ហុងកុង នឹងអនុម័តច្បាប់ថ្មីមួយទៀត ដើម្បីការពារសន្តិសុខជាតិ
ហុងកុង នឹងអនុម័តច្បាប់ថ្មីមួយទៀត ដើម្បីការពារសន្តិសុខជាតិ។ នេះបើផ្អែកតាមការប្រកាស របស់លោកស្រី ការី ឡាំ ប្រមុខដឹកនាំហុងកុង នៅចំពោះមុខអង្គសភាហុងកុង នៅថ្ងៃពុធទី១២មករានេះ។ ច្បាប់សន្តិសុខថ្មីនេះ នឹងមកបន្ថែមពីលើច្បាប់សន្តិសុខជាតិ ដែលប៉េកាំង បានដាក់កំហិតឲ្យហុងកុងអនុវត្ត កាលពីខែមិថុនា ឆ្នាំ២០២០។
ចុះផ្សាយនៅថ្ងៃ៖
ស្តាប់ - ០២:២៥
នៅចំពោះអង្គសភាហុងកុង ដែលបានបើកសម័យប្រជុំលើកទី១ ក្រោយការបោះឆ្នោតអាណត្តិថ្មី លោកស្រី ការី ឡាំ បានលើកឡើងថា លោកស្រីនឹងដាក់ស្នើច្បាប់សន្តិសុខជាតិមួយរបស់ហុងកុង ដោយអនុឡោមទៅតាមមាត្រា ២៣ នៃច្បាប់គ្រិះរបស់ហុងកុង។ ច្បាប់សន្តិសុខជាតិថ្មីនេះ នឹងមានកំណត់បទល្មើសចំនួនជាង៤០ ដែលពាក់ព័ន្ធនឹងចំណុចធំៗ៤ មានដូចជា បទល្មើសក្បត់ជាតិ បទល្មើសបំបែកទឹកដី បទល្មើសភេរវកម្ម និង បទល្មើសឃុបឃិតជាមួយបរទេស។
គួររំលឹកថា មាត្រា២៣ នៃច្បាប់គ្រិះហុងកុង ដែលប្រៀបបីដូចជារដ្ឋធម្មនុញ្ញហុងកុងនោះ បានចែងអំពីបទល្មើសមួយចំនួន មានជាអាទិ៍ អំពើក្បត់ជាតិ ការបំបែកទឹកដី និងការធ្វើវិទ្ធំង្សនាជាដើម។ មាត្រានេះ បានកំណត់ផងដែរ ហាមឃាត់ក្រុមចលនានយោបាយបរទេស មិនឲ្យលូកដៃចូលមកក្នុងសកម្មភាពនយោបាយហុងកុង និងហាមឃាត់ក្រុមនយោបាយហុងកុងទាំងអស់ មិនឲ្យមានទំនាក់ទំនងជាមួយនឹងស្ថាប័ននយោបាយប្រទេសផ្សេង។
សូមបញ្ជាក់ដែរថា ច្បាប់ថ្មីដែលលោកស្រី ការី ឡាំ មានបំណងអនុម័តនេះ នឹងមកបន្ថែមពីលើច្បាប់សន្តិសុខជាតិចិន ដែលប៉េកាំងបានដាក់ឲ្យហុងកុងអនុវត្ត តាំងតែពីខែមិថុនា ឆ្នាំ២០២០។ ជាច្បាប់ដែលមានខ្លឹមសារទូលំទូលាយ ហើយបានរារាំងរាល់ការបញ្ចេញមតិយោបល់ និងសកម្មភាពនយោបាយទាំងឡាយណា ដែលរិះគន់ប្រឆាំងរដ្ឋាភិបាលកុម្មុយនីស្ត។ ប្រមាណជិត២ឆ្នាំមកនេះ ក្រុមសកម្មជន ក៏ដូចជាអ្នកនយោបាយប្រជាធិបតេយ្យហុងកុង ភាគច្រើន បើមិនត្រូវបានគេចាប់ដាក់ឃុំទេ ក៏ត្រូវភៀសខ្លួនរត់ទៅរស់នៅក្រៅប្រទេសដែរ។
ដោយមិនបញ្ជាក់លំអិត អំពីខ្លឹមសារនៃច្បាប់ថ្មី ព្រមទាំងបទល្មើសទាំងជាង៤០នោះថាមានអ្វីខ្លះ លោកស្រី ការី ឡាំ គ្រាន់តែបានអះអាងថា រដ្ឋបាលលោកស្រី នឹងរៀបចំសំណើច្បាប់ថ្មីនេះ ឲ្យបានរួចរាល់ នៅមុនខែមិថុនា។ ខែមិថុនា ក៏ជាពេលដែលលោកស្រី ត្រូវចប់អាណត្តិដែរ។ រហូតមកទល់ពេលនេះ លោកស្រីមិនទាន់បានបញ្ជាក់ទេ ថាលោកស្រីនឹងឈរឈ្មោះម្តងទៀត។ តែយ៉ាងណា លោកស្រីបានព្រលយពាក្យថា ការពិភាក្សា និងការបោះឆ្នោតលើសំណើច្បាប់នេះ អាចនឹងត្រូវចំណាយពេលយូរ នៅក្រោយលោកស្រីត្រូវចប់អាណត្តិ។ ទោះយ៉ាងណា តាមការវិភាគ សំណើច្បាប់នេះ អាចនឹងត្រូវសភាហុងកុងបោះឆ្នោតដោយគ្មានឧបសគ្គអ្វីទាំងអស់ ព្រោះសមាជិកថ្មីទាំង៩០នាក់នៃសភានេះ គឺសុទ្ធតែជាមនុស្សស្មោះស្ម័គ្រនឹងបក្សកុម្មុយនីស្តិចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ