បញ្ហាបរិស្ថាន បន្ដគំរាមកំហែងពិភពលោកនៅឆ្នាំ២០២១
ចុះផ្សាយនៅថ្ងៃ៖
ស្តាប់ - ០៤:០៨
យោងតាមរបាយការណ៍ស្ដីពីហានិភ័យសកលឆ្នាំ២០២១ ដែលត្រូវបានចេញផ្សាយ ដោយវេទិកាសេដ្ឋកិច្ចពិភពលោក (The World Economic Forum) មនុស្សជាតិរាប់ពាន់លាននាក់ កំពុងប្រឈមនឹងហានិភ័យសកល តួយ៉ាងការខកខានទទួលបានភាពជឿនលឿននៃបច្ចេកវិទ្យា ស្របពេលដែលគម្លាតនៃការទទួលបានបច្ចេកវិទ្យាបានកើនឡើង។ ក្នុងរយៈពេលមធ្យម សេដ្ឋកិច្ចពិភពលោកនឹងត្រូវរងការគំរាមកំហែង ដោយផលប៉ះពាល់នៃវិបត្ដិជំងឺកូវីដ១៩។ ស្ថិរភាពភូមិសាស្ត្រនយោបាយនឹងមានភាពផុយស្រួយ ក្នុងរយៈពេលពី៥ ទៅ១០ឆ្នាំខាងមុខ។ ក្នុងរយៈពេលវែង ហានិភ័យពាក់ព័ន្ធទៅនឹងបញ្ហាបរិស្ថាន នៅតែបន្តគំរាមកំហែង។ បញ្ហាបរិស្ថានបន្ដជាហានិភ័យចម្បងកំពូល គិតទាំងលទ្ធភាពដែលវាអាចកើតមានឡើង និងផលប៉ះពាល់របស់វា។
របាយការណ៍ស្ដីពីហានិភ័យសកលឆ្នាំ២០២១ ដែលត្រូវបានចេញផ្សាយដោយវេទិកាសេដ្ឋកិច្ចពិភពលោក (the World Economic Forum) គឺជារបាយការណ៍ប្រចាំឆ្នាំលើកទី១៦ ផ្តោតការវិភាគលើបញ្ហាសកលនានា តួយ៉ាង ជំងឺរាតត្បាតសកល ការធ្លាក់ចុះកំណើនសេដ្ឋកិច្ច វិបត្តិនយោបាយ និងវិបត្តិអាកាសធាតុ ជាដើម។ របាយការណ៍នេះបង្ហាញពីកម្រិតហានិភ័យសកលដែលអាចកើតមានឡើងនៅថ្ងៃអនាគត ក្នុងរយៈពេលខ្លី មធ្យម និងវែង។
របាយការណ៍នេះជាការសិក្សាប្រចាំឆ្នាំដែលចេញផ្សាយមុនពេលកិច្ចប្រជុំប្រចាំឆ្នាំនៅទីក្រុងDavos ប្រទេសស្វីស។ របាយការណ៍ពិពណ៌នាអំពីការផ្លាស់ប្តូរដែលកើតឡើងនៅក្នុងបរិបទហានិភ័យពិភពលោកពីមួយឆ្នាំទៅមួយឆ្នាំ។ របាយការណ៍ក៏ស្វែងយល់អំពីទំនាក់ទំនងនៃហានិភ័យទាំងនោះ និងការពិចារណាស្វែងរកយុទ្ធសាស្ត្រដើម្បីកាត់បន្ថយហានិភ័យពិភពលោកទាំងនោះផងដែរ។
គោលគំនិត និងការវិភាគ ក្នុងរបាយការណ៍ត្រូវរួមបញ្ចូលការវាយតម្លៃ ដោយស្ថាប័នដៃគូនានា មតិយោបល់ក្នុងសិក្ខាសាលា និងការស្ទង់មតិរបស់អ្នកជំនាញដែលមានការទទួលស្គាល់ជាអន្តរជាតិ។ សម្រាប់របាយការណ៍ហានិភ័យឆ្នាំ២០២១ ទិន្នន័យផ្សេងៗទទួលបានពីការឆ្លើយនឹងសំនួរពីអ្នកជំនាញទាំង៦៥០នាក់ ពីស្ថាប័នផ្សេងៗចម្រុះគ្នា។
នៅឆ្នាំ២០២១ ហានិភ័យចម្បងកំពូលដែលអាចមានលទ្ធភាពកើតឡើងច្រើន រួមមាន៖ អាកាសធាតុកើនកម្ដៅខ្លាំង ភាពបរាជ័យនៃសកម្មភាពរួមគ្នាជាសកលដើម្បីដោះស្រាយបញ្ហាអាកាសធាតុ ការខូចខាតបរិស្ថាន ការកើនឡើងចំនួនមនុស្សមានជំងឺឆ្លង ការបាត់បង់ជីវចម្រុះ ការប្រមូលផ្តុំថាមពលបច្ចេកវិទ្យាតែក្នុងប្រទេសខ្លះ វិសមភាពបច្ចេកវិទ្យា ការធ្លាក់ចុះទំនាក់ទំនងអន្ដរជាតិ ការបរាជ័យខាងសន្តិសុខតាមអ៊ីនធឺណិត និងវិបត្តិជីវភាព។ កាលពីឆ្នាំមុន របាយការណ៍បង្ហាញពីកង្វល់បរិស្ថាន ដែលស្ថិតក្នុងចំណោមហានិភ័យចម្បងកំពូល គិតទាំងលទ្ធភាពកើតមាន និងផលប៉ះពាល់របស់វា។
របាយការណ៍បានបង្ហាញថា ការខាតបង់សេដ្ឋកិច្ច និងចំនួនមនុស្សស្លាប់ដោយសារជំងឺកូវីដ១៩ មានសភាពធ្ងន់ធ្ងរណាស់។ វិបត្តិជំងឺនេះបង្កការគំរាមកំហែងដល់ការរីកចម្រើនទៅថ្ងៃមុខ នៅប៉ុន្មានឆ្នាំក្រោយៗទៀត ជាពិសេស ចំពោះការកាត់បន្ថយភាពក្រីក្រ និងវិសមភាពសកល និងការធ្វើឱ្យខូចខាតដល់ការរួបរួមគ្នាក្នុងសង្គម និងកិច្ចសហប្រតិបត្តិការពិភពលោក។
សម្រាប់ហេតុផលទាំងនោះ ជំងឺរាតត្បាតត្រូវបានចាត់ទុកជាបញ្ហាចម្បងបំផុត។ ជំងឺកូវីដ១៩ មិនត្រឹមតែនាំឱ្យមានការបាត់បង់អាយុជីវិតមនុស្សប៉ុណ្ណោះទេ តែវាកំពុងតែរារាំងដល់ការអភិវឌ្ឍសេដ្ឋកិច្ចនៅតាមតំបន់ក្រីក្រមួយចំនួន នៅលើពិភពលោក ស្របពេលដែលការកើនឡើងវិសមភាពទ្រព្យសម្បត្តិបានកើតមានឡើងនៅពាសពេញពិភពលោក។
នៅទីបញ្ចប់ បើទោះបីជាយើងអាចដោះស្រាយវិបត្តិជំងឺកូវីដ១៩ ក៏យើងត្រូវប្រឈមនឹងបញ្ហា អាកាសធាតុដែលស្ថិតជាវិបត្តិចម្បងកំពូល ក្នុងតារាងហានិភ័យសកលឆ្នាំនេះ។ របាយការណ៍ពិពណ៌នាថា វាជាការគំរាមកំហែងសម្រាប់មនុស្សជាតិ។ ប្រាកដណាស់ ការធ្លាក់ចុះនៃការបំភាយឧស្ម័នពុលបានកើតមានឡើង ព្រោះការបិទទ្វារបង្ខាំងប្រជាជនឱ្យនៅក្នុងផ្ទះ និងការធ្លាក់ចុះការធ្វើពាណិជ្ជកម្ម និងការធ្វើដំណើរអន្តរជាតិ ក៏ប៉ុន្ដែក៏នៅមានការព្រួយបារម្ភថា នៅពេលសេដ្ឋកិច្ចចាប់ផ្តើមងើបឡើងវិញ ការបំភាយឧស្ម័ននឹងកើនឡើងវិញម្ដងទៀត។
យោងតាមរបាយការណ៍ឆ្នាំនេះ ក្នុងរយៈពេលខ្លីអំឡុងពីរឆ្នាំបន្ទាប់ ការគំរាមកំហែងភាគច្រើនអាចពាក់ព័ន្ធនឹងជំងឺឆ្លង វិបត្តិជីវភាពការរស់នៅរបស់ប្រជាជន វិសមភាពបច្ចេកវិទ្យា និងការមិនពេញចិត្តរបស់ក្រុមយុវជនសម្រាប់សង្គម និងអនាគតរបស់ពួកគេ។ ចំពោះហានិភ័យរយៈពេលមធ្យម អំឡុងពីបីទៅប្រាំឆ្នាំខាងមុខ របាយការណ៍បានបង្ហាញអំពីលទ្ធភាព នៃការផ្ទុះឡើងវិបត្តិគម្លាតទ្រព្យសម្បត្តិ ការបែកបាក់ហេដ្ឋារចនាសម្ព័ន្ធព័ត៌មានវិទ្យា អស្ថិរភាពតម្លៃ និងវិបត្តិបំណុល។ ក្នុងរយៈពេលវែង របាយការណ៍បានសម្តែងការព្រួយបារម្ភអំពីការកើនឡើងនៃអាវុធបំផ្លិចបំផ្លាញលោកទ្រង់ទ្រាយធំ ការដួលរលំរដ្ឋាភិបាលនានា ការបាត់បង់ជីវចម្រុះ និងការជឿនលឿនផ្នែកបច្ចេកវិទ្យាអវិជ្ជមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ