ចិនដោះលែងជនជាតិកាណាដាពីរនាក់ក្រោយនាយកប្រតិបត្តិHuaweiត្រូវបានដោះលែងនៅកាណាដា
ចុះផ្សាយនៅថ្ងៃ៖
ស្តាប់ - ០៦:៥៤
ចិនបានសម្រេចដោះលែងជនជាតិកាណាដាពីរនាក់ពីពន្ធនាគារកាលពីថ្ងៃសុក្រ ២៤ កញ្ញាម្សិលមិញ។ ចំណាត់ការរបស់អាជ្ញាធរចិននេះធ្លាក់មក នៅប៉ុន្មានម៉ោងបន្ទាប់ពីនាយកប្រតិបត្តិក្រុមហ៊ុន Huawei លោកស្រី ម៉េង វ៉ាន់ចូវ ត្រូវបានដោះលែងនៅកាណាដា។ ការណ៍នេះនាំឲ្យគេគិតថាជម្លោះការទូតដ៏ជូរចត់រយៈពេល ៣ឆ្នាំ រវាងក្រុងប៉េកាំង និងអូតាវ៉ា និងវ៉ាស៊ីនតោនទាក់ទងសំណុំរឿងក្រុមហ៊ុន Huawei ទំនងជាត្រូវបិទបញ្ចប់ហើយ។
ទំនាក់ទំនងរវាងប្រទេសចិន ជាមួយកាណាដា និងសហរដ្ឋអាមេរិក ត្រូវបានបំពុលរយៈពេលប្រមាណជា៣ឆ្នាំមកហើយ ដោយសារតែសំណុំរឿងក្រុមហ៊ុនទូរគមនាគមន៍យក្សចិន Huawei។ ដំបូងឡើយ វាកើតចេញពីការចាប់ខ្លួនលោក ស្រី ម៉េង វ៉ាន់ចូវ ពីសំណាក់អាជ្ញាធរកាដាណា ទៅតាមសំណើរបស់អាមេរិក។ អាមេរិកដែលបានចោទប្រកាន់ក្រុមហ៊ុន Huawei ពីបទប៉ុនប៉ងរំលោភទណ្ឌកម្មអាមេរិកលើអ៊ីរ៉ង់ និងលួចបច្ចេកវិទ្យាពីក្រុមហ៊ុនអាមេរិក។
មានវ័យ ៤៩ឆ្នាំ លោកស្រីវ៉ាន់ចូវ ត្រូវបានក្រុងវ៉ាស៊ីនតោនចោទថា បានលួចលាក់រំលោភវិធានការដាក់ទណ្ឌកម្មរបស់អាមេរិកទៅលើអ៊ីរ៉ង់ តាមរយៈក្រុមហ៊ុនហុងកុងមួយដែលជាក្រុមហ៊ុនបុត្រសម្ព័ន្ធរបស់ Huawei ឈ្មោះ Skycom ដែលបានលក់ឧបករណ៍ទូរគមនាគមន៍ទៅឲ្យប្រទេសអ៊ីរ៉ង់។
លោកស្រី ម៉េង វ៉ាន់ចូវ ដែលជាប្រធានគ្រប់គ្រងផ្នែកហិរញ្ញវត្ថុ ជាអនុប្រធានក្រុមប្រឹក្សាភិបាល និងជាកូនស្រីមហាសេដ្ឋីស្ថាបនិកក្រុមហ៊ុន Huawei ផងនោះ ត្រូវបានចាប់ខ្លួន កាលពីថ្ងៃទី១ ខែធ្នូ ឆ្នាំ ២០១៨ នៅពេលដែលលោកស្រីធ្វើដំណើរឆ្លងកាត់ប្រទេសកាណាដា។
រយៈពេល ៩ ថ្ងៃ បន្ទាប់ពីការចាប់ខ្លួនលោកស្រី វ៉ាន់ចូវ ពោលគឺនៅថ្ងៃទី ១០ ធ្នូ ឆ្នាំ ២០១៨ អាជ្ញាធរចិន បានចាប់ខ្លួនជនជាតិកាណាដាពីរនាក់ គឺ លោក Michael Kovrig អតីតអ្នកការទូតបម្រើការឲ្យអង្គការវិភាគនយោបាយ International Crisis Group និងម្នាក់ទៀតគឺលោក Michael Spavor ដែលជាអ្នកធ្លាប់ផ្តល់ប្រឹក្សាទំនាក់ទំនងជាមួយកូរ៉េខាងជើង។
បណ្តាប្រទេសលោកខាងលិចបានចោទចិនថាចាប់ជនជាតិកាណាដា ធ្វើជាចំណាប់ខ្មាំងកាទូត។ តែចិនកាលណោះបានឆ្លើយតបវិញថា ជនជាតិកាណាដាទាំងពីរនាក់ត្រូវបានចាប់ខ្លួនពីបទចារកម្មដែលធ្វើឲ្យប៉ះពាល់ដល់សន្តិសុខចិន ហើយនេះមិនមែនជាសងសឹកកាណាដា និងយកពួកគេទាំងពីរជាកំណាប់ខ្មាំងកាទូតឲ្យកាណាដាដោះលែងលោកស្រី ម៉េង វ៉ាន់ចូវ ប្រធានផ្នែកហិរញ្ញវត្ថុរបស់ក្រុមហ៊ុន Huawei ឡើយ។
ហេតុអ្វីកាណាដាសម្រេចដោះលែង លោក ស្រី ម៉េង វ៉ាន់ចូវនៅពេលនេះ?
ចំណាយពេលប្រមាណជា ៣ ឆ្នាំ ជាប់ឃុំខ្លួននៅក្នុងផ្ទះឯប្រទេសកាណាដា នាយកប្រតិបត្តិក្រុមហ៊ុន Huawei លោកស្រី ម៉េង វ៉ាន់ចូវ ដែលតស៊ូប្រឆាំងនឹងការធ្វើបត្យាប័នទៅសហរដ្ឋអាមេរិកនៅទីបំផុត ត្រូវបានដោះលែងកាលពីថ្ងៃសុក្រ ២៤ កញ្ញាម្សិលមិញ។
ការដោះលែងនេះបានកើតឡើង នៅប៉ុន្មានម៉ោងប៉ណ្ណោះបន្ទាប់ពីរដ្ឋអាជ្ញាអាមេរិកបានប្រកាសពីកិច្ចព្រមព្រៀងមួយដែលថាការចោទប្រកាន់ប្រឆាំងនឹងលោកស្រី ម៉េង វ៉ាន់ចូវពីបទឆបោក នឹងត្រូវព្យួរហើយនៅទីបំផុតការចោទេប្រកាន់នេះ អាចត្រូវទម្លាក់ចោលទៀតក៏ថាបាន។
តាមរយៈការចរចាគ្នា លោកស្រី វ៉ាន់ចូវ និងរដ្ឋអាជ្ញាអាមេរិក យល់ព្រមព្រៀងគ្នា ថានឹងពន្យារគ្រប់ការចោទប្រកាន់រហូតដល់ចុងឆ្នាំ ២០២២ ហើយរដ្ឋអាជ្ញាអាមេរិក ទំនងជាអាចនឹងទម្លាក់បទចោទប្រកាន់ប្រឆាំងលោកស្រីផងដែរ ប្រសិនបើលោកស្រីគោរពេតាមខ្ជាប់ខ្ជួន នូវកិច្ចព្រមព្រៀងដែលធ្វើនឹងគ្នានោះ។
ក្រោយរដ្ឋអាជ្ញាអាមេរិក ប្រកាសពន្យាររាល់ការចោទប្រកាន់ លោកស្រី ម៉េង វ៉ាន់ចូវ ត្រូវបានដោះលែងនៅកាណាដាភ្លាម។ នៅថ្ងៃដដែលនោះ លោកស្រី បានជិះយន្តហោះចេញពីទីក្រុង Vancouver ប្រទេសកាណាដា ទៅកាន់ទីក្រុង Shenzhen ប្រទេសចិនវិញតែម្តង។
មុនពេលចាកចេញពីប្រទេសកាណាដា លោកស្រី វ៉ាន់ចូវ បានប្រាប់ទៅក្រុមអ្នកយកព័ត៌មានថា រយៈពេលបីឆ្នាំមកនេះ ជីវិតរបស់លោកស្រីវិលក្រឡាប់ចាក់អស់។ វាជាពេលវេលាដ៏លំបាក និងជាវេលាផ្តល់បទពិសោធន៍សម្រាប់លោកស្រី ក្នុងនាមជាម្តាយ ជាប្រពន្ធ និងជានាយកប្រតិបត្តិក្រុមហ៊ុនមួយ។
ក្រោយមកទៀត លោកស្រីក៏បានបង្ហោះសារ នៅលើបណ្តាញសង្គមចិនពីលើយន្តហោះ ដោយបានអរគុណ ចំពោះរដ្ឋាភិបាលក្រុងប៉េកាំងដែលលោកស្រី ចាត់ទុកថា ជាអ្នកបានជួយជ្រោមជ្រែងសង្គ្រោះឲ្យលោកស្រីមានសេរីភាពអាចត្រលប់ទៅផ្ទះនៅចិនវិញ។
ប៉ុន្មានម៉ោងក្រោយមក នាយករដ្ឋមន្ត្រីកាណាដាលោកហ្សូសស្តាំង ទ្រុយដូ បានប្រកាសថា ជនជាតិកាណាដាពីរនាក់គឺ លោក Michael Kovrig និង លោក Michael Spavor ដែលជាប់ឃុំខ្លួននៅចិន ត្រូវបានដោះលែងដែរ និងកំពុងធ្វើដំណើរត្រលប់មកប្រទេសកាណដាវិញហើយ។
នៅឯសន្តិសីទក្នុងទីក្រុង អូតាវ៉ា លោកទ្រុយដូ បានឲ្យដឹងថាយន្តហោះរបស់ពួកគេទាំងពីរនឹងចុះចតជាន់ដីកាណាដានៅថ្ងៃសៅរ៍នេះ ប្រសិនបើគ្មានបញ្ហាអ្វីកើតឡើងនោះជាយថាហេតុទេនោះ។
ទំនាក់ទំនងរវាងប្រទេសលោកខាងលិច និងចិន
ជម្លោះការទូតដ៏ជូរចត់រវាងចិន ជាមួយកាណាដា និងសហរដ្ឋអាមេរិក ទាក់ទងសំណុំរឿងក្រុមហ៊ុន Huawei ហាក់ដូចជាត្រូវបានបញ្ចប់ហើយ ក្រោយការដោះលែងជនជាតិកាណាដាពីរនាក់ដែលត្រូវបានធ្វើឡើងនៅទឹកដីចិន និងនាយកប្រតិបត្តិក្រុមហ៊ុនបច្ចេកវិទ្យាចិននៅឯកាណាដា។
ជនជាតិរបស់ប្រទេសទាំងពីរ ត្រូវបានដោះលែងទាំងសងខាង ដូច្នោះទំនាក់ទំនងរវាង កាណាដា និងចិន ក៏គ្មានអ្វីដែលអាចបំពុលឲ្យអាក្រក់ខ្លាំងនឹងគ្នាដូចពីមុនទៀតនោះទេ។ នេះបើតាមអ្នកជំនាញ។
ជាចុងបញ្ចប់នេះ គួរកត់សម្គាល់ថា ការដោះលែងជនជាតិកាដាណាពីសំណាក់អាជ្ញាធរចិន និងការដោះលែងនាយកប្រតិបត្តិក្រុមហ៊ុនHuawei ក្នុងប្រទេសកាណាដា បានកើតឡើង នៅចំពេលដែលប្រធានាធិបតីអាមេរិក លោក ចូបៃ ដិន និងសមភាគីចិនលោកស៊ីជីន ពីង បានព្យាយាមកាត់បន្ថយភាពតានតឹងនឹងគ្នាលើបញ្ហាជាច្រើន។
ជាក់ស្តែង នៅក្នុងឱកាសមហាសន្និបាតអង្គការសហប្រជាជាតិក្នុងសប្តាហ៍នេះ បើទោះបីជាមានការខ្វែងគំនិតគ្នាជាមួយចិនលើរឿងជាច្រើនដូចជា បញ្ហាសន្តិសុខតាមអ៊ីនធ័រនែត ការប្រែប្រួលអាកាសធាតុ បញ្ហាសិទ្ធិមនុស្ស និងបញ្ហាពាណិជ្ជកម្មជាដើមក្តី លោកបៃដិន បានមានប្រសាសន៍ថា សហរដ្ឋអាមេរិក គ្មានចេតនាចង់ផ្តើមសង្គ្រាមត្រជាក់ថ្មីនោះទេ។ ចំណែកប្រធានាធិបតីចិន លោកស៊ី ជីន ពីង បាននិយាយប្រាប់ទៅមេដឹកនាំពិភពលោកថា ជម្លោះរវាងប្រទេសនិងប្រទេស ចាំបាច់ត្រូវដោះស្រាយតាមរយៈការសន្ទនា និងកិច្ចសហប្រតិបត្តិការនឹងគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ