អាមេរិកនិងចិនបរិហារគ្នាទៅវិញទៅមកថា វិះនាំឱ្យមានឧប្បត្តិហេតុនៅសមុទ្ទចិនខាងត្បូង
ក្រោយពីបានឮពាក្យរិះគន់របស់អាមេរិក ថាចិនបានបើកយន្តហោះចម្បាំង ហោះឆាបកាត់មុខយន្តហោះស៊ើបការណ៍អាមេរិក នៅលើសមុទ្ទចិនខាងត្បូង ប្រកបដោយគ្រោះថ្នាក់មក នៅថ្ងៃពុធទី ៣១ឧសភា២០៣នេះ ប៉េកាំងបានចង្អុលមុខអាមេរិកវិញ ថាជាអ្នកបង្កហេតុ ដែលជាប្រភពនាំមានបញ្ហាសន្តិសុខ រំលោភអធិបតេយ្យភាពនិងសន្តិសុខជាតិចិន។
ចុះផ្សាយនៅថ្ងៃ៖
ស្តាប់ - ០២:០២
សហរដ្ឋអាមេរិកត្រូវតែបញ្ឈប់ទង្វើបង្កហេតុដ៏គ្រោះថ្នាក់ នៅសមុទ្ទចិនខាងត្បូងភ្លាម។ នេះជាប្រសាសន៍របស់លោកស្រី ម៉ៅ នីង អ្នកនាំពាក្យក្រសួងការបរទេសចិន ដោយព្រមានថា ការបញ្ជូននាវានិងយន្តហោះមកស៊ើបការណ៍ចិន ជាញឹកញយនិងក្នុងរយៈពេលដ៏វែង គឺជាការរំលោភអធិបតេយ្យភាពនិងសន្តិសុខជាតិ ដែលចិននឹងចាត់វិធានការដាច់ខាតចាំបាច់ដើម្បីការពារអធិបតេយ្យភាពនិងសន្តិសុខរបស់ខ្លួន។
ប្រតិកម្មរបស់ចិនធ្វើឡើងក្រោយពីយោធាអាមេរិកបានប្រកាសកាលពីថ្ងៃអង្គារទី ៣០ឧសភាម្សិលមិញ ថាអ្នកបើកបរយន្តហោះចម្បាំងចិន បានបើកកាត់ចំពីមុខយន្តហោះស៊ើបការណ៍អាមេរិក RC-១៣៥ ដែលកំពុងធ្វើប្រតិបត្តិការ តាមទម្លាប់ នៅលើសមុទ្ទចិនខាងត្បូង និងក្នុងដែនអាកាសអន្តរជាតិ-ស្របតាមច្បាប់អន្តរជាតិ។
បើតាមរូបភាពវីដេអូផ្សាយជាសាធារណៈ គេឃើញយន្តហោះចម្បាំងរបស់ចិនមួយគ្រឿង ហោះកាត់មុខយន្តហោះអាមេរិក ដែលញ័ររង្គើយ៉ាងខ្លាំង ក្រោមឥទ្ធិពលនៃរលកខ្យល់ពពកបោកបក់ដោយយន្តហោះចម្បាំងចិន។ សម្រាប់អាមេរិក ទង្វើហោះកាត់មុខចម្ងាយតែ១២០ម៉ែត្រពីគ្នា គឺជាកាយវិការបែបប្រមាថឈ្លានពានដោយគ្មានហេតុផល។
ស្ថានភាពបែបនេះ អាចនឹងបង្កើតឱ្យមានឧប្បត្តិហេតុ និងគ្រោះថ្នាក់បាន ប្រសិនបើប្រហែសតែបន្តិច។ នេះបើតាមអ្នកទទួលខុសត្រូវជាន់ខ្ពស់ម្នាក់នៃយោធាអាមេរិកសុំមិនបញ្ចេញឈ្មោះ ដែលបានបន្ថែមទៀតថា ហានិភ័យគ្រោះថ្នាក់ ប្រទះនឹងយន្តហោះចិននៅលើអាកាស និងនាវាចិននៅក្នុងសមុទ្ទចិនខាងត្បូង កើនឡើងខ្លាំងណាស់។
ឧប្បត្តិហេតុយន្តហោះចម្បាំងចិននិងយន្តហោះស៊ើបការណ៍អាមេរិកវិះប៉ះគ្នា ធ្លាប់កើតឡើងម្តងកាលពីខែធ្នូ ដែលកាលណោះយន្តហោះអាមេរិកបានបង្ខំបកក្រោយដើម្បីបញ្ចៀសការបុកទង្គិចគ្នា។ ការបរិហារបន្ទោសគ្នានេះ ប្រព្រឹត្តទៅតែមួយថ្ងៃក្រោយពីវ៉ាស៊ីនតោនប្រកាសថាប៉េកាំងមិនឱ្យរដ្ឋមន្ត្រីការពារជាតិចិននិងអាមេរិកជួបគ្នានៅសិង្ហបុរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ