រុស្ស៊ីបើកការវាយប្រហារចម្រុះលើក្រុងជាច្រើនរបស់អ៊ុយក្រែន ក្នុងពេលតែមួយ
នៅថ្ងៃសុក្រទី ២៩ធ្នូនេះ រុស្ស៊ីបានបើកប្រតិបត្តិការវាយប្រហារមួយខ្សែធំលើអ៊ុយក្រែនទាំងមូល រាប់ទាំងរដ្ឋធានីកៀវផង។ សម្រាប់កៀវ រលកវាយប្រហារថ្មីនេះស្តែងឱ្យឃើញថាអ៊ុយក្រែនត្រូវការជំនួយបន្ថែមទៀតពីសហគមន៍អន្តរជាតិ។
ចុះផ្សាយនៅថ្ងៃ៖
ស្តាប់ - ០៣:៣០
អ៊ុយក្រែនមិនធ្លាប់រងការវាយប្រហារធ្ងន់ធ្ងរបែបនេះអស់ពេលមួយឆ្នាំមកហើយ។ តាំងពីព្រហាមម៉ោង៥ព្រឹកថ្ងៃសុក្រនេះមក សំឡេងស្នូរស៊ីរ៉ែនប្រកាសអាសន្នបានលាន់ឮស្ទើរពេញផ្ទៃប្រទេស។ រដ្ឋធានីកៀវ ក្រុងខាគីវនៅភាគឦសានប្រទេស ក្រុងលីវ នៅភាគខាងលិច ក្រុងអូដេសា ឬ Dnipro ភាគខាងត្បូង កំពុងក្លាយជាផ្ទាំងស៊ីបនៃការវាយប្រហាររុស្ស៊ីទាំងអស់។ អាជ្ញាធរមូលដ្ឋានបានអះអាងថាចំនួនចំនួនជនរងគ្រោះបាត់បង់ជីវិតនិងការខាតបង់អាចនឹងធ្ងន់ធ្ងរខ្លាំង។
យោធាអ៊ុយក្រែនបានចាត់ទុកការវាយប្រហាររបស់រុស្ស៊ីលើកនេះថាមានលក្ខណៈដ៏ធំសម្បើម ដោយប្រើយុទ្ធសាស្ត្រសម្រុករួម លើក្រុងអ៊ុយក្រែនជាច្រើន ក្នុងពេលតែមួយ ជាមួយនឹងការប្រើមធ្យោបាយផ្គុំគ្នាទៀត គឺ ដ្រូនផង មីស៊ីលអ៊ីពែសូនិកផង មីស៊ីលបាលីស្ទិក និងមីស៊ីលបណ្តែតទៀត។ បើតាមលោកប្រធានាធិបតីអ៊ុយក្រែន ហ្សេឡេនស្គី រុស្ស៊ីបានបាញ់មីស៊ីលចំនួនជាង១០០ តែភាគច្រើនត្រូវចាប់បាន។
លីវ ក្រុងភាគខាងលិចបំផុតនៃប្រទេស ដែលកម្ររងគ្រោះ ក៏ស្រាប់តែត្រូវរុស្ស៊ីដៅវាយប្រហារពីរលើកដោយដ្រូនមីស៊ីលShaheds និងបង្កឱ្យមានការខូតខាតឆេះទីតាំងដ៏សំខាន់មួយ។ ប៉ុន្តែអាជ្ញាធរមិនបានលម្អិតព្រឹត្តិការណ៍នេះទេ។ នៅអូដេសាភាគខាងត្បូងវិញ ការវាយប្រហាររុស្ស៊ីបានបង្កឱ្យមានអគ្គិភ័យអាគារស្នាក់នៅមួយ។ ក្រុងខាគីវរងការវាយប្រហារយ៉ាង១០ដង ជាពីរដំណាក់ ដោយប្រើមីស៊ីលS-300 និងX-22 បំផ្លាញមន្ទីរពេទ្យអស់មួយផ្នែក។ នេះបើតាមការបញ្ជាក់របស់ចៅហ្វាយក្រុងខាគីវ។
នៅរដ្ឋធានី មានស្នូរផ្ទុះជាច្រើនកន្លែង បើទោះបីជាប្រព័ន្ធខែលមីស៊ីលអាកាសដំណើរការយ៉ាងសកម្មក៏ដោយ។ មីស៊ីលជាច្រើនបានបាញ់សំដៅក្រុងកៀវនិងជនស៊ីវិលជាថ្មី។ នេះបើតាមសារតេឡេក្រាមរបស់លោក អង់ឌ្រីអ៊ី យេម៉ាក់ប្រធានខុទ្ទកាល័យប្រធានាធិបតីអ៊ុយក្រែន។ លោក យ៉េម៉ាក់បានអះអាងទៀតថា អ៊ុយក្រែនប្រឹងអស់ពីសមត្ថភាពក្នុងការពង្រឹងប្រព័ន្ធការពារអាកាសរបស់ខ្លួន ប៉ុន្តែពិភពលោកត្រូវយល់ថាយើងត្រូវការជំនួយ និងមធ្យោបាយបន្ថែមដើម្បីបញ្ឈប់ទង្វើរបស់រុស្ស៊ី។ សម្រាប់លោកប្រធានខុទ្ទការល័យប្រធានាធិបតី ការវាយប្រហាររបស់យោធារុស្ស៊ីនេះ ស្តែងឱ្យឃើញថាសហគមន៍អន្តរជាតិត្រូវតែផ្តល់ជំនួយបន្ថែមដល់អ៊ុយក្រែន។
រលកវាយប្រហាររុស្ស៊ីនេះ ធ្វើឡើងតែបួនថ្ងៃក្រោយពីអ៊ុយក្រែនបានបំផ្លាញនាវាចម្បាំងរុស្ស៊ីមួយរឿងនៅកំពង់ផែគ្រីមេ។ កាលពីសប្តាហ៍មុន រុស្ស៊ីក៏បានបាត់បង់យន្តហោះប្រដេញ ៥គ្រឿងទៀត ដោយស្នាដៃរបស់ ក្រុមការពារអាកាសអ៊ុយក្រែន។ បើតាមអ្នកទទួលខុសត្រូវជាន់ខ្ពស់អាល្លឺម៉ង់ រុស្ស៊ីរងការខាតបង់កម្លាំងទាហាន (ប្រមាណ៣១៥០០០នាក់ ស្លាប់ឬឬរបួស) និងសម្ភារៈជារថពាសដែករថក្រោះធ្ងន់ធ្ងរណាស់ អាចដល់រាប់ពាន់គ្រឿង។ យោធារុស្ស៊ីនឹងចុះខ្សោយក្រោយចប់សង្គ្រាមនៅអ៊ុយក្រែន។ ប៉ុន្តែទន្ទឹមពេលជាមួយគ្នានោះ រុស្ស៊ីអាចប្រមូលទាហានស្ម័គ្រចិត្តបានដល់ទៅ៤៨៦០០០នាក់នៅឆ្នាំ២០២៣ និងអាចបន្តពង្រឹងសមត្ថភាពយោធាតាមរយៈការទទួលជំនួយគ្រាប់រំសេវពីកូរ៉េខាងជើង។ អ្នកជំនាញអាល្លឺម៉ង់បានទទួលស្គាល់ថារុស្ស៊ីមានសមត្ថភាពក្រាញខ្លាំងជាងការគិតរបស់លោកខាងលិចពីដំបូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ