លោក ហ៊ុន សែន៖ ចលនាជ្រុលនិយម អាចបង្កឱ្យមានសង្គ្រាម
លោក ហ៊ុន សែន ប្រធានព្រឹទ្ធសភាបានប្រាប់ឯកអគ្គរាជទូតជប៉ុន នៅថ្ងៃទី១៨ខែឧសភា ថា ឲ្យចាំមើលចលនាជ្រុលនិយមត្រូវកាត់បន្ថយនៅក្នុងតំបន់ ស្ថានការណ៍ប្រជាធិបតេយ្យ នឹងល្អប្រសើរ រួមទាំងកម្ពុជា។ ការលើកឡើងបែបនេះរបស់អតីតនាយករដ្ឋមន្ត្រីកម្ពុជា គឺក្នុងជំនួបអាហារថ្ងៃត្រង់ជាមួយលោក អឹអិណុ អាហ្សឹហ្ស៊ី នៅនិវេសនដ្ឋានទូតជប៉ុន ក្នុងទីក្រុងភ្នំពេញ។
ចុះផ្សាយនៅថ្ងៃ៖
តាមសំណេរនៅលើហ្វេសប៊ុក លោក ហ៊ុន សែន ព្យាករណ៍ថា នៅពេលអស់ចាស់ជ្រុលនិយម ក្មេងៗនឹងធ្វើឱ្យដំណើរការប្រជាធិបតេយ្យល្អប្រសើរ។ ក្នុងន័យនេះ អ្នកតាមដាននយោបាយយល់ថា លោក ហ៊ុន សែន ចង់សំដៅដល់ក្រុម លោក សម រង្ស៊ី ឬបក្សប្រឆាំង ស្របពេលសមជិកបក្សប្រឆាំងមួយចំនួនត្រូវបានចាប់ខ្លួនជាបន្តបន្ទាប់នៅមុនបោះឆ្នោតអសកលនៅចុងសប្តាហ៍ក្រោយនេះ។
បើតាមសំណេរ របស់ប្រធានព្រឹទ្ធសភារូបនេះ លោកកំពុងប្តេជ្ញាប្រើអំណាចខ្លួនបោសសំអាត ក្រុមបក្សប្រឆាំងនៅកម្ពុជា នៅក្រោមហេតុផលដែលលោកហៅថា ជាក្រុមជ្រុលនិយម។
ឆ្លៀតក្នុងឱកាសឃោសនាបោះឆ្នោតអសកលនេះ លោក ហ៊ុន សែន បានបញ្ជាក់ថា ការបោះឆ្នោត គឺដើម្បីសុខសុវត្ថិភាព សេចក្ដីសុខរបស់ប្រជាជន មិនមែនដើម្បីធ្វើសង្គ្រាមនោះទេ ។ លោកបានសង្កត់ធ្ងន់ថា ចលនាជ្រុលនិយម អាចបង្កឱ្យមានសង្គ្រាម ។
ផ្ទុយមកវិញ លោក រ៉ុង ឈុន ទីប្រឹក្សាគណបក្សកម្លាំងជាតិ យល់ថា ការលើកឡើងរបស់អតីតនាយករដ្ឋមន្ត្រី លោក ហ៊ុន សែន មិនបានឆ្លុះបញ្ចាំងពីការពិតទាល់តែសោះ ។ លោកថា អ្នកនយោបាយទាំងអស់សុទ្ធតែជាខ្មែរធ្វើការបម្រើពលរដ្ឋ មិនគួរចាត់ទុកជាក្រុមជ្រុលនិយមនោះទេ។
សម្រាប់ លោក រ៉ុង ឈុន ការចាប់ខ្លួនបេក្ខជនឈរឈ្មោះឲ្យគណបក្សប្រឆាំងកន្លងមក ហាក់ធ្វើទៅតាមអារម្មណ៍របស់អ្នកកាន់អំណាច ខណៈលោកឲ្យយោបល់ថា ក្នុងនាមជាអ្នកនយោបាយគួរបើកចិត្តនិយាយគ្នាជាជាង ចោទប្រកាន់ក្រុមណាមួយថា«ជ្រុលនិយម»ដែលនេះមិនអាចនាំឱ្យប្រទេសកម្ពុជាមានការរីកចម្រើនបានទេ។
បើតាមគណបក្សប្រឆាំង យ៉ាងហោចណាស់ មានបេក្ខជនដែលឈរឈ្មោះសម្រាប់បក្សប្រឆាំងជាង១០រូប ដែលមកពីគណបក្សឆន្ទៈខ្មែរ គណបក្សភ្លើងទៀន និងគណបក្សកម្លាំងជាតិ ត្រូវបានចាប់ខ្លួន នៅមុនការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤នេះ។ សម្រាប់បណ្តាបក្សប្រឆាំង នេះជាការបំភិតបំភ័យ និងគំរាមកំហែងផ្នែកនយោបាយ ដែលជះឥទ្ធិពលមិនល្អសម្រាប់ការបោះឆ្នោតអសកលនៅថ្ងៃទី២៦ខែឧសភាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ