ដោយហេតុកូវីដ១៩ អង់គ្លេសនឹងកាត់បន្ថយជំនួយអភិវឌ្ឍន៍ដល់ប្រទេសក្រីក្រ
បើទោះបីជាមានសំឡេងអំពាវនាវ យ៉ាងច្រើនសន្ធឹកសន្ធាប់ កុំឱ្យមើលរំលងប្រទេសក្រីក្រនៅលើពិភពលោកយ៉ាងណាក៏ដោយ ក៏អង់គ្លេសបានអារកាត់សេចក្តី នៅថ្ងៃពុធទី ២៥ វិច្ឆិកា ២០២០ ប្រកាសកាត់បន្ថយជំនួយអភិវឌ្ឍន៍ របស់ខ្លួន ចាប់ពី ឆ្នាំ ក្រោយទៅ។ រដ្ឋាភិបាលអង់គ្លេស សម្រេចចិត្តបែបនេះ ក៏ព្រោះតែប្រទេសជួបវិបត្តិហិរញ្ញវត្ថុយ៉ាងធ្ងន់ធ្ងរ បង្កឡើងជំងឺរាតត្បាតសកលកូវីដ១៩។ អង់គ្លេសសន្យានឹងបង្កើនជំនួយអភិវឌ្ឍន៍វិញ នៅពេលស្ថានភាពហិរញ្ញវត្ថុបានប្រសើរឡើង។
ចុះផ្សាយនៅថ្ងៃ៖
ស្តាប់ - ០២:៣៩
“ក្នុងដំណាក់កាលដែលប្រទេសកំពុងធ្លាក់ក្នុងវិបត្តិដ៏ធ្ងន់ធ្ងរមិនធ្លាប់មានក្នុងប្រវត្តិសាស្ត្រ រដ្ឋាភិបាលត្រូវធ្វើសេចក្តីសម្រេចចិត្តដ៏លំបាកមួយ គឺបង្ខំចិត្តបញ្ចុះជំនួយអភិវឌ្ឍន៍ មកត្រឹម ០,៥%នៃចំនូលជាតិ ទល់នឹង០,៧%កាលពីឆ្នាំៗមុន” ពោលគឺជំនួយអភិវឌ្ឍន៍នៅឆ្នាំក្រោយនឹងមានទំហំប្រមាណ ១១ពាន់លានអឺរ៉ូ ទល់នឹងទម្លាប់ពីមុន ជាង១៦លានអឺរ៉ូ។ នេះជាប្រសាសន៍របស់លោក Rishi Sunak រដ្ឋមន្ត្រីក្រសួងហិរញ្ញវត្ថុអង់គ្លេសទៅកាន់អង្គសភា។
សម្រាប់លោករដ្ឋមន្ត្រី វិបត្តិកូវីដ១៩ បានធ្វើទាញទម្លាក់ស្ថានភាពសេដ្ឋកិច្ចហិរញ្ញវត្ថុអង់គ្លេសឱ្យធ្លាក់ដុនដាបខ្លាំងណាស់។ ផលិតផលសរុបក្នុងស្រុក បានដាំក្បាលចុះអស់១១,៣%នៅឆ្នាំ២០២០។ កំណើនសេដ្ឋកិច្ចអាចនឹងកើនឡើងវិញចំនួន ៥,៥%នៅឆ្នាំ២០២១ និង៦,៦%នៅឆ្នាំ២០២២។ មានន័យថាគេត្រូវរង់ចាំរហូតដល់ឆ្នាំ២០២២ ទើបសេដ្ឋកិច្ចអង់គ្លេសអាចវិលមកភាពធម្មតាស្មើស្ថានភាពមុនកូវីដ១៩បាន។ តែភាពបន្ទាន់សុខាភិបាលមិនទាន់រលត់ទេ ឯភាពបន្ទាន់សេដ្ឋកិច្ចទើបនឹងចាប់ផ្តើមតែប៉ុណ្ណោះ។ អត្រាអ្នកអត់ការងារធ្វើឡើងដល់កំពូលនៅពាក់កណ្តាលឆ្នាំ២០២១។
ដើម្បីការពារជីវិត និងកំរិតជីវភាពរបស់ប្រជាពលរដ្ឋអង់គ្លេស រដ្ឋាភិបាលត្រូវការចំណាយដ៏ធំសម្បើមណាស់ ៖ ជាង៣១៤ពាន់លានសម្រាប់ជួយស្រោចស្រង់សេដ្ឋកិច្ច និងជាង៦១ពាន់លានសម្រាប់សេវាសាធារណៈ។ ដូច្នេះ ក្នុងខណៈដែលអង់គ្លេសត្រូវផ្តល់អាទិភាពដល់វិស័យការងារ និងទ្រទ្រង់សេវាសាធារណៈជាមួយថវិកាមានកំរិត ចំណាយដល់០,៧%សម្រាប់ជួយអ្នកក្រៅពិតជាមិនសមហេតុផលទេ។ នេះជាពន្យល់លម្អិតរបស់លោករដ្ឋមន្ត្រី ដោយសន្យាថា ជំនួយអភិវឌ្ឍន៍នឹងឡើងដូចដើមវិញ នៅពេលណាស្ថានភាពហិរញ្ញវត្ថុអនុញ្ញាត។
សូមបញ្ជាក់ថា តាំងពីមុនសេចក្តីប្រកាសរបស់លោករដ្ឋមន្ត្រីក្រសួងហិរញ្ញវត្ថុ មានឥស្សរជនជាច្រើនបាននាំគ្នាសម្តែងក្តីព្រួយបារម្ភរួចជាស្រេចទៅហើយ ថានឹងរដ្ឋាភិបាលអង់គ្លេសនឹងកាត់ជំនួយក្រៅប្រទេស។ នាង Malala Yousafzai ជាជ័យលាភីរង្វាន់ណូបែលសន្តិភាព បានរំលឹកថាកូវីដ១៩បានធ្វើក្មេងស្រីជាង២០លាននាក់លែងទៅរៀន។ ដើម្បីឱ្យក្មេងស្រីទាំងអស់នេះបានបន្តការសិក្សាវិញ ទាល់តែមេដឹកនាំពិភពលោកបន្តផ្តល់ជំនួយអភិវឌ្ឍន៍ក្នុងវិស័យអប់រំ។
អតីតនាយករដ្ឋមន្ត្រីអង់គ្លេសជាច្រើនរូបរាប់តាំងពីលោក John Major, Tony Blair, Gordon Brown, David Cameronនិង លោកស្រី Theresa May ព្រមទាំងសមាគមអង្គការក្រៅរដ្ឋាភិបាលចំនួន១៨៧ រាប់ទាំង Greenpeace UK និង Save the Children សុទ្ធក៏បានបង្ហាញអរិភាពនឹងផែនការកាត់បន្ថយជំនួយអភិវឌ្ឍន៍នេះទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ