ព្រះកេសទេវតាចំនួនមួយ ត្រូវបានរក​ឃើញនៅខ្លោងទ្វារជ័យ

ព្រះកេសទេវតាចំនួនមួយបានប្រទះឃើញដោយចៃដន្យ ដោយក្រុមការងារស្រាវជ្រាវរបស់អាជ្ញាធរជាតិអប្សរា ដែលបានកប់ក្នុងរណ្តៅមួយ នៅបាតគ្រឹះខាងផ្នែកទេវតាទាញព្រ័ត្រ នៃខ្លោងទ្វារជ័យ។ បើតាមអាជ្ញាធរជាតិអប្បរា ព្រះកេសទេវតានេះ បានរកឃើញនៅថ្ងៃទី ០៨​ ខែឧសភា ឆ្នាំ២០១២៤ នៅអំឡុងពេលអ្នកបុរាណវិទ្យាកំពុងពិនិត្យរចនាសម្ព័ន្ធបាតគ្រឹះ ចម្លាក់កូរសមុទ្រទឹកដោះក្នុងគម្រោងជួសជុលឡើងវិញ។

០១:១៨

ព្រះកេសទេវតាចំនួនមួយ ត្រូវបានរកឃើញនៅខ្លោងទ្វារជ័យ © អាជ្ញាធរជាតិអប្សរា

 អាជ្ញាធរជាតិអប្សរា បានដកស្រង់​សំដី​របស់លោក អន សុភាព ជាបុរាណវិទូ មកផ្សាយថា ក្រោយពីសិក្សា និងពិនិត្យរួចអ្នកជំនាញសន្និដ្ឋានថា ព្រះកេសទេវតាដែលបានប្រទះឃើញនេះ ជាព្រះកេសទេវតាបាក់ធ្លាក់ពីរូបទេវតា នៅចំណុចលេខទី២៣ បើរាប់ពីជួរមុខមក។ ព្រះកេសធ្វើពីថ្មភក់នេះមានបណ្ដោយ ២០ស.ម ទទឹង១១ស.ម និងកម្ពស់ ១២ស.ម។

ក្រោយកំណាយស្រាវជ្រាវបានមួយផ្នែកធំ អ្នកជំនាញបានសន្និដ្ឋានថា គ្រឹះចម្លាក់កូរសមុទ្រទឹកដោះ នៅខ្លោងទ្ចារជ័យនេះមានភាពរឹងមាំល្អ ក្រោយបានជួសជុលម្តងនៅសម័យកណ្តាល និងសម័យបារាំង។

សម្រាប់ បុរាណវិទូ លោក អន សុភាព គេគួរតែកំណាយស្រាវជ្រាវសំណង់ខ្លោងទ្វារជ័យបន្ថែមទៀត​ ពិនិត្យស្ថានភាពតួស្ពានទាំងមូល ដើម្បីមើលស្ថានភាពជួសជុលបានល្អិតល្អន់ មុននឹងមានគម្រោងជួសជុលចម្លាក់កូរសមុទ្រទឹកដោះនាពេលខាងមុខ៕