រដ្ឋាភិបាលកុម្មុយនិស្តវៀតណាមអំពាវនាវរកជំនួយថវិកាដើម្បីទិញវ៉ាក់សាំងបង្ការកូវីដ
ធ្លាប់ជាប្រទេសគំរូគេ ក្នុងការគ្រប់គ្រង ស្ថានភាពជំងឺកូវីដ កាលពីឆ្នាំ ២០២០ វៀតណាមសព្វថ្ងៃ កំពុងប្រឈមនឹងការកើនឡើងនៃករណីឆ្លងជំងឺកូវីដ ជាពិសេស នៅក្នុងតំបន់ឧស្សាហកម្ម សេដ្ឋកិច្ច។ ថ្វីត្បិតថា ករណីឆ្លងជំងឺកូវីដ នៅវៀតណាម មានកម្រិតនៅឡើយ បើប្រៀបធៀបនឹងប្រទេសជិតខាងផ្សេងទៀត ប៉ុន្តែ វៀតណាម ដែលមានប្រជាជនជិត ១០០លាននាក់ កំពុងយឺតយ៉ាវនៅឡើយ ក្នុងយុទ្ធនាការចាក់វ៉ាក់សាំង ដល់ប្រជាជនរបស់ខ្លួន។ នៅពេលវ៉ាក់សាំង ជាដំណោះស្រាយតែមួយ ដើម្បីរួចចាកផុតពីវិបត្តិកូវីដ រដ្ឋាភិបាលវៀតណាមបានបើកយុទ្ធនាការ ស្វែងរកជំនួយសុប្បរសធម៌ ពីសាធារណជន ដើម្បី អាចទិញ វ៉ាក់សាំង បង្ការជំងឺកូវីដ១០។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
វៀតណាមដែលមានប្រជាជនជិត ១០០លាននាក់ ទើបចាក់វ៉ាក់សាំង បង្ការកូវីដ ដល់ប្រជាជនរបស់ខ្លួន បានតែជាង ១លាននាក់ប៉ុណ្ណោះ។ ក្នុងកាលៈទេសៈ ដែលប្រទេសកំពុងជួបរលកថ្មី នៃជំងឺកូវីដ និងដោយ បារម្ភពីវិបត្តិសេដ្ឋកិច្ច ដោយសារការកើនឡើងនៃករណីឆ្លង កូវីដ នៅតំបន់រោងចក្រឧស្សាហកម្ម រដ្ឋាភិបាលវៀតណាម បានជំរុញ ពន្លឿន យុទ្ធនាការចាក់វ៉ាក់សាំង ដល់ប្រជាជនរបស់ខ្លួន ឲ្យបានច្រើន ទូលំទូលាយ នៅទូទាំងប្រទេស។
ដើម្បី បង្កើតភាពស៊ាំរួម វៀតណាមមានគោលដៅ ចាក់វ៉ាក់សាំង ដល់ប្រជាជនរបស់ខ្លួន ឲ្យបាន៧០ភាគរយ នៃប្រជាជនសរុប នៅឆ្នាំនេះ។ មានន័យថា វៀតណាមត្រូវការវ៉ាក់សាំង ប្រមាណ ១៥០លានដូស ដែលគិតជាតម្លៃ ប្រមាណ ១,១ពាន់លានដុល្លារ។
ប៉ុន្តែ រដ្ឋាភិបាលវៀតណាមបានត្រៀម ថវិកាប្រមាណ តែ ៦៣០លានដុល្លារ ប៉ុណ្ណោះដើម្បីទិញវ៉ាក់សាំង។ ដើម្បីបង្រ្គប់កញ្ចប់ថវិកា ដែលនៅខ្វះ ជិត ៥០០លានដុល្លារ យ៉ាងដូច្នេះ រដ្ឋាភិបាលវៀតណាម ចាប់ផ្តើមយុទ្ធនាការស្វែងរកជំនួយថវិកា ពីគ្រប់ច្រក មិនថា ពីសហគមន៍អន្តរជាតិ និងប្រជាជនក្នុងស្រុក។
នៅថ្ងៃសៅរ៍ នៅក្នុងសុន្ទរកថាផ្សាយផ្ទាល់ ដើម្បី ចាប់ផ្តើមបើកយុទ្ធនាការ រៃអង្គាសថវិកាសម្រាប់ទិញ វ៉ាក់សាំង នាយករដ្ឋមន្រ្តីវៀតណាម លោក ផាម មីនជីន បាននិយាយថា វិភាគទានរបស់សហគមន៍ និងសង្គមវៀតណាម សំខាន់ សម្រាប់ដំណើរការចាក់វ៉ាក់សាំងក្នុងទ្រង់ទ្រាយធំ។
ចាប់តាំងពីសប្តាហ៍មុន ប្រជាជនវៀតណាម បានទទួលសារ តាមទូរស័ព្ទ និងមែល ដើម្បី ចូលរួមវិភាគទាន សម្រាប់ជួយរដ្ឋាភិបាលអាចទិញវ៉ាក់សាំង ចំណែកមន្រ្តីរដ្ឋការវៀតណាម ត្រូវបានលើកទឹកចិត្ត ដោយបរិច្ចាគ ប្រាក់ខែ មួយថ្ងៃរបស់ខ្លួន សម្រាប់កញ្ចប់ថវិកាទិញវ៉ាក់សាំងបង្ការកូវីដ។ នៅថ្ងៃអង្គារ វិភាគទានរបស់ប្រជាជន និងអង្គការជាង ២សែន បានធ្វើឲ្យអាជ្ញាធរប្រមូលថវិកាបានប្រមាណ ១៨១លានដុល្លារ។ តាមក្រសួងហិរញ្ញវត្ថុវៀតណាម នឹងមានថវិកា ប្រមាណ ១៤០លានដុល្លារ ផ្សេងទៀត ដែលក្រុមហ៊ុន និងអ្នកជំនួញបានសន្យាបរិច្ចាគសម្រាប់ទិញវ៉ាក់សាំងបង្ការជំងឺកូវីដ ១៩។
ប៉ុន្តែ នៅពេលមន្រ្តីរដ្ឋការ មួយចំនួនបរិច្ចាគដោយមិនអល់អែក ដើម្បី ជួយរដ្ឋ ឲ្យបានទិញវ៉ាក់សាំង ដែលជាដំណោះស្រាយតែមួយសម្រាប់សង្រ្គោះសេដ្ឋកិច្ចវៀតណាម ប្រជាជនវៀតណាមខ្លះ បានសំដែងការរារែក មិនទាន់ទុកចិត្ត ពីរបៀបចាយប្រាក់ របស់របបកុម្មុយនិស្ត វៀតណាម។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ