តេសឡាហៅប្រមូលរថយន្ត ជិត៣សែនគ្រឿងនៅចិន បន្ទាប់ពីរកឃើញបញ្ហាបច្ចេកទេស
ក្រុមហ៊ុនផលិតរថយន្តអគ្គិសនីដ៏ល្បី តេសឡា បានប្រមូលហៅរថយន្តខ្លួន ចំនួនប្រមាណ២៨៥០០០គ្រឿង នៅប្រទេសចិន យកទៅពិនិត្យឡើងវិញ និងធ្វើបច្ចុប្បន្នភាពប្រព័ន្ធ បន្ទាប់ពីបានរកឃើញថា ប្រព័ន្ធចាស់មានបញ្ហាបច្ចេកទេស។ បញ្ហាបច្ចេកទេសនេះ អាចបណ្តាលឲ្យមានករណីគ្រោះថ្នាក់ចរាចរណ៍ បុកគ្នា។ ភាគហ៊ុនរបស់តេសឡា បានធ្លាក់ចុះ ចំនួន៨% បន្ទាប់ពីលេចឮដំណឹងនេះ។
ចុះផ្សាយនៅថ្ងៃ៖
ស្តាប់ - ០២:៥៦
រថយន្ត Tesla Model 3 ចំនួន ២៤៩៨៥៥គ្រឿង និងរថយន្ត Tesla Model Y ចំនួន៣៥៦៦៥គ្រឿង ទាំងរថយន្តដែលត្រូវបានផលិតក្នុងប្រទេសចិន និងទាំងរថយន្តនាំចូល នឹងត្រូវហៅប្រមូល យកទៅពិនិត្យ ដើម្បីបច្ចុប្បន្នភាពប្រព័ន្ធបច្ចេកវិទ្យាឡើងវិញ។ នេះបើផ្អែកតាមការបញ្ជាក់ឲ្យដឹង ពីសំណាក់អាជ្ញាធរគ្រប់គ្រងទីផ្សាររថយន្តនៅចិន កាលពីថ្ងៃទី២៦ មិថុនា ២០២១។
យោងតាមរបាយការណ៍ របស់អាជ្ញាធរចិន រថយន្តទាំងនេះ មានបញ្ហាបច្ចេកទេស បណ្តាលមកពីមានភាពមិនប្រក្រតី នៅក្នុងប្រព័ន្ធគ្រប់គ្រងល្បឿន ដោយស្វ័យប្រវត្តិ ដែលបំពាក់នៅក្នុងរថយន្តទាំង២ម៉ូដែល។ ប្រព័ន្ធនេះ អាចត្រូវបានអ្នកបើកបរ ដាស់បញ្ជាឲ្យវាសកម្ម ដោយអចេតនា ហើយអាចធ្វើឲ្យរថយន្តឡើងល្បឿនលឿនខ្លាំងមួយរំពេច។ ប្រភពដដែលអះអាងថា គេបានសង្កេតឃើញ មានករណីគ្រោះថ្នាក់ចរាចរណ៍ បណ្តាលឲ្យស្លាប់មនុស្ស ដែលគេសង្ស័យថា បណ្តាលមកពីបញ្ហាបច្ចេកទេសនេះ។
ក្រុមហ៊ុនតេសឡា បានបញ្ជាក់ថា គេនឹងទាក់ទងទៅកាន់ម្ចាស់រថយន្ត នៃម៉ូដែល ដែលពាក់ព័ន្ធទាំងអស់ ដើម្បីធ្វើការដាក់ជំនួស បំពាក់ប្រព័ន្ធបច្ចេកវិទ្យាថ្មីមួយទៀត។
សូមបញ្ជាក់ថា តេសឡា គឺជាសហគ្រាសផលិតរថយន្តអគ្គិសនីឈានមុខគេ បំពាក់ដោយបច្ចេកវិទ្យាទំនើប ដែលរថយន្តសឹងតែមានសមត្ថភាពបើកបរ និងចាប់ហ្វ្រាំងដោយស្វ័យប្រវត្តិ ដោយមិនចាំបាច់មានអន្តរាគមន៍ ពីអ្នកបើកបរ។ មានរោងចក្រផលិត នៅជាយក្រុងសៀងហៃ រថយន្តតេសឡា បានទទួលការពេញនិយមបំផុត ពីសំណាក់ពួកអ្នកមានសម័យថ្មី នៅក្នុងប្រទេសចិន។ គ្រាន់តែក្នុងមួយខែឧសភាកន្លងទៅ តេសឡាបានលក់រថយន្តបានចំនួន ៣៣៤៦៣គ្រឿង នៅក្នុងប្រទេសចិន។ ចំនួនរថយន្តដែលតេសឡាលក់នៅក្នុងលោក គឺ១ភាគ៤ នៅក្នុងប្រទេសចិន។
តែយ៉ាងណាក៏ដោយ ថ្មីៗនេះ មានអ្នកប្រើប្រាស់ចិនកាន់តែច្រើន បានត្អូញត្អែរ ពីគុណភាព សុវត្ថិភាពរថយន្ត ក៏ដូចជាសេវាកម្មអតិថិជនរបស់ក្រុមហ៊ុនតេសឡា។ មានស្ត្រីជនជាតិចិនម្នាក់ បានលើកឡើង នៅក្នុងពិធីតាំងពិពណ៌រថយន្តក្រុងសៀងហៃ ថាខ្លួនវិះតែនឹងស្លាប់បាត់បង់ជីវិត ដោយសារតែរថយន្តថ្លៃកប់ពពកនេះ។ ស្រ្តីរូបនេះអះអាងថា ប្រព័ន្ធចាប់ហ្វ្រាំងដោយស្វ័យប្រវត្តិរបស់រថយន្តតេសឡា ដែលខ្លួនបានទិញមកជិះ គឺមិនដំណើរការទេ។ ការរិះគន់នេះ បានផុសផុលសាយភាយ តាមបណ្តាញសង្គមនៅប្រទេសចិន។ គួរកត់សំគាល់ដែរថា ជាមួយនឹងដំណឹង ស្តីពីការហៅប្រមូលរថយន្ត ជិត៣សែនគ្រឿង ដោយសារមានបញ្ហាបច្ចេកទេសនេះ តម្លៃភាគហ៊ុនរបស់ក្រុមហ៊ុនតេសឡា បានធ្លាក់ចុះចំនួន៨% មួយពព្រិចភ្នែក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ