អាមេរិក-កូរ៉េខាងជើង៖អ្វីទៅជាយុទ្ធសាស្រ្តរបស់លោកចូ បៃដិននៅចំពោះមុខលោកគីម ជុងអ៊ុន?
ចុះផ្សាយនៅថ្ងៃ៖
ស្តាប់ - ០៦:៥១
នៅអាមេរិក ប្រធានាធិបតីលោកចូ បៃដិនបានទទួលជួបប្រធានាធិបតីកូរ៉េខាងត្បូងលោកមូន ចៃអ៊ីននៅសេតវិមាននាថ្ងៃសុក្រ ទី២១ ឧសភា។ លោកមូន ចៃអ៊ីនជាមេដឹកនាំបរទេសទី២ ដែលលោកបៃដិនបានទទួលជួបផ្ទាល់នៅសេតវិមាន បន្ទាប់ពីនាយករដ្ឋមន្រ្តីជប៉ុន។ សំណុំរឿងនុយក្លេអ៊ែរកូរ៉េខាងជើងជាប្រធានបទសំខាន់នៅក្នុងជំនួបរវាងលោកបៃដិន និងលោកចៃអ៊ីន។ អ្វីដែលអាមេរិក និងកូរ៉េខាងត្បូងចង់បាន គឺឧបទ្វីបកូរ៉េគ្មាននុយក្លេអ៊ែរ និងមានសន្តិភាពយូរអង្វែង។ លោកបៃដិនក៏បានបញ្ជាក់ពីការត្រៀមខ្លួនដើម្បីជួបមេដឹកនាំកូរ៉េខាងជើងលោកគីម ជុងអ៊ុន តែជាជំនួបមានមានលក្ខខណ្ឌ។
ក្រោយការឡើងកាន់តំណែងប្រធានាធិបតីអាមេរិកជិតកន្លះឆ្នាំ លោកចូ បៃដិនហាក់នៅមិនទាន់បាននិយាយអ្វីច្រើនលើសំណុំរឿងនុយក្លេអ៊ែរកូរ៉េខាងជើងដ៏រសើបមួយនេះ។ តែនៅក្នុងជំនួបជាមួយប្រធានាធិបតីកូរ៉េខាងត្បូងលោកមូន ចៃអ៊ីននាថ្ងៃសុក្រ ទី២១ ឧសភានៅសេតវិមាន លោកបៃដិនបានបញ្ជាក់ច្បាស់ៗថា លោកនឹងមិនដើរតាមផ្លូវនយោបាយដែលត្រួសត្រាយដោយប្រធានាធិបតីអាមេរិកមុនៗទេ ពិសេសលោកដូណាល់ ត្រាំ និងលោកបារ៉ាក់ អូបាម៉ា។ នៅត្រង់ចំណុចនេះ លោកបៃដិនបានឆ្លៀតវាយប្រហារ រិះគន់លើនយោបាយរបស់លោកត្រាំដែលបានជួបមេដឹកនាំកូរ៉េខាងត្បូងលោកគីម ជុងអ៊ុនចំនួន ៣ដង គឺនៅសិង្ហបុរី នៅវៀតណាម និងនៅតំបន់គ្មានកងទ័ពជាប់ព្រំដែនខណ្ឌចែកទឹកដីកូរ៉េទាំងពីរ។
នៅក្នុងសន្និសីទកាសែតរួមជាមួយលោកចៃអ៊ីន លោកបៃដិនបានសង្កត់ធ្ងន់លើពីរចំណុច ទី១ លោកនឹងមិនផ្តល់ឲ្យលោកគីម ជុងអ៊ុននូវអ្វីដែលលោកគីមស្វែងរកទេ មានថា ការទទួលស្គាល់លើភាពស្របច្បាប់របស់កូរ៉េខាងជើងលើឆាកអន្តរជាតិ និងទី២ លោកបៃដិននឹងមិនបណ្តោយឲ្យមានការយល់ច្រឡំថា លោកគីមពិតជាមានឆន្ទៈក្នុងការដោះស្រាយបញ្ហា និងដែលតាមពិតទៅ គឺមិនមែនដូច្នេះឯណា។ ទោះជាយ៉ាងនេះក្តីលោកបៃដិនក៏បានបញ្ជាក់ពីការត្រៀមមានជំនួបទល់មុខគ្នាជាមួយលោកគីម ជុងអ៊ុន ប្រសិនបើលោកគីមយល់ព្រមជជែកពីបញ្ហានុយក្លេអ៊ែរពិតប្រាកដមែន។
ឃើញថានៅទីបំផុត យុទ្ធសាស្រ្តរបស់លោកបៃដិនចំពោះសំណុំរឿងកូរ៉េខាងជើងហាក់បន្តទូលំទូលាយច្រើនដោយបានត្រឹមអំពាវនាវឲ្យកាត់បន្ថយភាពតានតឹងនៅឧបទ្វីបកូរ៉េ និងចង់ឃើញឧបទ្វីបមួយនេះគ្មាននុយក្លេអ៊ែរ និងមានសន្តិភាពយូរអង្វែង។
តើជាកំហុសរបស់លោកមូន ចៃអ៊ីន?
គេមិនអាចទម្លាក់ការទទួលខុសត្រូវលើលោកមូន ចៃអ៊ីន ប្រសិនបើវិបត្តិនុយក្លេអ៊ែរកូរ៉េខាងជើងនៅមិនទាន់អាចដោះស្រាយបាន។ នៅក្នុងឆ្នាំចុងក្រោយនៃការកាន់អំណាចរបស់លោក លោកចៃអ៊ីនបានចាត់ទុកជារឿងបន្ទាន់បំផុតដែលលោកត្រូវខិតខំបន្ថែមទៀតដោយមិនបោះបង់ចោលទេ។ ចូរកុំភ្លេចថា លោកចៃអ៊ីនជាប្រធានាធិបតីកូរ៉េខាងត្បូងដែលបានប្តេជ្ញាចិត្តតាំងពីថ្ងៃឡើងកាន់អំណាចដោយប្រើធម៌ត្រជាក់ជាមួយមេដឹកនាំកូរ៉េខាងជើងលោកគីម ជុនអ៊ុន។ លោកមូន ចៃអ៊ីនបានជ្រើសយកផ្លូវចរចា និងការផ្សះផ្សារជាជាងផ្លូវប្រឈម និងការគំរាម សំឡុតប្រើកម្លាំងបាយ។
នយោបាយមួយនេះបានអនុញ្ញាតឲ្យលោកមូន ចៃអ៊ីនមានជំនួបកំពូលជាមួយលោកគីម ជុងអ៊ុនដល់ទៅ ៣ដងក្នុងរយៈពេលតែមួយឆ្នាំ ២០១៨។ លើសពីនេះ លោកមូន ចៃអ៊ីនជាអ្នករៀបចំឲ្យមានជំនួបកំពូលជាប្រវត្តិសាស្រ្តរវាងលោកគីម ជុងអ៊ុន និងអតីតប្រធានាធិបតីអាមេរិកលោកដូណាល់ ត្រាំដល់ទៅ ៣ដង។ នៅក្នុងសុន្ទរកថាក្នុងឆ្នាំទី៤ នៃការកាន់អំណាចរបស់លោកថ្លែងកាលពីថ្ងៃទី៩ ឧសភា លោកមូន ចៃអ៊ីនបានចាត់ទុកឆ្នាំចុងក្រោយនៃអាណត្តិរបស់លោកជាឱកាសចុងក្រោយនៃការប្តូរពីសន្តិភាពពាក់កណ្តាលទៅជាសន្តិភាពពេញលេញយូរអង្វែងនៅលើឧបទ្វីបកូរ៉េ។
ក្តីសង្ឃឹមនេះត្រូវបានលោកចៃអ៊ីនលើកយកទៅនិយាយជាមួយលោកបៃដិនដោយលោកសង្ឃឹមថា លោកបៃដិននឹងចូលរួមជួយដោះស្រាយវិបត្តិនុយក្លេអ៊ែរកូរ៉េខាងជើងកាន់តែច្រើនថែមទៀតនាពេលខាងមុខ។
កូរ៉េខាងជើង និងអាមេរិកបន្តមិនទុកចិត្តគ្នា
សំណុំរឿងនុយក្លេអ៊ែរកូរ៉េខាងជើងជាសំណុំរឿងដ៏ស្មុគស្មាញ អូសបន្លាយដែលអាស្រ័យលើកត្តាច្រើន ពិសេសគឺជំហររបស់អាមេរិក។ លោកមូន ចៃអ៊ីនបានដឹងច្បាស់ណាស់ថា បើទោះបីជានយោបាយជ្រើសយកផ្លូវចរចា និងការផ្សះផ្សាររបស់លោកចំពោះមេដឹកនាំកូរ៉េខាងជើងលោកគីម ជុងអ៊ុនបានហុចលទ្ធផលវិជ្ជមានក៏ដោយក៏វានៅមិនទាន់គ្រប់គ្រាន់ដើម្បីអាចឈានទៅមានសន្តិភាពយូរអង្វែង និងការរំសាយនុយក្លេអ៊ែរនៅឧបទ្វីបកូរ៉េបានដែរ។ គេបានសង្កេតឃើញថា សូម្បីនៅជំនាន់ប្រធានាធិបតីអាមេរិកលោកដូណាល់ ត្រាំក៏មានការផ្ទុះសង្រ្គាមពាក្យសម្តីរវាងលោកត្រាំ និងលោកគីម ជុងអ៊ុនដែរ នោះបើទោះបីជាឥស្សរជនទាំងពីរបានជួបគ្នាផ្ទាល់ដល់ ទៅ ៣ដងក៏ដោយ។
ក្នុងរយៈពេលប៉ុន្មានឆ្នាំចុងក្រោយនេះ ក្រុងព្យុងយ៉ាងថែមទាំងបានធ្វើការសាកល្បងនុយក្លេអ៊ែរ និងគ្រាប់មីស៊ីលបាលីស្ទិកប្រកបដោយជោគជ័យ។ គួរបញ្ជាក់ថាសម្រាប់ក្រុងព្យុងយ៉ាង នុយក្លេអ៊ែរ និងគ្រាប់មីស៊ីលជាអាយុជីវិតជាតិដែលមិនអាចបោះបង់ចោលងាយៗដោយគ្មានលក្ខខណ្ឌទេ។ លក្ខខណ្ឌនោះ គឺការលើកទណ្ឌកម្មអន្តរជាតិចេញវិញដោយមានការធានាពីអាមេរិក។ តែមកទល់ពេលនេះ ក្រុងវ៉ាស៊ីនតោន និងក្រុងព្យុងយ៉ាងនៅបន្តមិនទុកចិត្តគ្នា និងបន្តមើលបណ្តាំគ្នាទៅវិញ ទៅមក។ នៅម្ខាង ក្រុងព្យុងយ៉ាងទាមទារឲ្យក្រុងវ៉ាស៊ីនតោនដកទណ្ឌកម្មមុនទើបខ្លួនរំសាយនុយក្លេអ៊ែរ។ នៅម្ខាងទៀត ក្រុងវ៉ាស៊ីនតោនទាមទារឲ្យក្រុងព្យុងយ៉ាងរំសាយនុយក្លេអ៊ែរមុនទើបខ្លួនដកទណ្ឌកម្ម។ ដរាបណាភាពមិនទុកចិត្តគ្នានេះនៅបន្ត ប្រហែលគ្មានថ្ងៃបិទបញ្ចប់សំណុំរឿងនុយក្លេអ៊ែរកូរ៉េខាងជើងនាពេលឆាប់ៗខាងមុខទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ