បក្សប្រជាធិបតេយ្យហុងកុងត្រូវបានរំលាយចោល ក្រោយសភាចិនអនុម័តច្បាប់សន្តិសុខជាតិ
ចុះផ្សាយនៅថ្ងៃ៖
ស្តាប់ - ០៩:០៣
នៅថ្ងៃអង្គារទី៣០មិថុនា សភាប្រជាមានិតចិនប៉េកាំង បានសម្រេចអនុម័តច្បាប់សន្តិសុខជាតិ ដ៏ចម្រូងចម្រាសបំផុតនៅហុងកុង។ ច្បាប់សន្តិសុខជាតិ ដែលសកម្មជនប្រជាធិបតេយ្យហុងកុង បានចាត់ទុកថា គឺជាឧបករណ៍ ដើម្បីបំបិទសិទ្ធិសេរីភាពបញ្ចេញមតិ និងសិទ្ធិនយោបាយ របស់ប្រជាជនហុងកុង។ ប៉ុន្មានម៉ោង ក្រោយការអនុម័តច្បាប់នេះជាផ្លូវការ យុវជនដែលជាមេសកម្មជននយោបាយ របស់គណបក្សប្រជាធិបតេយ្យហុងកុង ចំនួន៤នាក់ បានលាឈប់ពីគណបក្សនេះ ហើយបន្តិចក្រោយមក គណបក្សនេះ ក៏ត្រូវបានគេប្រកាសរំលាយចោលតែម្តង។
កាលពីថ្ងៃអាទិត្យ ច្បាប់នេះ ត្រូវបានគេប្រគល់ជូនទៅគណកម្មាធិការអចិន្ត្រៃយ៍នៃសភាប្រជាមានិតចិន យកទៅពិនិត្យ។ ការបោះឆ្នោតសម្រេច បានធ្វើទៅនៅថ្ងៃអង្គារ ទី៣០មិថុនានេះ។ ហើយភ្លាមៗនោះ លោកប្រធានាធិបតី ចិនស៊ី ជីនពីង បានចុះហត្ថលេខាប្រកាសចូលជាធរមាន។ នេះបើផ្អែកតាមការចុះផ្សាយ របស់ទីភ្នាក់ងារព័ត៌មានចិន Xinhua ។
ដំណឹងនៃការបោះឆ្នោតអនុម័តច្បាប់សន្តិសុខជាតិនេះ ហាក់បីដូចជាខ្យល់ព្យុះកំបុតត្បូងបោកបក់មកលើដែនដីហុងកុង។ បណ្តាញសារព័ត៌មានហុងកុងគ្រប់ៗគ្នា តួយ៉ាង កាសែត China Morning Post បានចុះផ្សាយដំណឹងនេះ ដោយបានស្រង់ប្រភពដែលស្និទបំផុត ជាមួយនឹងគណបក្សកុម្មុយនិស្តចិន។ គណបក្សនយោបាយហុងកុង ដែលមានទំនោរគាំទ្រចិន ក៏បានចេញសេចក្តីថ្លែងការ អបអរ ចំពោះការអនុម័តច្បាប់នេះដែរ។
ពង្រឹងសន្តិសុខជាតិ ឬ សង្កត់កអ្នកប្រឆាំង?
ទាក់ទិននឹងខ្លឹមសារលំអិតរបស់ច្បាប់នេះវិញ គឺខាងភាគីចិន នៅតែលាក់នៅឡើយ មិនទាន់ផ្សព្វផ្សាយទេ។ តែយ៉ាងណា កាលពីដើមខែមិថុនានេះ បណ្តាញព័ត៌មានផ្លូវការចិន Xinhua បានចុះផ្សាយពីខ្លឹមសារគោលៗ នៃច្បាប់ដ៏ចម្រូងចម្រាសមួយនេះ។ ខ្លឹមសារសំខាន់របស់ច្បាប់នេះ គឺធ្វើការប្រយុទ្ធប្រឆាំង បង្រ្កាបនូវសកម្មភាពបះបោរ អំពើភេរវកម្ម សកម្មភាពវិទ្ធង្សនា និងការឃុបឃិតជាមួយកម្លាំងបរទេសណាមួយ។ ច្បាប់នេះ ក៏បានបង្កើតឲ្យមាន អង្គភាពពិសេសមួយស្ថិតនៅក្រោមការបញ្ជាដោយផ្ទាល់ពីប៉េកាំង ដើម្បីតាមដាន ស៊ើបអង្កេត និងឃ្លាំមមើលការគោរពច្បាប់នេះ នៅក្នុងតំបន់ហុងកុង។
សម្រាប់រដ្ឋាភិបាលប៉េកាំង ច្បាប់នេះនឹងធានាការពារស្ថិរភាព អធិបតេយ្យភាពរបស់ដែនដីចិនទាំងមូល ហើយនឹងបិទបញ្ចប់សកម្មភាពបាតុកម្មហិង្សា វាយបំផ្លិចបំផ្លាញទ្រព្យសម្បត្តិឯកជននិងសាធារណៈនៅហុងកុង។ ក៏ប៉ុន្តែសម្រាប់ចលនាប្រជាធិបតេយ្យហុងកុងវិញ ច្បាប់នេះគឺជាឧបករណ៍មកសង្កត់ក ប្រជាជនហុងកុង ហើយលែងតវ៉ា រិះគន់ ឬមានមតិអ្វីទាំងអស់។
លោក Joshua Wong សកម្មជនប្រជាធិបតេយ្យដ៏ល្បីម្នាក់ បានសរសេរលើទំព័រ Twitter នៅថ្ងៃនេះថា “ចប់ហើយ ហុងកុងដែលពិភពលោកធ្លាប់ស្គាល់ គឺត្រូវស្លាប់នៅថ្ងៃនេះហើយ ដែលដីនេះ នឹងក្លាយជាដែនដីស្ថិតក្រោមការឈ្លបតាមដាន កៀបសង្កត់របស់នគរបាលសំងាត់ចិនប៉េកាំង”។
គណបក្ស Demosisto ប្រកាសរំលាយចោល
លោក Joshua Wong ព្រមទាំងសកម្មជនប្រជាធិបតេយ្យ ៣នាក់ទៀត គឺ Nathan Law Jeffrey Ngo និង Agnes Chow ដែលជាមេចលនាប្រជាធិបតេយ្យរបស់គណបក្ស Demosisto បាន ប្រកាសលាឈប់ពីបក្សនេះ។ តែអ្នកទាំង៤ បានអះអាងថា ពួកគេនឹងនៅតែបន្ត ធ្វើការតស៊ូមតិ តទៅទៀត ជាលក្ខណៈផ្ទាល់ខ្លួន។ ការលាឈប់នេះ គឺដើម្បីការពារគណបក្ស Demosisto ពីការប្តឹងចាប់ទោសអូសដំណើរណាមួយ ជាមួយនឹងការចូលជាធរមាន នៃច្បាប់សន្តិសុខជាតិជាតិនេះ។ តែទីបំផុតទៅ ប្រហែលជា២ម៉ោងក្រោយមក ថ្នាក់ដឹកនាំគណបក្ស Demosisto ដែលបានចាប់បដិសន្ធិ កាលពីពេលបាតុកម្មឆ័ត្រលឿងឆ្នាំ២០១៤នេះ បានសម្រេចរំលាយខ្លួនចោលតែម្តង។
សួរថា តើអនាគតនៃចលនាប្រជាធិបតេយ្យរបស់យុវជនហុងកុងនេះ នឹងមានវាសនាបែបណា ចាប់ពីពេលនេះទៅ? ចម្លើយនោះគឺថា ចលនានេះប្រាកដជាជួបឧបសគ្គច្រើនណាស់។ តើការតវ៉ានឹងលែងមានទៀតចាប់ពីពេលនេះទៅ ? គឺយើងពិបាកស្មានដែរ។ អ្វីៗវាអាស្រ័យថាតើប្រជាជនហុងកុង ប្រមាណជាង៧លាននាក់នោះ សុខចិត្តទទួលយកស្ថានការណ៍នេះដែរ ឬទេ? តើសុខចិត្តបិទភ្នែកខាំមាត់សង្កត់ចិត្ត មិនធ្វើអ្វីសោះ ឬក៏ចេញធ្វើបាតុកម្មតវ៉ា។ បើចេញធ្វើបាតុកម្ម តើហ៊ានយកអាយុជីវិត និងវាសនាផ្ទាល់ខ្លួនម្នាក់ៗ ទៅប្តូរដែរឬទេ? សម្រាប់ពេលនេះ ការជួបជុំគ្នានៅទីសាធារណៈ ចាប់ពី៥០នាក់ទៅ គឺនៅតែត្រូវហាមឃាត់នៅឡើយទេ ដោយសារតែបញ្ហាកូវីដ១៩។ ដូច្នេះបើមានបាតុកម្ម គឺថាសមត្ថកិច្ចហុងកុង ប្រាកដជាប្រើកម្លាំងបង្ក្រាបយ៉ាងចាស់ដៃមិនខានទេ។
ទោះយ៉ាងនេះក្តី លោក Joshua Wong បានអះអាងថា ល្គឹកណាលោកនៅមានជីវិត ហើយគេមិនទាន់កម្ចាត់លោកចោល ពីផែនដីនេះទេ គឺលោកនឹងនៅតែបន្ត តស៊ូការពារផ្ទះ ស្រុកកំណើតរបស់លោក ដែលមានឈ្មោះថា ហុងកុង ជានិច្ច។
លោកស្រីការី ឡាំ៖ “សូមគោរពសិទ្ធិរបស់ចិន ក្នុងការមានច្បាប់ការពារសន្តិសុខជាតិខ្លួនផង”
ដោយឡែក នៅថ្ងៃនេះដែរ លោកស្រី ការី ឡាំ ប្រមុខរដ្ឋាភិបាលហុងកុង បានថ្លែងសារ តាមប្រព័ន្ធ Visio conference ជាមួយនឹងឧត្តមស្នងការសិទ្ធិមនុស្ស នៃអង្គការសហប្រជាជាតិ ដោយលោកស្រីបានយកឱកាសនេះ ថ្លែងការពារច្បាប់សន្តិសុខជាតិ ដែលចិនទើបតែបានអនុម័តជាផ្លូវការ។ លោកស្រីលើកឡើងថា៖ “សូមសហគមអន្តរជាតិទាំងអស់ មេត្តាគោរពសិទ្ធិរបស់ប្រទេសចិន ក្នុងការមានច្បាប់ ដែលអាចធានាការពារសន្តិសុខជាតិផង។ សូមសហគមអន្តរជាតិ គោរពបំណងប្រាថ្នារបស់ប្រជាជនហុកុង ដែលចង់បានស្ថិរភាព ភាពសុខដុមរមនា របស់ប្រជាជនហុងកុងផង”។ លោកស្រីបានឆ្លើយតបបន្ថែមថា៖ “គ្រប់ប្រទេសដែលរិះគន់ចិន សុទ្ធតែមានច្បាប់ការពារសន្តិសុខជាតិ រៀងៗខ្លួនដើរទេតើ ហើយហេតុអ្វីបានជាមកហាមចិន មិនឲ្យមាន”។
លោកស្រីការី ឡាំបន្តថា ដើម្បីប្រយោជន៍របស់ប្រជាជនហុងកុង ក៏ដូចជាប្រជាជនចិនទាំងមូល គឺមិនអាចទុកតំបន់នេះ ជារណ្តៅខ្មៅ គ្មានច្បាប់គ្រប់គ្រងឡើយ។ ប្រមាណ១ឆ្នាំមកនេះ ហុងកុងជួយបញ្ហាហិង្សា អាណាធិបតេយ្យជាខ្លាំង ដូច្នេះជារឿងបន្ទាន់បំផុត ដែលត្រូវមានច្បាប់ចាត់ចែង។ លោកស្រី សង្កត់ធ្ងន់ថា មួយវិញទៀត ច្បាប់សន្តិសុខជាតិនេះ គឺវា សំដៅតែទៅលើជនមួយក្តាប់តូច ដែលធ្វើបំពានច្បាប់តែប៉ុណ្ណោះ ចំណែកសិទ្ធិជាមូលដ្ឋានរបស់ប្រជាជនហុងកុងភាគច្រើនឯទៀត គឺនៅតែដដែលទេ គ្មានអ្វីប្រែប្រូលឡើយ។ លោកស្រីក៏បានធានាដែរ ថាច្បាប់នេះគ្មានសុពលភាព បកក្រោយទេ ហើយក៏មិនមកបំផ្លាញឯករាជ្យភាពនៃស្ថាប័នតុលាការហុងកុងដែរ។
អឺរ៉ុបថា៖ "ចិននឹងខាតបង់ធ្ងន់"
ដូចយើងដឹងកន្លងមកហើយ ថាប្រទេសលោកខាងលិច មានសហភាពអឺរ៉ុប អង់គ្លេស និងសហរដ្ឋអាមេរិកជាដើម បានអំពាវនាវច្រើនលើកច្រើនសារ ឲ្យចិនលប់ចោលនូវគម្រោងច្បាប់សន្តិសុខជាតិនេះ។ អាមេរិក បានដំឡើងសម្លេងខ្លាំងជាងគេ។ រដ្ឋាភិបាលលោកដូណាល់ត្រាំ បានដាក់ចុះនូវទណ្ឌកម្មមួយចំនួន ដើម្បីដាក់សំពាធលើចិន ដូចជា បិទទិដ្ឋាកា មិនឲ្យសមាជិកបក្សកុម្មុយនិស្តចិន ទៅសហរដ្ឋអាមេរិក។
កាលពីថ្ងៃទី២៩មិថុនា លោកម៉ៃឃ៍ ប៉ុមប៉េអូ បានប្រកាសថា អាមេរិក និងបិទឈប់ឲ្យនាំចេញនូវសម្ភារៈអាវុធ និងទំនិញសម្ភារៈបច្ចេកវិទ្យាចាំបាច់ ក្នុងវិស័យការពារជាតិ ទៅឲ្យចិន និងហុងកុងទៀតហើយ។ ប្រមុខការទូតអាមេរិក ក៏អះអាងដែរ ថាអាមេរិក កំពុងរៀបចំទណ្ឌកម្មផ្សេងទៀត ដាក់ទៅលើចិន។ ចិនបានឆ្លើយតបវិញ តាមរយៈការបិទទិដ្ឋាកា ទៅលើជនជាតិអាមេរិកណា ដែលហ៊ាននិយាយរិះគន់ រឿងច្បាប់សន្តិសុខជាតិនៅហុងកុងនេះ។
ចំណែកសហភាពអឺរ៉ុបវិញ នៅថ្ងៃទី៣០មិថុនា ក្រោយដឹងដំណឹងនៃការអនុម័តជាផ្លូវការនៃច្បាប់នេះ គេបានចេញសេចក្តីថ្លែងការ សម្តែងការព្រួយបារម្ភ ពីការចុះថយនៃសិទ្ធិសេរីភាព និងប្រជាធិបតេយ្យហុងកុង។ លោល Charles Michel ប្រធានក្រុមប្រឹក្សាអឺរ៉ុប បានលើកឡើងថា ច្បាប់សន្តិសុខជាតិនេះ នឹងប៉ះពាល់យ៉ាងខ្លាំងទៅលើស្វ័យត្នភាពរបស់តំបន់ហុងកុង ហើយវានឹងជះផលអាក្រក់ ទៅលើភាពឯករាជ្យនៃប្រព័ន្ធតុលាការ ព្រមទាំងនីតិរដ្ឋរបស់ហុងកុង។
ចំណែកលោកស្រី Ursula Von der Leyen ប្រធានគណកម្មការអឺរ៉ុបវិញ បានលើកឡើងថា ចិនខ្លួនប្រាកដជាត្រូវរងនូវផលអវិជ្ជមាន ផ្នែកសេដ្ឋកិច្ចហិរញ្ញវត្ថុ ព្រោះថា ក្រុមហ៊ុនសហគ្រាស ក៏ដូចជាអ្នកវិនិយោគអន្តរជាតិទាំងអស់ នឹងបាត់បង់ទំនុកចិត្ត ជាមួយនឹងទីផ្សារហុងកុង។ ហើយហុងកុង និងបាត់បង់កិត្តិនាមនៅលើឆាកអន្តរជាតិ។ សហភាពអឺរ៉ុបនឹងពិភាក្សាជាមួយដៃគូផ្សេងទៀត ដើម្បីពិនិត្យមើលថាអាចធ្វើអ្វីបាន។
ដោយឡែក សភាអឺរ៉ុប បានស្នើទៅកាន់សហភាពអឺរ៉ុប ឲ្យស្វែងរកវិធានការដាក់ទណ្ឌកម្មចិន ឲ្យបានឆាប់បំផុត និង ការពារសិទ្ធិសេរីភាព របស់អ្នកនយោបាយហុងកុង។ យ៉ាងណាមិញ សភាអឺរ៉ុប បានលើកជាសំណើ ឲ្យបានយន្តការ ជួយរំដោះ ឬសង្រ្គោះអ្នកប្រជាធិបតេយ្យហុងកុង ក្នុងករណីស្ថានការណ៍ បង្រ្កាប សង្កត់សង្កិន កាន់តែឈានខ្លាំងឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ