កុបកម្មហិង្សានៅកោះនូវែលកាឡេដូនី៖ ស្លាប់មនុស្ស៦នាក់ ស្ថានការណ៍នៅឆ្ងាយពីភាពស្ងប់ស្ងាត់
អស់មួយសប្តាហ៍មកហើយ ដែលកោះនូវែលកាឡេដូនី ដែនដីនាយសមុទ្ររបស់បារាំង បានពើបប្រទះនឹងអំពើកុបកម្មហិង្សា អាណាធិបតេយ្យ បង្កឡើងដោយសកម្មជនឯករាជ្យនិយមជនជាតិដើមកាណាក់ ដែលប្រឆាំងនឹងការធ្វើកំណែទម្រង់ច្បាប់បោះឆ្នោត។ គិតត្រឹមពេលនេះ មានស្លាប់មនុស្សចំនួន៦នាក់ ចំណែកសេវាសាធារណៈ សាលារៀន ផ្សារលក់ទំនិញ ត្រូវបទទ្វារទាំងស្រុង ដោយសារតែខ្លាចក្រែងអំពើហិង្សារបស់ក្រុមកុបករ។ បើទោះបីមានការអំពាវនាវពីរដ្ឋាភិបាលបារាំង ដើម្បីបង្កើតបរិយាកាសសុន្ទនា ចរចាគ្នា តែស្ថានការណ៍ ហាក់ដូចជាស្ថិតនៅឆ្ងាយពីភាពស្ងប់ស្ងាត់ណាស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:០១
មួយសប្តាហ៍បន្ទាប់ពីមានកុបកម្មហិង្សា អាណាធិបតេយ្យ ២យប់កន្លងមកនេះ ស្ថានការណ៍ហាក់បានស្ងប់បន្តិច នៅទីក្រុងនូម៉េអា ទីក្រុងធំនៃកោះនូវែលកាឡេដូនីដែនដីនាយសមុទ្ររបស់បារាំង។ កុបករ ដែលជាក្រុមសកម្មជនឯករាជ្យនិយមជនជាតិដើមកាណាក់ បានដុតរថយន្ត ដុតអគារ វាយកំទេចសំណង់សាធារណៈ និងបានដាក់រនាំងរារាំងចរាចរណ៍។ ក្រុមជនហិង្សាខ្លះ បានឆក់ឱកាសវាយកំទេចទ្វារ ចូលទៅលួចយកទំនិញ បង្កការខូចខាតយ៉ាងដំណំ។ គិតត្រឹមពេលនេះ មានមនុស្សស្លាប់ចំនួន៦នាក់។
ថ្ងៃសៅរ៍ទី១៨ឧសភា នៅតាមកញ្ចក់ទូរទស្សន៍ BFMTV លោក Philippe Blaise អនុប្រធានខេត្តខាងត្បូងនៃកោះនូវែលកាឡេដូនី បានលើកឡើងថា នីតិរដ្ឋ សន្តិសុខសណ្តាប់សាធារណៈ នៅមិនទាន់បានត្រលប់មករកភាពប្រក្រតីវិញទូទាំងនូវែលកាឡេដូនីទេ។ ដូចគ្នាដែរ លោកស្រី Sonia Lagarde អភិបាលក្រុងនូម៉េអា បានលើកឡើងថា ស្ថានការណ៍នៅឆ្ងាយខ្លាំងណាស់ ពីភាពស្ងប់ស្ងាត់។ លោកស្រីបានចាត់ទុកថា ទីក្រុងនូម៉េអា កំពុងតែក្លាយជាទីក្រុង ដែលត្រូវឡោមព័ទ្ធជាប់ ដោយក្រុមកុបករហិង្សា។
សូមបញ្ជាក់ថា ចាប់ពីថ្ងៃពុធមក អាជ្ញាធរកោះនូវែលកាឡេដូនី បានដាក់បំរាមគោលចរ ហាមចេញក្រៅផ្ទះ ពីម៉ោង៦ល្ងាចដល់ម៉ោង៦ព្រឹក ខណៈប្រជាជនត្រូវសំងំនៅក្នុងផ្ទះ គ្មានទំនិញប្រើប្រាស់ និងអស់ស្តុកចំណីអាហារ។ មនុស្សយ៉ាងហោច៣២០០នាក់ ត្រូវជាប់គាំងមិនអាចចាកចេញពីកោះ ឬធ្វើដំណើរចូលបាន ដោយសារតែជើងហោះហើរត្រូវបិទទាំងស្រុង។
រដ្ឋាភិបាលបារាំង បានបញ្ចេញកម្លាំងសមត្ថកិច្ចសន្តិសុខផ្ទៃក្នុង សរុបទាំងអស់២៧០០នាក់ ដើម្បីការពារសន្តិសុខ និងបំបែកក្រុមកុបករ។ នៅទីក្រុងនូម៉េអា តាមផ្លូវនានា គេសង្កេតឃើញតែបំណែកកម្ទេចកំទី ដែលឆេះខ្លោច ដោយសារអំពើហិង្សារបស់កុបករ។ ក្រៅពីសាលារៀន ទីផ្សារហាងទំនិញដែលត្រូវបិទទ្វារ សេវាសាធារណៈមន្ទីរពេទ្យ ត្រូវជួបឧបសគ្គយ៉ាងខ្លាំង ដោយសារតែរនាំងបិទខ្ទប់របស់ហ្វូងបាតុករ។ គិតត្រឹមព្រឹកថ្ងៃសៅរ៍ទី១៨ឧសភា មានកុបករហិង្សាចំនួន ១៦៣នាក់ត្រូវបានសមត្ថកិច្ចឃាត់ខ្លួន និង២៦នាក់ត្រូវបានបញ្ជូនទៅកាន់តុលាការភ្លាមៗ។ បណ្តាញសង្គមTikTok ត្រូវបានហាមឃាត់លែងឲ្យប្រើប្រាស់ ជាបណ្តោះអាសន្នទូទាំងកោះនូវែលកាឡេដូនី។
លោក Louis Le Franc ស្នងការជាន់ខ្ពស់នៃសាធារណរដ្ឋបារាំង បានលើកឡើងថា យ៉ាងហោចណាស់ សង្កាត់ក្រីក្រចំនួន៣ នៅក្រុងនូម៉េអា ដែលស្ថិតនៅក្នុងដៃរបស់ក្រុមកុបករហិង្សាទាំងស្រុង។ លោកបានសន្យាថា រដ្ឋាភិបាលបារាំងបញ្ជូនស្បៀងអាហារ ព្រមទាំងសម្ភារៈចាំបាច់ដឹកតាមយន្តហោះពីម៉េត្រូប៉ូលទៅកាន់កោះនូវែលកាឡេដូនី បើទោះបីស្ថិតនៅចម្ងាយដល់ទៅ១៦០០០គីឡូម៉ែត្រពីគ្នា។
គួរបញ្ជាក់ថា កុបកម្មហិង្សានៅកោះនូវែលកាឡេដូនី បានផ្ទុះឡើងបន្ទាប់ពីរដ្ឋសភាបារាំងបានបើកការប្រជុំពិភាក្សា ធ្វើកំណែទម្រង់ច្បាប់បោះឆ្នោតនៅតំបន់នេះ។ ជាកំណែទម្រង់ ដែលក្រុមឯករាជ្យនិយមជនជាតិដើមកាណាក់ អះអាងថា នឹងធ្វើឲ្យពួកគេបាត់បង់សំឡេងឥទ្ធិពល នៅក្នុងការបោះឆ្នោត។ យ៉ាងណាក៏ដោយ កាលពីថ្ងៃអង្គារនិងថ្ងៃពុធ ច្បាប់កំណែទម្រង់នេះត្រូវរដ្ឋសភានិងព្រឹទ្ធសភាបារាំង បោះឆ្នោតអនុម័ត។ តែច្បាប់ថ្មីនេះ ត្រូវឆ្លងកាត់ការបោះឆ្នោតមួយទៀត ពីសំណាក់កុងហ្ក្រេ សមាជិករដ្ឋសភានិងសមាជិកព្រឹទ្ធសភាបញ្ចូលគ្នា។ ប្រធានសភាបារាំងទាំង២អង្គ បានថ្លែងអំពាវនាវ ឲ្យបង្កើតក្រុមការងារបេសកកម្មសន្ទនានិងចរចា រវាងក្រុមនយោបាយនៅនូវែលកាឡេដូនី ដើម្បីឈានទៅរកកិច្ចព្រមព្រៀងរួមមួយ ដោះស្រាយវិបត្តិ។
ដោយឡែក សមាជិកព្រឹទ្ធសភាបារាំងម្នាក់ឈ្មោះ Claude Malhuret បានលើកឡើងថា ចិនបានចូលរួមពួនពីក្រោយសកម្មភាពកុបកម្មហិង្សានៅនូវែលកាឡេដូនី តាមរយៈបណ្តាញសង្គមTikTok ។ លោកបានបន្ថែម ចិនមានយុទ្ធសាស្ត្រ ពន្យុះឲ្យប្រជាជនកាណាក់នៅនូវែលកាឡេដូនី រើបំរះបះបោរ ស្អប់រដ្ឋបារាំង ដើម្បីឲ្យចិនងាយស្រួលចូលទៅកាន់កោះនេះ ទៅគាស់កកាយយករ៉ែនីកែល។ ប្រជុំកោះនូវែលកាឡេដូនី សំបូរទៅដោយរ៉ែនីកែល ប្រមាណជា២០ ទៅ៣០% នៃស្តុកនីកែលទូទាំងពិភពលោក ដែលគេត្រូវការបំផុតដើម្បីផលិតថ្មអគ្គិសនី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ