អ្នកកាសែតផ្នែកបរិស្ថាន ទទួលរងការគំរាមកំហែងកាន់តែខ្លាំងឡើងៗ
ចុះផ្សាយនៅថ្ងៃ៖
ស្តាប់ - ០៥:០៧
អ្នកកាសែត ជាង ៥០ នាក់ត្រូវបាត់បង់អាយុជីវិត ក្នុងពេលបំពេញការងារ នៅឆ្នាំ២០២២។ នេះបើតាម អង្គការអ្នកកាសែតគ្មានព្រំដែន និង អង្គការយូណេស្កូ ដែលបានបញ្ជាក់ នៅក្នុងទិវាប្រយុទ្ធប្រឆាំងនឹងនិទ្ទណ្ឌភាពចំពោះឧក្រិដ្ឋកម្មលើអ្នកសារព័ត៌មាន នាថ្ងៃទី២វិច្ឆិកា។ នាប៉ុន្មានឆ្នាំចុងក្រោយនេះ អ្នកសារព័ត៌មានបាត់ខ្លួន គឺមានចំនួន ១១៨ នាក់ ហើយ អ្នកកាសែត ជាប់ក្នុងពន្ធនាគារ មានចំនួន ជាង ៥២០ នាក់ នៅទូទាំងពិភពលោក។ ឋិតក្នុងបរិបទអសុវត្ថិភាពបែបនេះ អ្នកកាសែតដែលធ្វើសេចក្តីរាយការណ៍ផ្នែកបរិស្ថាន ក៏ទទួលរងការគំរាមកំហែងកាន់តែខ្លាំងឡើងៗដែរ។
ខណៈពេលដែលសាធារណៈមតិជាទូទៅ មានស្មារតីយកចិត្តទុកដាក់ខ្លាំងពីវិស័យបរិស្ថាន ក្នុងរយៈ១ទសវត្សរ៍ចុងក្រោយ ការធ្វើសេចក្តីការណ៍ស្តីពីបរិស្ថានអាកាសធាតុ ក៏ហាក់មានសកម្មភាពផុសផុលច្រើនដែរ។ ក៏ប៉ុន្តែ ក្នុងរយៈពេល១០ឆ្នាំនេះ អ្នកកាសែតផ្នែកបរិស្ថាន នៅទូទាំងពិភពលោក ចំនួនយ៉ាងហោច ៣០ នាក់ ត្រូវគេសម្លាប់ផ្តាច់ជីវិត។
ករណីនៅប្រេស៊ីល ការផ្សាយព័ត៌មានបកអាក្រាតលាតត្រដាងបទល្មើសធនធានធម្មជាតិ គឺត្រូវគេសម្លាប់។ នៅថ្ងៃទី១៨មិថុនាកន្លងទៅ កម្លាំងប៉ូលិសប្រេស៊ីល បញ្ជាក់ពីមរណភាពរបស់អ្នកកាសែតអង់គ្លេស Dom Phillips និងការស្លាប់របស់ លោក Bruno Pereira អ្នកឯកទេសខាងជនជាតិដើមភាគតិច បន្ទាប់ពីបុរសទាំងពីរបានបាត់ខ្លួនស្ងាត់ដំណឹងជាងមួយសប្តាហ៍។ ពួកគេទាំងពីរបានចុះសង្កេតនិងស្រាវជ្រាវពីករណីនេសាទខុសច្បាប់នៅតំបន់ព្រៃអាម៉ាហ្សូន។
នៅឥណ្ឌា, អ្នកកាសែតជាតិឥណ្ឌាម្នាក់ ស្លាប់ ព្រោះតែត្រូវរងគ្រាប់កាំភ្លើង ចំនួន ៦ គ្រាប់ នៅពេលដែលអ្នកសារព័ត៌មានរូបនេះ ចុះស៊ើបអង្កេតនិងរាយការណ៍ព័ត៌មានពីករណីបូមខ្សាច់ខុសច្បាប់ពីសំណាក់ក្រុមឧក្រិដ្ឋជន-ម៉ាហ្វីយ៉ា។
នៅកូឡុំប៊ី អ្នកកាសែតពីរនាក់ ត្រូវគេសម្លាប់ផ្តាច់ជីវិត -ម្នាក់ឆ្នាំ២០១៧ និងម្នាក់ទៀត២០២០- ព្រោះតែអ្នកទាំងពីរបានរាយការណ៍ព័ត៌មានពីករណីរំលោភបំពានដីធ្លីរបស់សហគមន៍ជនជាតិភាគតិច ពីសំណាក់ក្រុមហ៊ុនឯកជន មានលុយហើយស្និទ្ធនឹងអ្នកមានអំណាច។
ករណីជាក់ស្តែងពីរបីនេះ តិចតួចនៅឡើយ គឺនៅមានឃាតកម្មលើអ្នកសារព័ត៌មានជាច្រើនទៀត ហើយបើតាមអង្គការអន្តរជាតិធ្វើការផ្នែកសិទ្ធិសេរីភាពសារព័ត៌មាន គឺបានបញ្ជាក់ថា ក្នុងចំណោមឃាតកម្មលើអ្នកកាសែត ប្រមាណជា៩០%នៃបទល្មើសឧក្រិដ្ឋកម្ម គឺមិនត្រូវទទួលផ្តន្ទាទោសនិងផ្តល់យុត្តិធម៌នៅឡើយទេ។
ក្រៅពីការសម្លាប់ផ្តាច់អាយុជីវិត, អ្នកជំនាញ Laurent Richard អ្នកកាសែតបារាំងនិងជាស្ថាបនិក សមាគមសារព័ត៌មាន (consortium Forbidden Stories) ក៏បានលើកឡើងពីករណីអ្នកកាសែតផ្នែកបរិស្ថាន ដែលជាញឹកញយ ត្រូវរងការគំរាមកំហែង ធ្វើទុក្ខបុកម្នេញ និងត្រូវចាប់ឃាត់ខ្លួនដាក់ក្រោយចម្រឹងដែក។ នេះក៏ព្រោះតែ ពួកគេទាំងនោះ ធ្វើប្រធានបទព័ត៌មាន ដែលរស៊ើបខ្លាំង និង ប្រឈមនឹងគ្រោះថ្នាក់ ដូចជាឧក្រិដ្ឋកម្មព្រៃឈើ និងបទល្មើសបរិស្ថានអាកាសធាតុ នេះតែម្តង។
ទន្ទឹមនឹងគ្នានេះដែរ នៅក្នុងបរិបទនៃការយកចិត្តទុកដាក់កាន់តែខ្លាំងចំពោះវិស័យបរិស្ថានអាកាសធាតុ ការចម្ចាត់អ្នកកាសែតចេញ គឺនឹងក្លាយជារឿងញឹកញយ និងក្លាយជាទំនោរមួយផង។ ដ្បិតថា ទន្ទឹមនឹងការប្រែប្រួលអាកាសធាតុក្តៅឡើងៗ ជម្លោះទំនាស់កាន់តែច្រើននិងក្តៅខ្លាំងដែរ រវាងក្រុមអ្នកសារព័ត៌មាន ក្រុមហ៊ុនបំផ្លាញបរិស្ថាន ហើយរដ្ឋអំណាចដែលមិនយកចិត្តទុកដាក់ពីបរិស្ថាន និងដែលបណ្តោយយកក្រុមហ៊ុនបន្តបំផ្លាញធម្មជាតិថែមទៀត។ ក្រុមអ្នកកាសែត ក៏កាន់តែចង្អុលបង្ហាញចំណុចអាក្រក់ទាំងនេះ កាន់តែច្រើន ហើយសេចក្តីរាយការណ៍នោះ ក៏កាន់តែទាញចំណាប់អារម្មណ៍មនុស្សទូទៅ។ ហេតុដូច្នេះហើយ ការប្រឈមមុខដាក់គ្នា រវាងអ្នកសារព័ត៌មាន ក្រុមហ៊ុនបំផ្លាញបរិស្ថាននិងរដ្ឋអំណាច ក៏កាន់តែមានសន្ទុះស្រួចខ្លាំង ហើយរឹងរឹតតែប៉ះទង្គិចគ្នាច្រើនឡើងៗ ចាប់ពីពេលនេះបន្តទៅប៉ុន្មានឆ្នាំខាងមុខទៀត។ នេះបើតាម អ្នកសារព័ត៌មានអង់គ្លេស Peter Schwartzstein ជាសមាជិកមជ្ឈមណ្ឌលស្រាវជ្រាវ Wilson Centre ។
អ្នកកាសែតជើងចាស់រូបនេះ បានរំលេចឲ្យដឹងដែរថា ក្រៅពីការលួចសម្លាប់បំបិតមាត់ គឺអ្នកសារព័ត៌មានមួយចំនួនផ្សេងទៀត ត្រូវចាប់ទោសអូសដំណើរតាមផ្លូវតុលាការ និងត្រូវចោទប្រកាន់ពីការផ្សាយព័ត៌មានមិនពិត និងបរិហារកេរ្តិ៍។ ករណីជាក់ស្តែង អ្នកកាសែតឥណ្ឌាជំនាញបរិស្ថានជាង៣០ឆ្នាំមកហើយ លោក Shailendra Yashwant ត្រូវតុលាការឥណ្ឌាចោទប្រកាន់ពីបទបរិហារកេរ្តិ៍។
ចំពោះរដ្ឋអំណាចនៃប្រទេសខ្លះ, អ្នកកាសែតរាយការណ៍ពីបរិស្ថាន គឺដូចជាបន្លាក្នុងកែវភ្នែកដូច្នេះដែរ។ អ្នកកាសែតប្រភេទនេះ ក៏ត្រូវចាត់ចូលជាក្រុមអ្នកប្រឆាំងនឹងអំណាច ពីព្រោះថា ការធ្វើព័ត៌មានពីបទល្មើសព្រៃឈើ ការរំលោភធនធានធម្មជាតិ បទឧក្រិដ្ឋបរិស្ថានអាកាសធាតុ គឺស្តែងពីភាពអសកម្មរបស់រដ្ឋអំណាច ឬក៏ស្តែងឲ្យឃើញត្រង់តែម្តង ពីការរួមផ្សំគំនិតរបស់អ្នកមានអំណាចក្នុងជួររដ្ឋាភិបាលណាមួយ ដែលចូលដៃជាមួយក្រុមហ៊ុនឯកជន ហើយបង្កវិនាសកម្មដល់ធម្មជាតិ។ ការផ្សព្វផ្សាយករណីរស៊ើបៗដូច្នេះ គឺបង្កឲ្យអស្ថិរភាពដល់អំណាច ហើយនិងអាចឈានដល់រង្គោះរង្គើរអំណាចផង ក៏អាចថាបាន។ អាស្រ័យដូច្នេះហើយ ទោះចង់មិនចង់ អ្នកសារព័ត៌មានផ្នែកបរិស្ថាន គឺជាមុខសញ្ញាមួយដែលត្រូវយកចិត្តទុកដាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ