កូរ៉េខាងត្បូងកំពុងឈានចូលក្លឹបមហាអំណាចអវកាស តាមរយៈសាកល្បងរ៉ុកកែតអវកាសផលិតក្នុងស្រុក
នៅថ្ងៃព្រហស្បតិ៍ទី ២១ តុលា ២០២១ វេលាម៉ោង១០ ត្រូវនឹងម៉ោង៣រសៀល ម៉ោងនៅប្រទេសកម្ពុជា កូរ៉េខាងត្បូងបានបាញ់សាកល្បងរ៉ុកកែតបង្ហោះផ្កាយរណប ដែលផលិតក្នុងស្រុកកូរ៉េខាងត្បូងសុទ្ធសាធ (១០០%)។ រ៉ុកកែតកូរ៉េខាងត្បូង ដែលអាចពាំបង្ហោះវត្ថុទម្ងន់លើសពីមួយតោន ទៅក្នុងអវកាស ទំនងជាបានហោះចេញទៅប្រកបដោយជោគជ័យ។
ចុះផ្សាយនៅថ្ងៃ៖
ស្តាប់ - ០២:០៤
នៅទីបំផុត បន្ទាប់ពីបានចំណាយពេលអស់ជាង១០ឆ្នាំ និងថវិកាអស់១,៤៦លានអឺរ៉ូ កាំជ្រួចបីជាន់ ទម្ងន់២០០តោន កម្ពស់៤៧,២ម៉ែត្រ មានម៉ាស៊ីន៦ដើរដោយចំហេះរាវ បានស្ថាបនាចប់សព្វគ្រប់នៅក្នុងស្រុក ដោយគំនិតនិងស្នាដៃកូរ៉េខាងត្បូង១០០%។
Nuri ជាឈ្មោះរ៉ុកកែត"Korean Satellite Launch Vehicle II ដែលមានផ្ទុកវត្ថុតំណាងទម្ងន់១តោនកន្លះ ទៅក្នុងគន្លងតារាវិថី ត្រូវបានបង្ហោះចេញពីមណ្ឌល Goheung នាថ្ងៃព្រហស្បតិ៍ទី ២១ តុលា២០២១នេះ។ រ៉ុកកែតបានដោះត្រដែតទៅលើផ្ទៃអាកាស ដោយគ្មានបញ្ហាទេ។ នេះតាមការអត្ថាធិប្បាយរបស់ទូរទស្សន៍ជាតិ។
ជាប្រទេសមានសេដ្ឋកិច្ចលូតលាស់ខ្លាំងលំដាប់ទី១២ពិភពលោក ជាប្រទេស មានបច្ចេកវិទ្យាជឿនលឿនជាងគេបំផុតមួយ និងជាប្រទេសផលិតគ្រឿងទូរស័ព្ទលំដាប់លេខមួយពិភពលោកមែន ប៉ុន្តែកូរ៉េខាងត្បូងយឺតយ៉ាវខ្លាំងក្នុងវិស័យអវកាស ដែលសហភាពសូវៀតបន្ទាប់មកសហរដ្ឋអាមេរិក បានចាប់ផ្តើមតាំងពីឆ្នាំ១៩៥៧។
កាលពីឆ្នាំ២០០៩-២០១០ សេអូលបានសាកល្បងបង្ហោះកាំជ្រួចទៅអវកាសដោយប្រើបច្ចេកវិទ្យារុស្ស៊ីពីរលើក តែត្រូវបរាជ័យទាំងពីរដង។ នៅឆ្នាំ២០១៣ ទើបកូរ៉េខាងត្បូងបង្ហោះរ៉ុកកែតបានសម្រេច តែដោយប្រើបច្ចេកវិទ្យារុស្ស៊ីដដែល។
នៅអាស៊ី ចិន ជប៉ុន និងឥណ្ឌា បានអភិវឌ្ឍកម្មវិធីអវកាស បានជឿនលឿនខ្លាំង។ ហើយកូរ៉េខាងជើងក៏ទើបបានចូលក្នុងក្លឹបប្រទេសមានសមត្ថភាពបង្ហោះកាំជ្រួចទៅក្នុងអវកាស តាមរយៈការបាញ់សាកល្បងកាំជ្រួចមីស៊ីលបាលីស្ទិក ផ្ទុកផ្កាយរណបទម្ងន់៣០០គីឡូក្រាម កាលពីឆ្នាំ២០១២ ទៅក្នុងអវកាស។ កាលណោះសហគមន៍អន្តរជាតិបាននាំគ្នាថ្កោលទោសដោយចោទកូរ៉េខាងជើងថាបន្លំជាបាញ់បង្ហោះមីស៊ីល ក្នុងបំណងអភិវឌ្ឍកម្មវិធីនុយក្លេអ៊ែរ។
គិតរហូតមកទល់នឹងពេលនេះ មានប្រទេសតែ៦គត់ ដែលមានសមត្ថភាពបាញ់បង្ហោះ ទៅក្នុងអវកាស នូវផ្កាយរណប ឬវត្ថុទម្ងន់លើសពី១តោន។
ប្រសិនបើការបាញ់រ៉ុកកែតថ្ងៃនេះបានជោគជ័យ នោះមានន័យកូរ៉េខាងត្បូងបានបំពេញលក្ខខណ្ឌចាំបាច់ដើម្បីបានចូលក្នុងក្រុមប្រទេសមហាអំណាចអវកាស ហើយនឹងអាចសម្រេចមហិច្ឆតាអវកាសជាច្រើនផ្សេងទៀត មានអាទិ៍ក្តីស្រម៉ៃបញ្ជូនយានទៅកាន់ភពព្រះចន្ទនៅឆ្នាំ២០៣០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ