រដ្ឋាភិបាលប្រកាសយកថ្ងៃ២៧ កុម្ភៈ ជាថ្ងៃកាន់ទុក្ខសម្តេចព្រះសង្ឃរាជ ទេព វង្ស
រដ្ឋាភិបាលកម្ពុជាបានប្រកាសយកថ្ងៃទី២៧ ខែកុម្ភៈ ឆ្នាំ២០២៤នេះ ជាថ្ងៃកាន់ទុក្ខផ្លូវការដល់ព្រះសពសម្តេចព្រះមហាសង្ឃរាជ ទេព វង្ស ដែលបានចូលទិវង្គតកាលពីថ្ងៃទី២៦ ខែកុម្ភៈ ក្នុងព្រះជន្មាយុ ៩៣ព្រះវស្សា ដោយជរាពាធ។ ទន្ទឹមគ្នានេះ រដ្ឋាភិបាលក៏បានបង្កើតគណៈកម្មាធិការមួយដឹកនាំដោយមន្ត្រីសង្ឃជាន់ខ្ពស់ និងមន្ត្រីរដ្ឋាភិបាលជាច្រើនរូប ដើម្បីរៀបចំបុណ្យសពឲ្យបានសមរម្យ។
ចុះផ្សាយនៅថ្ងៃ៖
ស្តាប់ - ០៣:២១
ក្រៅពីចាត់ទុកថ្ងៃទី២៧ ខែកុម្ភៈនេះ ជាថ្ងៃកាន់ទុក្ខផ្លូវការដល់ព្រះសពសម្តេចសង្ឃរាជ ទេព វង្ស នៃគណៈមហានិកាយ សារាចរណ៍របស់រដ្ឋាភិបាលកម្ពុជាក៏បានណែនាំឲ្យគ្រប់ក្រសួង ស្ថាប័ន សាលារៀន មន្ទីរពេទ្យរដ្ឋ និងឯកជន កងកម្លាំងប្រដាប់អាវុធ គ្រប់ទីអារាម និងប្រជាពលរដ្ឋទូទាំងប្រទេសបង្ហូតទង់ជាតិត្រឹមពាក់កណ្តាលដង។ ទន្ទឹមគ្នានេះ គ្រប់ស្ថានីយ៍វិទ្យុ ទូរទស្សន៍ជាតិ និងឯកជនទាំងអស់ត្រូវផ្អាកការសម្តែង និងការចាក់ផ្សាយនូវទស្សនីយភាពផ្សេងៗ ដែលមានលក្ខណៈសប្បាយគគ្រឹកគគ្រេងក្នុងថ្ងៃទី២៧ ខែកុម្ភៈនេះ។
ដោយឡែក អតីតនាយករដ្ឋមន្ត្រីលោក ហ៊ុន សែន បានផ្ញើសាររំលែកសមានទុក្ខដ៏ក្រៀមក្រំ និងថា ការបាត់បង់សម្តេចព្រះមហាសង្ឃរាជ ទេព វង្ស ជាការបាត់បង់មហាវីរសង្ឃកំពូល ដែលជាកុលបុត្រដ៏ឧត្តុងគ្គឧត្តមនៃកសិករ ធ្លាប់ចូលរួមចលនាតស៊ូរំដោះជាតិ និងសាងព្រះភ្នួសលើកកម្ពស់ការរស់ឡើងវិញវិស័យពុទ្ធសាសនានៅកម្ពុជាចាប់តាំងពីថ្ងៃ៧មករា ឆ្នាំ១៩៧៩ រហូតដល់ថ្ងៃអស់ព្រះជន្ម។
ចំពោះការទទួលខុសត្រូវបណ្តោះអាសន្នខាងពុទ្ធចក្រត្រូវបានក្រសួងធម្មការ និងសាសនាសម្រេចប្រគេនឲ្យសម្តេចព្រះមហាសុមេធាធិបតី នន្ទ ង៉ែត ដែលបច្ចុប្បន្នជាសម្តេចព្រះសង្ឃនាយកទទួលភារកិច្ចជាសម្តេចព្រះមហាសង្ឃរាជស្តីទី។
ទន្ទឹមគ្នានេះ រដ្ឋាភិបាលក៏បានបង្កើតគណៈកម្មការរៀបចំបុណ្យព្រះសពមួយជាបន្ទាន់ ដែលគណៈកម្មការនេះដឹកនាំដោយមន្ត្រីសង្ឃជាន់ខ្ពស់នៃប្រទេសកម្ពុជា និងខាងអាណាចក្រដឹកនាំដោយរដ្ឋមន្ត្រីទីស្តីការគណៈរដ្ឋមន្ត្រី។
ដើម្បីរក្សាសន្តិសុខ និងសណ្តាប់ធ្នាប់ សាលារាជធានីភ្នំពេញនៅថ្ងៃអង្គារ ទី២៧ កុម្ភៈបានចេញសេចក្តីជូនដំណឹងឲ្យសាធារណជនបង្វែរការធ្វើចរាចរណ៍ទៅកាន់ទិសដៅផ្សេង ពោលមិនអនុញ្ញាតឲ្យបើកបរកាត់មុខវត្តឧណ្ណាលោម ដែលជាទីតាំងប្រារព្ធពិធីបុណ្យព្រះសពចាប់ពីថ្ងៃទី២៧ ខែកុម្ភៈនេះ រហូតដល់ថ្ងៃទី០៣ ខែមីនា ឆ្នាំ២០២៤។
សូមរំលឹកថា សម្ដេចព្រះអគ្គមហាសង្ឃរាជាធិបតី ទេព វង្ស បានយាងចូលព្រះទិវង្គត នៅវេលាម៉ោង ៥:៤០នាទីល្ងាច ថ្ងៃទី២៦ ខែកុម្ភៈ ឆ្នាំ២០២៤ ក្នុងព្រះជន្មាយុ ៩៣ព្រះវស្សា ដោយរោគាពាធ។
ប្រសូត្រនៅថ្ងៃទី១២ ខែមករា ឆ្នាំ១៩៣២ នៅស្រុកប្រាសាទបាគង ខេត្តសៀមរាប សម្តេចព្រះសង្ឃរាជ ទេព វង្ស បានសាងព្រះផ្នួសចំនួន២លើក។ លើកទី១ នៅឆ្នាំ១៩៥២ នៅវត្តរាជបូណ៍ ខេត្តសៀមរាប និងលើកទី២នៅថ្ងៃទី១៩ ខែកញ្ញា ឆ្នាំ១៩៧៩ នៅវត្តឧណ្ណាលោម ក្រុងភ្នំពេញ។ ក្នុងឆ្នាំ១៩៧៩ ដដែល ព្រះអង្គបានឡើងតួនាទីជាព្រះវិន័យធរ ប្រធានសង្ឃ និងជាព្រះឧបជ្ឈាហ៍ធំជាងគេទូទាំងប្រទេសបន្តពីព្រះគ្រូមហាថេរព្រះនាម កើត វ៉ាយ។
បន្ទាប់មក សម្តេចព្រះសង្ឃរាជ ទេព វង្ស ក៏ទទួលបានព្រះគោរមងារមួយចំនួនទៀតដូចជា ព្រះមហាសុមេធាធិបតីសង្ឃនាយក សម្ដេចព្រះមហាសុមេធាធិបតីព្រះសង្ឃរាជគណៈមហានិកាយនិង សម្ដេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិតជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ