ប្រធានាធិបតីកូរ៉េខាងត្បូង សន្យាសើរើនយោបាយអាកាសធាតុ
នៅថ្ងៃនេះ ប្រធានាធិបតីកូរ៉េខាងត្បូងលោក យូន ស៊ុកយោល បានប្រកាសប្តេជ្ញាសើរើមើលឡើងវិញទាំងស្រុង នយោបាយទប់ទល់នឹងបាតុភូតអាកាសធាតុអាក្រក់ៗខ្លាំង ដែលបង្កឡើងដោយការប្រែប្រួលអាកាសធាតុ។ ការសន្យានេះធ្វើឡើងក្រោយពីទឹកជំនន់ទឹកភ្លៀងរដូវវស្សាដ៏កំណាចហួសហេតុបានសម្លាប់ជីវិតពលរដ្ឋកូរ៉េខាងត្បូងអស់យ៉ាងហោច៣៩នាក់ និងបាត់ខ្លួនជាច្រើននាក់ផ្សេងទៀត។
ចុះផ្សាយនៅថ្ងៃ៖
ស្តាប់ - ០១:៤០
បាតុភូតអាកាសធាតុបែបកំណាចហួសហេតុនឹងកើតឡើងកាន់តែញយ យើងត្រូវតែទទួលស្គាល់ការប្រែប្រួលអាកាសធាតុនេះ ហើយត្រូវប្រឈមទប់ទល់វា។ នេះជាប្រសាសន៍របស់លោកប្រធានាធិបតីកូរ៉េខាងត្បូង មុននឹងពេលចេញដំណើរទៅកាន់ខេត្តGyeongsang ខាងជើង ដែលរងគ្រោះទឹកទំនន់យ៉ាងធ្ងន់ធ្ងរ។
សម្រាប់លោកប្រធានាធិបតី គេត្រូវតែគិតគូរជាថ្មីឡើងវិញនូវ ទស្សនៈដែលធ្លាប់យល់ថាបាតុភូតអាកាសធាតុអាក្រក់ៗខ្លាំង បង្កដោយការប្រែប្រួលអាកាសធាតុជាបាតុភូតមិនប្រក្រតីមួយ និងដែលគេមិនអាចធ្វើអ្វីឈ្នះ។ លោក យូន ស៊ុកយោល បានអំពាវនាវឱ្យមានការតាំងចិត្តដ៏មុះមុតបំផុតក្នុងការត្រៀមលក្ខណៈប្រឈមតតាំង និងតបតទៅនឹងបាតុភូតអាកាសធាតុអាក្រក់ៗឱ្យបានប្រសើរឡើង។ កូរ៉េខាងត្បូងនឹងប្រមូលផ្តុំគ្រប់ធនធានដែលមាន រាប់ទាំងក្រុមយោធានិងប៉ូលិសផង សម្រាប់ចូលរួមជួយសង្គ្រោះ។ នេះបើតាមប្រសាសន៍របស់លោកប្រធានាធិបតីដដែល។
សូមបញ្ជាក់ថា ពេលនេះជារដូវវស្សានៅកូរ៉េខាងត្បូង។ ប៉ុន្មានថ្ងៃចុងក្រោយមកនេះ មានភ្លៀងធំៗបានធ្លាក់យ៉ាងខ្ជោកខ្ជាំជាប់គ្នាបួនថ្ងៃ បង្កជាទឹកជំនន់ និងការហូរបាក់ដី យ៉ាងធ្ងន់ធ្ងរ ស្លាប់មនុស្សអស់យ៉ាងហោច៣៩នាក់ និងបាត់ខ្លួនជាច្រើននាក់ផ្សេងទៀត។ ជនបាត់ខ្លួនច្រើនជាអ្នករស់នៅក្នុងតំបន់ភ្នំ ដែលកម្លាំងទឹកជំនន់ទឹកភ្លៀងបានបំបាក់ដី ក្រសោបយកផ្ទះដោយទាំងមនុស្សជាប់កុនខាងក្នុងទៅជាមួយផង។ បើតាមភ្នាក់ងារឧតុនិយម ស្ថានភាពអាកាសធាតុមិនប្រសើរទេ។ នៅថ្ងៃស្អែក ភ្លៀងកំណាចថ្មីមិនធ្លាក់មកទៀត។
កូរ៉េខាងត្បូង តែងរងទឹកជំនន់ទឹកភ្លៀងរដូវវស្សាជាញឹកញយ តែជាទូទៅប្រទេសនេះអាចគ្រប់គ្រងស្ថានការណ៍បានល្អនិងមានជនរងគ្រោះស្លាប់តិចតួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ