អង់គ្លេសបើកសវនាការកាត់ទោសជនជាប់ចោទក្នុងសំណុំរឿងអន្តោប្រវេសន៍ស្លាប់ក្នុងឡានកាមីញ៉ុង
មួយឆ្នាំក្រោយការរកឃើញសាកសពអន្តោប្រវេសន៍វៀតណាម៣៩នាក់ក្នុងឡានកាមីញ៉ុង នៅក្បែរទីក្រុងឡុងដ៍មក អង់គ្លេសបានបើកសវនាការ នៅថ្ងៃចន្ទទី ៥ តុលា ២០២០ កាត់ទោសបុរស៤នាក់។ កាលពីខែកញ្ញា វៀតណាមក៏បានកាត់ទោសមនុស្ស៧នាក់ដែរ ដែលមានជាប់ពាក់ព័ន្ធនឹងសំណុំរឿងនេះ។
ចុះផ្សាយនៅថ្ងៃ៖
តុលាការឧក្រិដ្ឋកម្ម Old Bailey នៅទីក្រុងឡុងដ៍បានបើកសវនាការកាត់ទោសជនបួននាក់ អាយុ២៣ដល់៤៣ឆ្នាំ ពីបទសម្លាប់មនុស្សដោយអចេតនា និងពីបទបានជួយឱ្យមានបណ្តាញអន្តោប្រវេសន៍ខុសច្បាប់។ ប៉ុន្តែជនជាប់ទាំងអស់ បានបដិសេធទាំងស្រុងចំពោះបទចោទប្រកាន់នេះ។
ចំណែកជនជាប់ចោទសំខាន់ជាងគេ គឺអ្នកបើកបរឡានកាមីញ៉ុង ឈ្មោះ Maurice Robinson រស់នៅអៀរឡង់ខាងជើង និងជនជាតិអៀរឡង់ម្នាក់ទៀត ដែលជាប់សង្ស័យថាជាអ្នករៀបចំបណ្តាញដឹកជញ្ជូនចលនាជួញដូរមនុស្ស នឹងត្រូវតុលាការសម្រេចទោសនៅក្នុងអង្គសវនាការជំនុំជម្រះ នៅលើក្រោយ។
ក្នុងសំណុំរឿងតែមួយនេះ នៅប្រទេសវៀតណាម តុលាការក្រុងហាទិញ ក៏បានបើកសវនាការ រួចហើយ កាលពីថ្ងៃចន្ទ ទី ១៤កញ្ញា ២០២០ កាត់ទោសជន៧នាក់ពីបទរត់ពន្ធជួញដូរមនុស្សរហូតដល់បាត់ជីវិត។ ជនជាប់ចោទបួននាក់ អាយុពី២៦ទៅ៣៦ឆ្នាំ ឱ្យជាប់ពន្ធនាគារ ទៅតាមទម្ងន់ទោសម្នាក់ ពី ២ឆ្នាំកន្លះទៅ ៧ឆ្នាំកន្លះ។ បីនាក់ផ្សេងទៀត ត្រូវជាប់ទោសដែរតែនៅក្រៅឃុំ។
សវនាការកាត់ទោស នៅអង់គ្លេស និងវៀតណាម នេះជាការវែកបង្ហាញឱ្យឃើញអំពីគ្រោះថ្នាក់នៃអន្តោប្រវេសន៍ខុសច្បាប់ ដែលក្រុមជួញដូរមនុស្សបានឆ្លៀតយកចំណេញពីជនចង់ធ្វើអន្តោប្រវេសន៍ដើម្បីជីវភាព។ តែជាញឹកញយជនអន្តោប្រវេសន៍ខុសច្បាប់ច្រើនតែធ្លាក់ក្នុងអន្លង់គ្រោះថ្នាក់ មានស្ថាភាពស្ទើរដូចទាសករ ក្នុងហាងកាត់ក្រចក ឬក្នុងចំការកញ្ឆា នៅអង់គ្លេស។
សូមរំលឹកថា កាលពីថ្ងៃទី ២៣តុលា ឆ្នាំ២០១៩ ប៉ូលិសអង់គ្លេសបានរកឃើញសាកសពមនុស្សប្រុស៣១នាក់ ស្ត្រី៨នាក់ ក្នុងនោះពីរនាក់ជាក្មេងជំទង់អាយុ១៥ឆ្នាំ ស្លាប់ដោយថប់ដង្ហើមក្នុងឡានកាមីញ៉ុង ចតចោលទៅតំបន់ឧស្សាហកម្ម ប៉ែកខាងកើតក្រុងឡុងដ៍។ ឡានកាមីញ៉ុងដឹកទំនិញមានបំពាក់ម៉ាស៊ីនត្រាំជាក់ នេះ ធ្វើដំណើរចេញមកពីកំពង់ផែ Zeebruges ប៊ែលហ្សិក។ ជនរងគ្រោះទាំង៣៩នាក់ ជាជនជាតិវៀតណាមមានដើមកំណើតនៅក្នុងតំបន់ក្រីក្រភាគកណ្តាលនៃប្រទេសវៀតណាម។
ក្រៅពីអង់គ្លេសនិងវៀតណាម ដែលជាប្រទេសពាក់ព័ន្ធផ្ទាល់ បារាំងនិងប៊ែលហ្សិកក៏បានបើកអង្កេតនិងធ្វើការចាប់ខ្លួនជនសង្ស័យចំនួន១៣នាក់ បន្ទាប់ពីមានប្រតិបត្តិការរបស់ប៉ូលិសអន្តរជាតិ សម្របសម្រួលដោយស្ថាប័នអន្តរអឺរ៉ុប។ ហើយសវនាការនៅអង់គ្លេសនេះ ប្រព្រឹត្តទៅជួនចំពេលដែលអង់គ្លេសកំពុងប្រឈមនឹងរលកអន្តោប្រវេសន៍ខុសច្បាប់ប៉ុនប៉ងឆ្លងសមុទ្ធទៅ និងចំពេលដែលរដ្ឋាភិបាលក្រុងឡុងដ៍ទើបបានប្រកាស នៅថ្ងៃអាទិត្យទី ៤តុលា ២០២០ ស្តារប្រព័ន្ធសុំសិទ្ធិជ្រកកោននៅអង់គ្លេស។ ប៉ុន្តែរដ្ឋមន្ត្រីក្រសួងមហាផ្ទៃមិនបានលម្អិតថានឹងមានការប្រែប្រួលក្នុងទម្រង់ណាឡើយ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ