វៀតណាមប្តូរយុទ្ធសាស្រ្តស្តីពីអង្ករដោយចង់នាំចេញតែ ៤លានតោនក្នុងមួយឆ្នាំពីពេលនេះទៅឆ្នាំ ២០៣០
នៅក្នុងប្រទេសវៀតណាម រដ្ឋាភិបាលបានប្តូរយុទ្ធសាស្រ្តថ្មីស្តីពីការនាំអង្ករចេញ។ យោងតាមឯកសារចុះថ្ងៃទី២៦ ឧសភាដែលរដ្ឋាភិបាលមិនបានផ្សព្វផ្សាយជាសាធារណៈ វៀតណាមដែលជាប្រទេសនាំអង្ករចេញលំដាប់ទី៣ ក្នុងលោកចង់កាត់បន្ថយការនាំអង្ករចេញពីពេលនេះទៅឆ្នាំ ២០៣០។ គោលដៅនៃបំណងមួយនេះ គឺដើម្បីផ្តោតការយកចិត្តទុកដាក់លើគុណភាពអង្ករ និងពង្រីកទីផ្សារនាំចេញរបស់ខ្លួនសម្រាប់ផលិតផលផ្សេងទៀត។
ចុះផ្សាយនៅថ្ងៃ៖
ស្តាប់ - ០២:៤០
ក្នុងឆ្នាំ ២០២២ កន្លងទៅ វៀតណាមបាននាំអង្ករចេញចំនួន ៧លាន ១សែនតោន ពោលស្ថិតនៅលំដាប់ទី៣ បន្ទាប់ពីប្រទេសឥណ្ឌា និងប្រទេសថៃ។ តែចាប់ពីពេលនេះទៅឆ្នាំ ២០៣០ វៀតណាមចង់នាំអង្ករចេញតែ ៤លានតោនប៉ុណ្ណោះក្នុងមួយឆ្នាំ។ ការចង់កាត់បន្ថយការនាំអង្ករចេញត្រូវបានរដ្ឋាភិបាលក្រុងហាណូយបញ្ជាក់នៅក្នុងឯកសារមួយចុះថ្ងៃទី២៦ ឧសភាថា គឺដើម្បីផ្តោតការនាំចេញតែអង្ករមានគុណភាពខ្ពស់ ដើម្បីធានាសន្តិសុខស្បៀងជាតិ ដើម្បីការពារបរិស្ថាន និងដើម្បីស៊ាំទៅនឹងការប្រែប្រួលអាកាសធាតុ។
តាមយុទ្ធសាស្រ្តថ្មីរបស់រដ្ឋាភិបាលវៀតណាមពីពេលនេះទៅឆ្នាំ ២០២៥ ខាងមុខ ការនាំអង្ករចេញចំនួន ៦០% នឹងនាំទៅកាន់ទីផ្សារអាស៊ី ២២% ទៅកាន់ទីផ្សារអាហ្រ្វិក ៧% ទៅកាន់ទីផ្សារអាមេរិក ៤% ទៅកាន់ទីផ្សារមជ្ឈិមបូព៌ា និង ៣% ទៅកាន់ទីផ្សារអឺរ៉ុប។ ដោយឡែកនៅឆ្នាំ ២០៣០ វៀតណាមនឹងនាំអង្ករចេញទៅកាន់ទីផ្សារអាស៊ីចំនួន ៥៥% និង ៥% ទៅកាន់ទីផ្សារអឺរ៉ុប។ ទន្ទឹមគ្នានេះ និងបើតាមយុទ្ធសាស្រ្តថ្មីដដែល វៀតណាមនឹងផ្តើមបង្កើនផលិតកម្មអង្ករដែលមានគុណភាពខ្ពស់ និងផ្តើមកាត់បន្ថយផលិតកម្មអង្ករដែលមានគុណភាពទាប។
តាមពិត វៀតណាមចង់ពង្រីកទីផ្សារនាំចេញរបស់ខ្លួនសម្រាប់ផលិតផលផ្សេងទៀតក្រៅពីអង្ករ។ តែអ្នកជំនួញអង្ករម្នាក់មិនបញ្ចេញឈ្មោះបានយល់ឃើញថា យុទ្ធសាស្រ្តថ្មីរបស់រដ្ឋាភិបាលហាក់ជ្រុលបន្តិច នោះបើទោះបីជាផ្ទៃដីដាំស្រូវមានការថយចុះដោយសារការប្រែប្រួលអាកាសធាតុ និងមានប្រជាកិសករខ្លះបានប្តូរទៅដាំដំណាំផ្លែឈើផ្សេង ឬមួយក៏ប្តូរមុខរបរទៅចិញ្ចឹមបង្ការវិញក៏ដោយ។ ចំណែកអ្នកជំនួញអង្ករម្នាក់ទៀតមិនសូវមានជំនឿលើយុទ្ធសាស្រ្តថ្មីរបស់រដ្ឋាភិបាលដោយបញ្ជាក់ថា ផលិតកម្មអង្ករផ្អែកលើការផ្គត់ផ្គង់ និងតម្រូវការរបស់ទីផ្សារ ពោលមិនមែនលើការសម្រេចចិត្តរបស់រដ្ឋាភិបាលទេ។
តាមទិន្នន័យគយវៀតណាម ការនាំអង្ករវៀតណាមចេញក្នុងរយៈពេល ៤ខែដើមឆ្នាំ ២០២៣ នេះបានកើនឡើងគួរឲ្យកត់សម្គាល់។ ក្នុងឆ្នាំ ២០២២ កន្លងទៅ ចំណូលដែលវៀតណាមទទួលបានពីការនាំអង្ករចេញមានទឹកប្រាក់ចំនួន ៣ ៤៥០លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ