដំណើរការអនុវត្តច្បាប់និងគោលនយោបាយទាំងថ្នាក់ជាតិនិងក្រោមជាតិ។
ភ្លាមៗក្រោយបង្កើតនៅក្នុងឆ្នាំ២០១៨និងដើមឆ្នាំ២០១៩ ក្រុមការងារមួយនេះបានចុះទៅដោះស្រាយបញ្ហាពលរដ្ឋ និងលើកយកចំណុចអសកម្មរបស់មន្ត្រីរាយការណ៍ទៅរដ្ឋាភិបាលដើម្បីចាត់វិធានការ។ ប៉ុន្តែក្រោយដំណើរការងារមួយឆ្នាំ រដ្ឋាភិបាលបានចេញបម្រាមមិនឱ្យសមាជិកក្រុមការងារឧត្តមក្រុមប្រឹក្សានិងពិគ្រោះយោបល់ ចុះដោះស្រាយរាល់ទំនាស់ដែលរដ្ឋមន្ត្រីបានដោះស្រាយ និងមានសេចក្តីជូនដំណឹងរបស់ទីស្តីការគណៈរដ្ឋមន្រ្តីរួច, ហាមចុះដោះស្រាយរាល់ទំនាស់ដីធ្លី ដែលកំពុងដំណើរការតាមនីតិវិធីរបស់តុលាការ, និងមិនត្រូវដោះស្រាយរាល់ទំនាស់ដីធ្លី ដែលបានដោះស្រាយដោយតុលាការ និងមានសាលក្រមឬសាលដីកា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ