ផ្សែងឧស្ម័នកាបូនិកដ៏ក្រាស់ នៅពីក្រោយឧស្សាហកម្មផលិតស៊ីម៉ង់ត៍ និងបេតុង
ចុះផ្សាយនៅថ្ងៃ៖
ស្តាប់ - ០៦:២៨
យោងតាមតួលេខ របស់សមាគមពិភពលោកនៃវិស័យស៊ីម៉ង់ត៍-បេតុង ដែលមានទីតាំងនៅទីក្រុងឡុងដ៍ គឺការផលិតស៊ីម៉ង់ត៍ ដើម្បីយកធ្វើបេតុង បានចូលរួមបញ្ចេញឧស្ម័នកាបូនិក ទៅក្នុងបរិយាកាស ក្នុងទំហំច្រើនបំផុត។ ជារួម បើវិស័យនេះជាប្រទេសមួយវិញ គឺបញ្ចេញឧស្ម័នកាបូនិកប្រចាំឆ្នាំរបស់វា ស្ថិតនៅលំដាប់ទី៣ បន្ទាប់ពីចិន និងសហរដ្ឋអាមេរិក។ ខណៈដែលពិភពលោក កំពុងប្រឹងប្រែងកាត់បន្ថយការបញ្ចេញឧស្ម័នកាបូនិក ដែលជាប្រភពនៃការកើនឡើងកំដៅផែនដី តែតម្រូវការស៊ីម៉ង់ និងបេតុង ក៏កាន់តែកើនខ្ពស់ដែរ ព្រោះការស្ថាបនាសាងសង់ត្រូវឆ្លើយតបទៅនឹងកំណើនប្រជាជន។
ស៊ីម៉ង់ត៍ គឺជាទំនិញសំណង់ ដែលគេប្រើប្រាស់ច្រើនជាងគេបំផុត។ ក្នុងមួយវិនាទី ស៊ីម៉ង់ត៍យ៉ាងហោច ១៥០តោន ត្រូវបានគេប្រើប្រាស់នៅទូទាំងពិភពលោក។ ហើយមួយឆ្នាំៗ បេតុងចំនួន១៤ពាន់លានម៉ែត្រគូប ត្រូវបានគេចាក់ ប្រើប្រាស់ក្នុងសំណង់ផ្សេងៗ។ នេះបើយោងតាមតួលេខ របស់សមាគមពិភពលោកនៃវិស័យស៊ីម៉ង់ត៍-បេតុង ហៅកាត់ថា GCCA។ ក្រុមហ៊ុនស៊ីម៉ង់-បេតុងធំៗ ដូចជា ក្រុមហ៊ុនស្វ៊ីស Holcim ក្រុមហ៊ុនមិចស៊ិក Cemex និងក្រុមហ៊ុនចិន CNBM គឺសុទ្ធតែជាសមាជិកនៃសមាគមនេះ។
ការផលិតស៊ីម៉ង់ត៍ បញ្ចេញឧស្ម័នកាបូនិក លើសវិស័យដឹកជញ្ជូនផ្លូវអាកាស៣ដង
ដើម្បីផលិតបេតុង គេត្រូវការស៊ីម៉ង់ត៍ជាចាំបាច់។ យោងតាមសមាគម GCCA ការផលិតស៊ីម៉ង់ បានបង្កជាការបញ្ចេញឧស្ម័នកាបូនិក CO2 ក្នុងទំហំ៧% នៃការទំហំឧស្ម័នកាបូនិកបញ្ចេញចោល ទាំងអស់នៅក្នុងបរិយាកាស។ ពោលគឺវិស័យផលិតស៊ីម៉ង់ត៍ បញ្ចេញឧស្ម័នកាបូនិក លើសវិស័យដឹកជញ្ជូនផ្លូវអាកាស ដល់ទៅ៣ដង។
ផ្អែកតាមលោកស្រី Valérie Masson-Delmotte អ្នកជំនាញអាកាសធាតុបុរេប្រវត្តិ របស់អង្គការសហប្រជាជាតិ ទំហំឧស្ម័នកាបូនិក បញ្ចេញចោលដោយវិស័យផលិតស៊ីម៉ង់ត៍ គឺមានច្រើនលើសការបញ្ចេញឧស្ម័នកាបូនិក របស់សហភាពអឺរ៉ុបទាំងមូល និងលើសប្រទេសឥណ្ឌា។ ពោលគឺក្រោមតែឧស្ម័នកាបូនិក បញ្ចេញចោលដោយប្រទេសចិន និងសហរដ្ឋអាមេរិក តែប៉ុណ្ណោះ។ ជាងនេះទៀត ទំនោរនៃការអភិវឌ្ឍន៍បច្ចុប្បន្ន ក្នុងវិស័យសំណង់ នៅអាស៊ី និងនៅអាហ្វ្រិកជាដើម គឺធ្វើឲ្យតម្រូវការស៊ីម៉ង់ត៍ កាន់តែកើនថែមទៀត ទៅថ្ងៃខាងមុខ។
ស៊ីម៉ង់ត៍ គឺជាសារធាតុកំបោរ clinker ផលិតចេញពីការផ្សំរវាង សារធាតុកំបោរ កាល់គែរ calcaire ជាមួយនឹងដីឥដ្ឋ argile។ គេយកធាតុទាំង២នេះទៅដុតស្លរ លាយបញ្ចូលគ្នា ក្នុងកំដៅ ប្រមាណ ១៤០០°C។ យោងតាមអ្នកជំនាញ ដើម្បីអាចផលិតបានស៊ីម៉ង់ត៍មួយតោន គឺមានឧស្ម័នកាបូនិកយ៉ាងហោចចំនួន១តោនដែរ ដែលត្រូវបញ្ចេញចោលក្នុងបរិយាកាស ដោយចំហេះដុតស្លរនេះ។ ប្រមាណ២០០ឆ្នាំមកហើយ ដែលគេបានស្រាវជ្រាវផលិតស៊ីម៉ង់ត៍ដោយរបៀបនេះ។ ហើយមកទល់បច្ចុប្បន្ន បច្ចេកទេសផលិតនេះ មិនបានប្រែប្រួល ប៉ុន្មាននោះទេ។
ធ្វើដូចម្តេច ដើម្បីកាត់បន្ថយការបញ្ចេញឧស្ម័នកាបូនិក?
ប្រឈមនឹងទំហំនៃការទទួលខុសត្រូវដ៏ធំ ក្នុងវិបត្តិអាកាសធាតុ បណ្តាលមកពីការកើនឡើងកំដៅផែនដី វិស័យផលិតស៊ីម៉ង់ត៍ និងបេតុង ធ្លាប់បានប្រកាសកាលពីឆ្នាំមុន ពីកម្មវត្ថុឈានទៅរកអព្យាក្រិត្យភាពកាបូន នៅឆ្នាំ២០៥០។ ហើយកាលពីដើមខែតុលាថ្មីៗនេះ ឧស្សាហកម្មនេះ បានប្រកាសប្រឹងប្រែងកាត់បន្ថយ ការបញ្ចេញឧស្ម័នកាបូនិក ចំនួន២៥% បន្ថែមទៀត ពីនេះដល់ឆ្នាំ២០៣០។ ពោលគឺ គេសន្យាថានឹងកាត់បន្ថយការបញ្ចេញឧស្ម័នកាបូនិក ចំនួន៥ពាន់លានតោនបន្ថែមទៀត។
វិស័យស៊ីម៉ង់ត៍ និងបេតុង ក៏បានផ្តើមផ្តោតការសង្ឃឹមផងដែរ ទៅលើការស្រាវជ្រាវបច្ចេកទេសថ្មីៗ តួយ៉ាង ដូចជាបច្ចេកទេសចាប់យកឧស្ម័នកាបូនិក និងស្តុកវាទុក កុំឲ្យវារសាត់ឡើងទៅក្នុងបរិយាកាស។ បើទោះបីបច្ចេកទេសនេះ ស្ថិតនៅក្នុងដំណាក់កាលសាកល្បងក៏ដោយ តែគេគ្រោងពង្រីកប្រើប្រាស់វាក្នុងទំហំធំ ទៅលើទីតាំងឧស្សាហកម្មចំនួន១០ ពីនេះដល់ឆ្នាំ២០៣០។ ការយកបេតុងចាស់ៗ មកកែច្នៃ ដើម្បីប្រើប្រាស់ឡើងវិញ ក៏ជាជម្រើសមួយដែរ ដើម្បីកាត់បន្ថយការផលិតស៊ីម៉ងត៍បន្ថែមទៀត។ បន្ថែមពីនេះ មានគំនិតថ្មីៗផ្សេងទៀត ក្នុងការប្តូរវត្ថុធាតុដើម ប្រភពថាមពលចាំបាច់ក្នុងការដុតចំហេះ ដោយប្តូរពីការដុតធ្យូងថ្ម ឬប្រេងម៉ាស៊ូត មកជាការដុតកំទេចឈើ ដែលប្រើការលែងកើត ឬម្សៅកាកសំណល់សត្វជាដើម ។ល។
ក្រុមហ៊ុនស៊ីម៉ង់ត៍ចិន CNBM បានអះអាងថា គេនឹងប្រឹងប្រែង ក្នុងការកាត់បន្ថយការបញ្ចេញឧស្ម័នកាបូនិក។ ក្រៅពីនេះ មានក្រុមហ៊ុនបច្ចេកវិទ្យា ថ្មីៗជាច្រើន ដែលបានចាប់ផ្តើមដំណើរការ លក់សេវានិងបច្ចេកទេស នៃការចាប់យក និងស្តុកទុកកាបូន ចេញពីរោងចក្រផលិតស៊ីម៉ង់ត៍។ ក្រុមហ៊ុនអាមេរិក Solidia មានបច្ចេកទេសចាប់ឧស្ម័នកាបូនិក និងយកវាទៅប្រើក្នុងការសម្ងួតបេតុង។ បច្ចេកវិទ្យានេះ មិនត្រឹមតែកាត់បន្ថយឧស្ម័នកាបូនិកទេ តែអាចកាត់បន្ថយការប្រើប្រាស់ទឹក ក្នុងការផលិតបេតុងថែមទៀតផង។ នៅកាណាដា ក្រុមហ៊ុន CarbonCure technologies បានស្រាវជ្រាវរកឃើញវិធី ធ្វើឲ្យឧស្ម័នកាបូនិក រលាយក្លាយជាធាតុរាវ ហើយបញ្ចូលវាទុកក្នុងបេតុងជារៀងដរាបតែម្តង។
"ស៊ីម៉ង់ត៍បៃតង"
ក្រៅពីបច្ចេកទេសទាំងអស់នេះ វិស័យឧស្សាហកម្មស៊ីម៉ង់ត៍ និងបេតុង ក៏ផ្តោតការយកចិត្តទុកដាក់ផងដែរ ទៅលើការស្រាវជ្រាវវិធីផលិត « ស៊ីម៉ង់ត៍បៃតង » ពោលគឺជាស៊ីម៉ង់ ដែលផ្សំឡើងពីសារធាតុដែលប្រើប្រាស់រួច ជំនួសឲ្យសារធាតុកំបោរ clinker។ នៅប្រទេសអង់គ្លេស ទំហំនៃការផលិតស៊ីម៉ង់ត៍ បានមកពីសារធាតុកែច្នៃរបៀបនេះ គឺមានទំហំស្មើនឹង ២៦%ហើយ។ នៅបារាំងវិញ កាលពីខែឧសភា អ្នកជំនាញនិងអាជ្ញាធរ ទើបតែបានស្ថាបនាស្តង់ដារគុណភាពថ្មី នៃស៊ីម៉ង់ត៍ ដែលផលិតឡើង ដោយបញ្ចេញឧស្ម័នកាបូនិកទាបបំផុត។
យ៉ាងណាក៏ដោយ សម្រាប់ដំណាក់កាលនេះ ស៊ីម៉ង់ត៍បៃតង ត្រូវបានផលិតឡើង តែក្នុងចំនោមក្រុមហ៊ុន start-up និងក្នុងបរិមាណតិចតួចប៉ុណ្ណោះ។ ចំណែកក្រុមហ៊ុនឧស្សាហកម្មស៊ីម៉ង់ត៍ធំៗ ការបង្វែរចង្កូត ទៅផលិតស៊ីម៉ង់ត៍បៃតង ហាក់មានការលំបាកបន្តិច ដោយសារតែមិនទាន់រួចដើម ពីការវិនិយោគហេដ្ឋារចនាសម្ព័ន្ធ នៅទីតាំងជីករ៉ែកំបោរ។
ដោយឡែក នៅបារាំង ក្រុមហ៊ុនផលិតស៊ីម៉ង់ត៍មួយ ឈ្មោះ Hoffmann Green Cement បានបោះជំហានគួរឲ្យកត់សំគាល់ ក្នុងវិស័យផលិតស៊ីម៉ង់ត៍ ច្នៃចេញពីកាកសំណល់ឧស្សាហកម្ម ដូចជាផុកដីឥដ្ឋ និងកាកសំណល់រោងចក្រស្លរដែក ឬក៏ផេះហុយចេញពីការដុត biomasse ជាដើម។ ថ្វីបើមានតម្លៃ ខ្ពស់ជាងស៊ីម៉ង់ត៍ធម្មតា ចំនួន២៥អឺរ៉ូ សម្រាប់បេតុងមួយម៉ែត្រការ៉េ តែក្រុមហ៊ុនវ័យក្មេងនេះ កំពុងទទួលការបញ្ជារទិញជាច្រើន និងទើបតែបានដាក់លក់ភាគហ៊ុននៅលើផ្សារហ៊ុនថែមទៀតផង។
ជារួម វិស័យឧស្សាហកម្មស៊ីម៉ង់ត៍ និង បេតុង មានជម្រើសគួរឲ្យចាប់អារម្មណ៍ជាច្រើន ដើម្បីកាត់បន្ថយការបញ្ចេញឧស្ម័នកាបូនិក និងឈានទៅសម្រេចកម្មវត្ថុអព្យាក្រិត្យកាបូន នៅឆ្នាំ២០៥០។ តែយ៉ាងណា លោកអគ្គលេខាធិការអង្គការសហប្រជាជាតិ បានលើកឡើងថា វាគឺជាការងារដ៏លំបាក និងតម្រូវឲ្យមានការប្រឹងប្រែងបំផុត ព្រោះថា ៣ភាគ៤ នៃសំណង់ហេដ្ឋារចនាសម្ព័ន្ធ នៅទូទាំងពិភពលោក នឹងត្រូវសាងសង់បន្ថែមទៀត ពីនេះរហូតដល់ឆ្នាំ ២០៥០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ