វៀតណាម៖ មនុស្ស១៨នាក់ ជាប់ទោសប្រហារជីវិតពីបទជួញដូរគ្រឿងញៀន ក្នុងនោះកូរ៉េខាងត្បូង២នាក់ ចិនម្នាក់
យ៉ាងហោចណាស់ មនុស្ស១៨នាក់ ត្រូវបានតុលាការវៀតណាម ប្រកាសទោសប្រហារជីវិត ពីបទជួញដូរគ្រឿងញៀន។ នេះបើផ្អែកតាមការចុះផ្សាយ របស់បណ្តាញព័ត៌មានរដ្ឋវៀតណាម។ ក្នុងចំណោមពិរុទ្ធជន គឺមានជនជាតិវៀតណាម១៥នាក់ ជនជាតិកូរ៉េខាងត្បូង២នាក់ និងជនជាតិចិន១នាក់។ មិនទាន់មានបញ្ជាក់ពីអាជ្ញាធរវៀតណាមទេ ទាក់ទិននឹងកាលបរិច្ឆេទនៃការប្រហារជីវិត។
ចុះផ្សាយនៅថ្ងៃ៖
ស្តាប់ - ០២:៤៦
យោងតាមគេហទំព័រព័ត៌មាន Cong an Nhan dan ឆ្លងកាត់សវនាការរយៈពេល៤ថ្ងៃ នៅក្រុងហូជីមីញ ពិរុទ្ធជនទាំង១៨នាក់ ត្រូវបានតុលាការវៀតណាម ប្រកាសទទួលស្គាល់ថាបាន ស្តុកទុកដោយខុសច្បាប់ ព្រមទាំងចរចាលក់ចែកចាយ នូវគ្រឿងញៀនចំនួន២១៦គីឡូក្រាម រវាងពីខែឧសភា ដល់ខែមិថុនា ឆ្នាំ២០២០។
ពិរុទ្ធជនទាំងអស់១៨នាក់ ដែលជាប់ទោសប្រហារជីវិត គឺមានជនជាតិបរទេស៣នាក់។ ជនជាតិកូរ៉េខាងត្បូង២នាក់ ម្នាក់ឈ្មោះ Kim Soon Sik អាយុ៦៣ឆ្នាំ ជាអតីតនគរបាលកូរ៉េខាងត្បូង និងម្នាក់ទៀត ឈ្មោះ kang Seong hok អាយុ៣០ឆ្នាំ។ ចំណែកពិរុទ្ធជនជាជនជាតិចិនវិញ ឈ្មោះ Li Tian Guan អាយុ៥៨ឆ្នាំ ដែលត្រូវសមត្ថកិច្ចវៀតណាមជឿថា គឺជាមេក្រុមជាប់ចោទក្នុងសំណុំរឿងនេះ។
សូមរំលឹកថា កាលពីខែកក្កដាកន្លងទៅ សមត្ថកិច្ចវៀតណាមនៅក្រុងហូជីមិញ បានបើកប្រតិបត្តិការចុះចាប់ និងឆែកឆេរមុខសញ្ញាកុងទ័រនឺដឹកទំនិញជាច្រើនគ្រឿង។ យ៉ាងហោចណាស់ គ្រឿងញៀនចម្រុះច្រើនប្រភេទ ទម្ងន់ប្រមាណ១៦៨គីឡូក្រាម ត្រូវបានសមត្ថកិច្ចវៀតណាមរឹបអូសបានជាវត្ថុតាង ក្នុងពេលនោះ។ ផ្អែកតាមប្រភពបណ្តាញព័ត៌មានវៀតណាមដដែល គឺគ្រឿងញៀនទាំងនេះ ត្រូវបានក្រុមជនជាប់ចោទ ដឹកយកមកពីប្រទេសកម្ពុជា ឆ្ពោះមកកាន់ទីក្រុងហូជីមីញ។ មួយផ្នែកនៃគ្រឿងញៀននេះ ត្រូវបានប្រើប្រាស់អស់ខ្លះនៅហូជីមិញ ចំណែកមួយផ្នែកទៀត ត្រូវគេគ្រោងបញ្ជូនចេញទៅកាន់កូរ៉េខាងត្បូង។
គួរបញ្ជាក់ថា វៀតណាមគឺជាប្រទេសមួយក្នុងចំណោមប្រទេសមួយចំនួន ដែលមានច្បាប់តឹងតែងបំផុត ទាក់ទិននឹងការជួញដូរគ្រឿងញៀន។ អ្នកកាន់កាប់គ្រឿងញៀន ប្រភេទហូរ៉ូអ៊ីន ចាប់ពី៦០០ក្រាមឡើងទៅ ឬ ប្រភេទម៉េតំហ្វេតាមីន ចាប់ពី២,៥គីឡូក្រាមឡើងទៅ គឺអាចប្រឈមនឹងទោសប្រហារជីវិតនៅវៀតណាម។ យោងតាមតួលេខផ្លូវការរបស់អាជ្ញាធរវៀតណាម កាលពីឆ្នាំ២០១៧ បានកាត់ទោសប្រហារជីវិតមនុស្ស៧នាក់ ពីបទជួញដូរគ្រឿងញៀនទៅកាន់ប្រទេសចិន។
ផ្អែកតាម អង្គការ Death Penalty Information Center មនុស្សយ៉ាងហោច១០០នាក់ ត្រូវបានតុលាការវៀតណាម កាត់ទោសប្រហារជីវិត កាលពីឆ្នាំ២០២២ ដោយផ្អែកលើបទល្មើសផ្សេងៗ។ កាលពីឆ្នាំ២០២១ របាយការណ៍អង្គការ Amnesty International បានរិះគន់ប្រព័ន្ធយុត្តិធម៌វៀតណាម ដែលមានលក្ខណៈបិទជិតយ៉ាងសម្ងាត់ និងគ្មានតម្លាភាព ទាក់ទិននឹងការកាត់ទោសប្រហារជីវិតមនុស្ស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ