នៅសិង្ហបុរី នាយករដ្ឋមន្ត្រីថ្មី លោក ឡរ៉ែនស៍ វ័ង ចូលកាន់តំណែងជាផ្លូវការ ក្នុងថ្ងៃពុធនេះ
វ័យ៥១ឆ្នាំ នាយករដ្ឋមន្ត្រីសិង្ហបុរីថ្មី លោក ឡរ៉ែនស៍ វ័ង ចូលកាន់តំណែង នៅថ្ងៃទី១៥ ឧសភា។ ជាអ្នកជំនាញសេដ្ឋកិច្ចហិរញ្ញវត្ថុនិងទទួលការបណ្តុះបណ្តាលនៅសហរដ្ឋអាមេរិក នាយករដ្ឋមន្ត្រីថ្មីរបស់សិង្ហបុរី ធ្លាប់មានស្នាដៃខ្លាំង ក្នុងការដឹកនាំយុទ្ធនាការទប់ទល់នឹងជំងឺកូវីដ១៩ នាពេលកន្លងទៅ។ ក្នុងប្រវត្តិសាស្ត្រសិង្ហបុរីឯករាជ្យ ៥៩ឆ្នាំ លោកគឺជានាយករដ្ឋមន្ត្រីទី២ ដែលគ្មានជាប់សាច់ញាតិគ្រួសារវង្សត្រកូល លី។ តើ លោក ឡរ៉ែនស៍ វ័ង មានប្រវត្តិរូបដូចម្តេចខ្លះ?
ចុះផ្សាយនៅថ្ងៃ៖
ស្តាប់ - ០៣:៣៨
លោក ឡរ៉ែនស៍ វ័ង ឈ្មោះដើម ហ័ង ឈ្វីងឆៃ បានធ្លាប់លើកឡើង ថាលោកព្រមទទួលតំណែងនាយករដ្ឋមន្ត្រី ដោយស្មារតីទទួលខុសត្រូវខ្ពស់ និងដោយភាពអៀនខ្មាសបន្តិចផង ព្រោះមុខតំណែងនេះ ជាអម្រែកករណីកិច្ចនិងការទទួលខុសត្រូវដ៏ធំធេង។ ក៏ប៉ុន្តែ លោកបានសន្យាប្តេជ្ញាថានឹងលះបង់គ្រប់យ៉ាងដើម្បីសម្រេចការងារជាកាតព្វកិច្ច។
នាយករដ្ឋមន្ត្រីសិង្ហបុរីថ្មីនេះ ត្រូវគេចាត់ទុកថា ជាអ្នកជំនាញសេដ្ឋកិច្ច និងជាអ្នកតស៊ូរៀនសូត្រ។ ក្រោយបញ្ចប់ការបណ្តុះបណ្តាលនៅសហរដ្ឋអាមេរិក លោកបានចូលបម្រើការងាររដ្ឋ នៅក្រសួងពាណិជ្ជកម្ម បន្ទាប់មក ធ្វើជានាយកប្រតិបត្តិអាជ្ញាធរទីផ្សារថាមពល ហើយនិងជា ជំនួយការផ្ទាល់នាយករដ្ឋមន្ត្រី។ លោកបានចូលប្រលូកក្នុងជីវិតនយោបាយជ្រៅមែនទែន នៅឆ្នាំ២០១១ ដោយត្រូវតែងតាំងជាមនុស្សសំខាន់ នៅ ធនាគារកណ្តាលសិង្ហបុរី។ ពេលជំងឺសកលកូវីដ១៩រាតត្បាតខ្លាំងនៅក្នុងឆ្នាំ២០២០ លោក ឡរ៉ែនស៍ វ័ង ជាមនុស្សបង្គោលក្នុងការដឹកនាំយុទ្ធនាគារទប់ស្កាត់ការឆ្លងរាលដាលជំងឺ។ ១ឆ្នាំបន្ទាប់ លោកទទួលការតែងតាំងជារដ្ឋមន្ត្រីក្រសួងហិរញ្ញវត្ថុ។ ១ឆ្នាំក្រោយមកទៀត ជាឧបនាយករដ្ឋមន្ត្រី នៅឆ្នាំ២០២២ ស្របពេលដែលថ្នាក់ដឹកនាំប្រទេសនិងគណបក្សសកម្មភាពប្រជាជន People's Action Party (PAP) បានសម្រេចចាត់តាំងរូបលោកជាអ្នកបន្តវេន ត្រូវស្នងតំណែងប្រមុខរដ្ឋាភិបាល។
ជាអ្នកនិយមកាន់ជំនឿគ្រិស្តសាសនា លោក ឡរ៉ែនស៍ វ័ង ជាមនុស្សស្រឡាញ់សត្វឆ្កែ ជាអ្នកងប់នឹងសៀវភៅ និងមានជំនក់ចិត្តនឹងភ្លេងតន្ត្រី។ លោកស្រឡាញ់ភ្លេងតាំងពីក្មេងវ័យ។ ពេលអាយុ៨ឆ្នាំ ឪពុកបានផ្តល់អំណោយហ្គីតា១ទៅលោក។
ប្រសូត្រនៅឆ្នាំ១៩៧២ ក្នុងគ្រួសារកម្រិតជីវភាពសាមញ្ញ ឪពុកជាអ្នកលក់ដូរ ម្តាយជាគ្រូបង្រៀនបឋមសិក្សា។ កាលពីយុវភាព ខណៈពេលដែលកូនចៅអភិជនរៀននៅសាលាល្បីៗនៅអាមេរិក និងអង់គ្លេស ដូចជា Harvard, Oxford ឬ Cambridge ផ្ទុយទៅវិញ លោក ឡរ៉ែនស៍ វ័ង រៀននៅសាលាធម្មតាៗក្នុងស្រុក ដែលលោកបញ្ជាក់ថា ចង់នៅជិតផ្ទះ ជិតមិត្តភក្តិ។ នេះបើតាមអ្វីដែល លោក ឡរ៉ែនស៍ វ័ង ធ្លាប់បានផ្តល់សម្ភាសឲ្យសារព័ត៌មាន នាពេលកន្លងទៅ។ ពេលចូលថ្នាក់មហាវិទ្យាល័យ លោកក៏បានជ្រើសរើសទៅរៀនជំនាញសេដ្ឋកិច្ចនៅសកលវិទ្យាល័យ Wisconsin–Madison នៅសហរដ្ឋអាមេរិក ហើយលោកក៏មានសញ្ញាបត្រអនុបណ្ឌិត រដ្ឋបាលសាធារណៈ ពីសាលាអាមេរិក Harvard Kennedy School ដ៏ល្បីល្បាញ។
តាំងពីបុរីរដ្ឋសិង្ហបុរី ទទួលឯករាជ្យ ឆ្នាំ១៩៦៥ លោក ឡរ៉ែនស៍ វ័ង ជានាយករដ្ឋមន្ត្រី ជំនាន់ ទី៤ ហើយនិងជាប្រមុខរដ្ឋាភិបាល ទី២ ដែលគ្មានជាប់ឈ្មោះវង្សត្រូកូល លី។ ហេតុដូច្នេះហើយ ទើបលោកត្រូវតែប្រឹងប្រែងខ្លាំងសម្បើមណាស់ ដើម្បីបង្កើនមូលដ្ឋានគ្រឹះក្នុងរជ្ជកាលដឹកនាំរបស់ខ្លួន។
បើតាមអ្នកជំនាញកិច្ចការសិង្ហបុរី លោក ឡរ៉ែនស៍ វ័ង អាចនឹងមានសិល្បៈដឹកនាំប្រទេស ខុសប្លែកពីនាយករដ្ឋមន្ត្រី លី សៀនឡុង។ លោក លី សៀនឡុង ដែលចង់ឲ្យគេគោរពកោតខ្លាច ជាងឲ្យគេស្រឡាញ់។ ទោះយ៉ាងណាក្តី ឧបសគ្គប្រឈមធំទី១របស់លោក ឡរ៉ែនស៍ វ័ង ត្រូវដឹកនាំគណបក្សកាន់អំណាចនិងប្រទេសជាតិ ដែលកំពុងរងរឿងអាស្រូវពុករលួយ ក្នុងជួររដ្ឋាភិបាលដែលធ្លាប់អួតថាគ្មានអំពើពុករលួយ។ ដ្បិតថា អ្នកតំណាងរាស្ត្រ២នាក់បានលាចុះពីតំណែងនិងរដ្ឋមន្ត្រីក្រសួងដឹកជញ្ជូន បានជាប់ចោទប្រកាន់ក្នុងសំណុំរឿងពុករលួយ។ ម្យ៉ាងទៀត លោកនាយករដ្ឋមន្ត្រីថ្មី ក៏ត្រូវប្រឈមនឹងការរៀបចំបោះឆ្នោតជាតិ ដែលបាំងតែ ជាង១ឆ្នាំប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ