មេដឹកនាំពិភពលោកបានសន្យាធំលើបញ្ហាអាកាសធាតុ ប៉ុន្តែបន្ដធ្វើជាក់ស្ដែងតិចតួច
ចុះផ្សាយនៅថ្ងៃ៖
ស្តាប់ - ០៤:២០
យោងតាមការចេញផ្សាយរបស់កាសែត The Washington Post ពិភពលោកកំពុងប្រឈមមុខនឹងកម្ដៅផែនដីកើនឡើង ១,៥អង្សាសេ។ វាគឺជាកម្រិតនៃការកើនឡើងសីតុណ្ហភាពដែលមេដឹកនាំពិភពលោកធ្លាប់បាននិយាយថា ពួកគេនឹងព្យាយាមមិនឱ្យផែនដីឡើងកម្ដៅដល់កម្រិតនេះទេ។ ប៉ុន្តែ ការសន្យាដ៏ធំនេះមិនទាន់ក្លាយជាគោលនយោបាយអនុវត្តជាក់ស្ដែងនៅឡើយទេ។
បន្ទាប់ពីមេដឹកនាំពិភពលោកបានធ្វើការសន្យាដ៏ធំ ដើម្បីឈានទៅមុខលឿនជាងមុន ក្នុងការប្រយុទ្ធប្រឆាំងនឹងការប្រែប្រួលអាកាសធាតុ នៅក្នុងកិច្ចប្រជុំកំពូលស្ដីពីអាកាសធាតុ នៅស្កុតឡែន ឬគេស្គាល់ថាកិច្ចប្រជុំកំពូល COP26 គេសង្កេតឃើញថា ការសន្យាដ៏ធំនេះមិនទាន់ក្លាយជាគោលនយោបាយអនុវត្តជាក់ស្ដែងនៅឡើយនោះទេ។
ហេតុអ្វីការអនុវត្តតាមការសន្យាទាំងនោះមានសារសំខាន់ ហើយហេតុអ្វីបានជាវាពិបាកម្ល៉េះក្នុងការអនុវត្តជាក់ស្ដែង?
រលកកំដៅបានឆាបឆេះប្រទេសឥណ្ឌា និងប៉ាគីស្ថាន នៅរដូវក្ដៅឆ្នាំនេះ ហើយវាបានឆក់យកជីវិតមនុស្សរាប់លាននាក់។ រឿងនេះគួរតែធ្វើឱ្យពិភពលោកចាប់អារម្មណ៍លើបញ្ហាអាកាសធាតុ។ យ៉ាងណាមិញ វិបត្តិជំងឺកូវីដ១៩ សង្គ្រាមឈ្លានពានរបស់រុស្ស៊ីលើប្រទេសអ៊ុយក្រែន និងការឡើងថ្លៃថាមពល បានទាញយកការចាប់អារម្មណ៍ពីប្រមុខរដ្ឋពិភពលោកជាច្រើនឱ្យមើលរំលងបញ្ហាអាកាសធាតុ និងការសន្យារបស់ខ្លួន។
ហេតុការណ៍ទឹកជំនន់បានសម្លាប់មនុស្សរាប់រយនាក់នៅអាហ្រ្វិកខាងត្បូង។ វាជាមហន្តរាយដែលប្រធានាធិបតីរបស់ប្រទេសនេះបានស្តីបន្ទោសមួយផ្នែកលើការប្រែប្រួលអាកាសធាតុ។
អ្នកវិទ្យាសាស្ត្របានព្រមាននៅក្នុងរបាយការណ៍រាប់ពាន់ទំព័រ ដែលពន្យល់ព័ត៌មានលម្អិតដ៏គួរឱ្យសោកសង្រេង អំពីរបៀបដែលពិភពលោកនៅឆ្ងាយពីគោលដៅអាកាសធាតុរបស់ខ្លួន ហើយភាពអសកម្មទាំងនេះនឹងនាំឱ្យមានគ្រោះមហន្តរាយដ៏ធ្ងន់ធ្ងរ និងកាន់តែត្រូវចំណាយកាន់តែខ្ពស់ទៅៗ។
ពិភពលោកកំពុងប្រឈមមុខនឹងបញ្ហានៃការកើនឡើងកម្ដៅផែនដី ដែលមេដឹកនាំពិភពលោកបានសន្យាថានឹងព្យាយាមធ្វើយ៉ាងណាមិនឱ្យផែនដីឡើងកម្ដៅលើសពី ១,៥អង្សាសេ ប្រៀបធៀបស្ថានភាពកម្ដៅនៅក្នុងសម័យមុនបដិវត្តន៍ឧស្សាហកម្ម។
ផ្ទុយទៅវិញ បើសង្កេតមើលទៅលើសកម្មភាពអនុវត្តជាក់ស្ដែងដែលមេដឹកនាំពិភពលោកបានសន្យា គឺមានភាពយឺតយ៉ាវណាស់។
ការព្រួយបារម្ភក៏ពាក់ព័ន្ធថាតើប្រទេសនានាធ្វើយ៉ាងណាដើម្បីសម្រេចបាននូវគោលដៅនៃកិច្ចព្រមព្រៀងអាកាសធាតុទីក្រុងប៉ារីសឆ្នាំ២០១៥ផងដែរ។ ក្នុងនោះ មេដឹកនាំនៃបណ្ដាប្រទេសជាង២០០ បានសន្យាថានឹងរក្សាការឡើងកំដៅផែនដីនៅក្រោម ២អង្សាសេ ហើយកំណត់មិនឱ្យដល់១,៥អង្សាសេទេ ប្រសិនបើអាចធ្វើទៅបាន។
ក៏ប៉ុន្តែ តួលេខជាក់ស្ដែងបង្ហាញថា ពិភពលោកនៅតែស្ថិតក្នុងហានិភ័យនៃការកើនឡើងកម្ដៅហួសពីកម្រិតគោលដៅ ក្នុងរយៈពេលតិចជាងមួយទសវត្សរ៍ទៅថ្ងៃខាងមុខ។ តាមអត្រានៃការបំភាយឧស្ម័នបច្ចុប្បន្ន និងការវាយតម្លៃលម្អិតរបស់ស្ថាប័ន IPCC គេបានរកឃើញថា ពិភពលោកនឹងឡើងក្តៅខ្លាំង ក្នុងករណីមានកម្រិត "ថវិកាកាបូន" បែបនេះ ត្រឹមឆ្នាំ២០៣០។ ដូច្នេះ វាមានន័យថា គោលដៅរក្សាកម្ដៅមិនឱ្យបង្កើនបន្ថែមដល់១,៥អង្សាសេ គឺបរាជ័យ។ នាពេលបច្ចុប្បន្ន ពិភពលោកបានឡើងកំដៅប្រហែល១,២អង្សាសេរួចរាល់ហើយ។
ផ្អែកតាមអ្នកជំនាញ នាពេលបច្ចុប្បន្ននេះ វានៅតែអាចធ្វើទៅបាន តាមលក្ខណៈបច្ចេកទេស និងសូម្បីតែពិភពលោកអាចបន្ដឋិតថេរបាន សម្រាប់ប្រទេសនានាក្នុងការកាត់បន្ថយការបំពុលកាបូននៅត្រឹមកម្រិតគោលដៅ។ ក៏ប៉ុន្តែ ដើម្បីសម្រេចរឿងនេះបាន គេត្រូវធ្វើការផ្លាស់ប្ដូរឱ្យមានសកម្មភាពអនុវត្តជាក់ស្ដែងបន្ថែម។ នេះបើយោងតាមរបាយការណ៍ IPCC។
អង្គការឧតុនិយមពិភពលោកបានលើកឡើង កាលពីពេលថ្មីៗនេះថា សីតុណ្ហភាពជាមធ្យមរបស់ពិភពលោកអាចនឹងឆ្លងផុតកម្រិត១,៥អង្សាសេ ជាបណ្តោះអាសន្ន ក្នុងរយៈពេល៥ឆ្នាំខាងមុខ។ អង្គការ WMO បានរកឃើញថា មានឱកាស៥០ភាគរយនៃការកើនឡើងលើសពីកម្រិតនេះ នៅឆ្នាំ២០២៦ ទោះបីជាការកើនឡើងលើសពីកម្រិតកំណត់នេះ សម្រាប់រយៈពេលយូរជាងនេះ ទំនងជាអាចកើនឡើងទៅរួចកាន់តែខ្លាំង។
សរុបជារួម នៅពេលដែលមេដឹកនាំពិភពលោកបានសន្យាថានឹងពិនិត្យមើលឡើងវិញ និងពង្រឹងគោលដៅអាកាសធាតុរបស់ពួកគេ ក្នុងអំឡុងឆ្នាំ២០២២ គេសង្កេតឃើញថា គ្មានប្រទេសធំណាមួយដែលបានកំណត់ផែនការសកម្មភាពជាក់ស្ដែង នៅឆ្នាំនេះឡើយ។ ក៏គ្មានប្រទេសណាមួយបានប្តេជ្ញាធ្វើដូច្នេះទេ។ ដូច្នេះហើយ អ្នកជំនាញបានលើកឡើងថា បើគ្មានការបង្កើនសកម្មភាពជាក់ស្ដែងរបស់រដ្ឋាភិបាលពិភពលោកទេ នោះផែនដីនឹងធ្វើដំណើរឆ្ពោះទៅកាន់អនាគតនៃការកើនឡើងកម្ដៅ៣អង្សាសេ ហើយដែលវាមានកម្ដៅលើសពី ១,៥អង្សាសេទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ