ទុក្ខសោក លាយកំហឹង នៅមួយសប្តាហ៍ក្រោយព្រឹត្តិការណ៍ប្រជ្រៀតជាន់ស្លាប់មនុស្សនៅសេអ៊ូល
នៅកូរ៉េខាងត្បូង ប្រជាជនរាប់សិបពាន់នាក់បានចូលរួមពិធីស្មឹងស្មាធ គោរពវិញ្ញាណក្ខន្ធជនរងគ្រោះដែលស្លាប់នៅក្នុងហេតុការណ៍ប្រជ្រៀតជាន់គ្នានៅសង្កាត់អ៊ីតៃវ៉ុន ក្នុងក្រុងសេអ៊ូលកាលពីថ្ងៃសៅរ៍សប្តាហ៍មុន។ នៅមួយសប្តាហ៍ក្រោយហេតុការណ៍ប្រជ្រៀតរត់ជាន់គ្នាក្នុងឱកាសកម្មវិធីហាឡូវីន ដែលបានសម្លាប់មនុស្ស១៥៦នាក់ គ្រួសារសាច់ញាតិរបស់ជនរងគ្រោះបានស្រែកទាមទាររកយុត្តិធម៌ និងការទទួលខុសត្រូវពីសំណាក់រដ្ឋាភិបាលកូរ៉េខាងត្បូង។
ចុះផ្សាយនៅថ្ងៃ៖
ស្តាប់ - ០២:៤៣
ពិធីស្មឹងស្មាធ អុជទៀន គោរពវិញ្ញាណក្ខន្ធជនរងគ្រោះដែលក្ស័យជីវិតនៅក្នុងហេតុការណ៍ប្រជ្រៀតជាន់គ្នា នៅបុណ្យហាឡូវីន កាលពីថ្ងៃសៅរ៍សប្តាហ៍មុន ត្រូវបានរៀបចំជាច្រើនកន្លែង នៅទីក្រុងសេអ៊ូល និងនៅទីក្រុងធំៗរបស់កូរ៉េខាងត្បូង ដូចជាទីក្រុងប៊ូសាន និងជេជូ (Jeju)។
នៅទីក្រុងសេអ៊ូល ពិធីស្មឹងស្មាធដែលរៀបចំឡើងដោយចលនាក្រុមពលរដ្ឋដែលមានទំនាក់ទំនងជាមួយគណបក្សប្រឆាំង មានលាយឡំដោយសារនយោបាយ ដែលនៅក្នុងនោះ គេឃើញមានបដាសរសេរទាមទារឲ្យប្រធានាធិបតីលោក យុន សុខយោលចុះចេញពីតំណែង។
ក្រោយហេតុការណ៍ប្រជ្រៀតជាន់គ្នា ស្លាប់មនុស្ស១៥៦នាក់ ដែលភាគច្រើនជាយុវជន ទុក្ខសោកលាយកំហឹង និងការទាមទាររកយុត្តិធម៌ ការទទួលខុសត្រូវពីសំណាក់អាជ្ញាធរ មានកាន់តែច្រើននៅកូរ៉េខាងត្បូង។ នៅថ្ងៃសុក្រ កំហឹងគ្រួសារសាច់ញាតិរបស់ជនរងគ្រោះបានស្តែងឡើង នៅពេលស្ត្រីម្នាក់ដែលអះអាងជាម្តាយរបស់យុវជនរងគ្រោះ បានចាប់ហែកកម្ទេចកម្រងផ្កា ដែលលោកប្រធានាធិបតី និងចៅហ្វាយក្រុងសេអ៊ូលបានយកទៅដាក់នៅកន្លែងគោរពវិញ្ញាណក្ខន្ធនៅមុខសាលាក្រុងសេអ៊ូល។ “តើកម្រងផ្កាមានន័យអ្វី បើរដ្ឋាភិបាលមិនអាចការពារជីវិតកូនៗរបស់ពួកយើងបានផងនោះ” នេះជាសំដីរបស់ម្តាយជនរងគ្រោះ មុននឹងត្រូវប៉ូលិសអូសទាញចេញពីកន្លែងប្រារព្ធពិធីបុណ្យ។
ប្រឈមនឹងការធ្លាក់ចុះប្រជាប្រិយភាពដោយសារសោកនាដកម្មប្រជ្រៀតជាន់គ្នានៅក្នុងបុណ្យហាឡូវីនរបស់ក្រុមយុវជន លោកប្រធានាធិបតីយុន សុខយោល កាលពីថ្ងៃសុក្របាននិយាយសុំទោស និងថា រដ្ឋាភិបាលរបស់លោកមានការទទួលខុសត្រូវដ៏ធំមួយដើម្បីបញ្ជៀសកុំឲ្យមានហេតុការណ៍អាក្រក់ដដែលនេះកើតឡើងសាជាថ្មី។
កាលពីថ្ងៃសៅរ៍សប្តាហ៍មុន មនុស្សប្រមាណ១សែននាក់បានទៅប្រមូលផ្តុំកកកុញ នៅសង្កាត់ រាត្រីអ៊ីតៃវ៉ុនដើម្បីអបអរបុណ្យហាឡូវីន។ អាជ្ញាធរកូរ៉េខាងត្បូងរងការរិះគន់ថា ខកខានមិនបានចាត់វិធានការគ្រប់គ្រងហ្វូងមនុស្ស ដោយបណ្តោយឲ្យមនុស្សសម្រុកប្រជ្រៀតគ្នានៅតាមច្រកផ្លូវចោទតូចៗ ក្នុងសង្កាត់អ៊ីតៃវ៉ុន់។ នៅថ្ងៃអង្គារ ប្រធានប៉ូលិសជាតិកូរ៉េខាងត្បូងនិយាយទទួលស្គាល់ថា ប៉ូលិបានទទួលព័ត៌មានស្តីពីការប្រមូលផ្តុំមនុស្សដ៏សំខាន់ដែលអាចបង្កឲ្យមានគ្រោះថ្នាក់ នៅប៉ុន្មានម៉ោងមុនកើតមានសោកនាដកម្មទៅទៀត ប៉ុន្តែ ប៉ូលិសមិនបានចាត់វិធានការគ្រប់គ្រាន់។
ដោយសារតែគ្មានម្ចាស់កម្មវិធីរៀបចំផ្លូវការ និងមិនស្មានដល់ថា នឹងមានមនុស្សច្រើនរាប់ម៉ឺននាក់នៅបុណ្យហាឡូវីននៅសង្កាត់តូចចង្អៀតអ៊ីតៃវ៉ុន ប៉ូលិសក្រុងសេអ៊ូល មិនបានទាមទារឲ្យម្ចាស់ភោជនីយដ្ឋាន រង្គសាលនៅ សង្កាត់អ៊ីតៃវ៉ុន រៀបចំផែនការគ្រប់គ្រងមនុស្សទៅតាមច្បាប់រក្សាសុវត្ថិភាព។ នៅថ្ងៃនោះ និងបានពង្រាយកម្លាំងតែ១៣៧នាក់ប៉ុណ្ណោះ សម្រាប់ហ្វូងមនុស្ស១សែន ដែលប្រជ្រៀតណែនតាន់តាប់នៅថ្ងៃបុណ្យហាឡូវីននៅសង្កាត់អ៊ីតៃវ៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ