អ៊ុយក្រែន៖ ស្លាប់បុគ្គលិកអង្គការមនុស្សធម៌ជនជាតិបារាំង២នាក់ ដោយការបាញ់ប្លោងគ្រាប់របស់រុស្ស៊ី
សង្គ្រាមអ៊ុយក្រែន – បុគ្គលិកអង្គការមនុស្សធម៌ ជនជាតិបារាំង២នាក់ បានស្លាប់នៅភាគខាងត្បូងអ៊ុយក្រែន កៀកនឹងសមរភូមិជួរមុខបំផុត ដែលកងទ័ពរុស្ស៊ីនិងអ៊ុយក្រែនតទល់គ្នា។ ផ្អែកតាមលិខិតប្រកាសរបស់ក្រសួងការបរទេសបារាំង កាលពីថ្ងៃសុក្រម្សិលមិញ គឺការស្លាប់នេះ បណ្តាលមកពីការបាញ់ទម្លាក់គ្រាប់របស់រុស្ស៊ី។ បារាំងចាត់ទុកអំពើនេះ ជាអំពើសាហាវព្រៃផ្សៃ បង្កឡើងដោយកងទ័ពរុស្ស៊ី ។
ចុះផ្សាយនៅថ្ងៃ៖
ស្តាប់ - ០២:០៩
កងទ័ពរុស្ស៊ីបានបាញ់ប្លោងគ្រាប់ នៅត្រង់ចំណុចភូមិ Beryslav ដែលស្ថិតនៅជាប់មាត់ទន្លេ Dniepr ភាគខាងត្បូងអ៊ុយក្រែន។ តំបន់នេះ គឺជាខ្សែពុះចែក នៃសមរភូមិតទល់គ្នា រវាងកងទ័ពរុស្ស៊ីនិងអ៊ុយក្រែន។ យោងតាមលិខិតប្រកាស ក្រសួងការបរទេសបារាំង នៅថ្ងៃសុក្រទី២កុម្ភៈ គឺការវាយប្រហាររបស់រុស្ស៊ីនេះ បានបណ្តាលឲ្យស្លាប់ បុគ្គលិកអង្គការមនុស្សធម៌ ជនជាតិបារាំង២នាក់ និងរបួសជនជាតិបារាំង៣នាក់ទៀត។ រដ្ឋាភិបាលបារាំង ចាត់ទុកការវាយប្រហារមកលើក្រុមការងារអង្គការមនុស្សធម៌នេះ ថាជាអំពើសាហាវព្រៃផ្សៃ ធ្វើឡើងដោយកងទ័ពរុស្ស៊ី។
គួរបញ្ជាក់ ដំណឹងនេះ ត្រូវបានអះអាងផងដែរ ដោយលោក Oleksandr Prokoudine អភិបាលតំបន់ Kherson ជាទីដែលភូមិ Beryslav ស្ថិតនៅ។ មន្ត្រីអ៊ុយក្រែនរូបនេះ លើកឡើងថា កងទ័ពរុស្ស៊ីបានបាញ់ប្លោងគ្រាប់ បណ្តាលឲ្យស្លាប់បុគ្គលិកអង្គការមនុស្សធម៌ជនជាតិបារាំង២នាក់ និងរបួស៤នាក់ទៀត ក្នុងនោះជនជាតិបារាំង៣នាក់ ជនជាតិអ៊ុយក្រែនម្នាក់។
ផ្អែកតាមទីភ្នាក់ងារព័ត៌មានបារាំង AFP រដ្ឋអាជ្ញាបារាំងទទួលបន្ទុកសំណុំរឿងភេរវកម្ម បានចាប់ផ្តើមការស៊ើបអង្កេត ជុំវិញករណីវាយប្រហារ ដែលបណ្តាលឲ្យស្លាប់ជនជាតិបារាំង២នាក់នេះ។ ការស៊ើបអង្កេតនេះ គឺផ្តោតទៅលើ ករណី ឧក្រិដ្ឋកម្មសង្រ្គាម និងការសម្លាប់ដោយចេតនា ធ្វើទៅលើមនុស្សដែលមានការការពារ ពីច្បាប់មនុស្សធម៌អន្តរជាតិ។
យ៉ាងណាមិញ នៅព្រឹកថ្ងៃសៅរ៍ទី៣កុម្ភៈ អង្គការក្រៅរដ្ឋាភិបាល ស្វ៊ីស EPER បានចេញលិខិតប្រកាសមួយ ដោយអះអាងថា ក្រុមការងារសហសេវិករបស់អង្គការជាច្រើននាក់ ដែលកំពុងបំពេញការងារមនុស្សធម៌ នៅភាគខាងត្បូងអ៊ុយក្រែន បានរងការវាយប្រហារដោយការបាញ់ទម្លាក់គ្រាប់បែក។ ហេតុការណ៍នេះ បានបណ្តាលឲ្យសហសេវិកជនជាតិបារាំង ចំនួន២នាក់ និងរបួសច្រើននាក់។
នៅលើបណ្តាញសង្គម X លោកប្រធានាធិបតីបារាំង អេម៉ានុយអែល ម៉ាក្រុង បានចាត់ទុកការវាយប្រហាររបស់កងទ័ពរុស្ស៊ីនេះ ថាជាអំពើកំសាក និងថោកទាបបំផុត។ នៅលើបណ្តាញសង្គមដែរ លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានចូលរួមថ្លែងមរណៈទុក្ខ និងបានឧទ្ទិសវិញ្ញាណក្ខន្ធ ដល់ជនជាតិបារាំងទាំង២នាក់ ដែលបានពលីជីវិត ដើម្បីបុព្វហេតុមនុស្សធម៌ ជួយប្រជាជនស៊ីវីលអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ