ជប៉ុនជួយគាំទ្រសង្រ្គាមប្រឆាំងក្រុមគ្រឿងញៀន នៅហ្វីលីពីន
នាយករដ្ឋមន្រ្តីជប៉ុន ស្ហ៊ីនហ្សូ អាបេ នៅថ្ងៃព្រហស្បតិ៍ ម្សិលមិញ សំដែងការគាំទ្រយុទ្ធនាការប្រឆាំងគ្រឿងញៀន ដ៏ចម្រូងចម្រាស នៅហ្វីលីពីន។ នៅក្នុងដំណើរទស្សនកិច្ចផ្លូវរដ្ឋ រយៈពេល ២ថ្ងៃ នៅហ្វីលីពីន ប្រមុខរដ្ឋាភិបាលជប៉ុនបានសន្យា ជួយឧបត្ថម្ភផ្នែកសង្គម ដូចជាកម្មវិធីព្យាបាល និងបន្សាបគ្រឿងញៀន នៅហ្វីលីពីន។
ចុះផ្សាយនៅថ្ងៃ៖ កែប្រែថ្ងៃទី៖
នៅហ្វីលីពីន លោកនាយករដ្ឋមន្រ្តីជប៉ុន ស៊្ហីនហ្សូ អាបេត្រូវបានទទួលស្វាគម ដោយកក់ក្តៅ បំផុតពីលោករ៉ូឌ្រីហ្គូ ឌុយទែកតេ នៅវិមានប្រធានាធិបតីនៅទីក្រុងម៉ានីល។ លោកអាបេ ជាប្រមុខដឹកនាំបរទេស ទី១ដែលធ្វើដំណើរទស្សនកិច្ច ទៅហ្វីលីពីន ចាប់តាំងពីលោកឌុយទែកតេ ឈ្នះឆ្នោត ក្លាយខ្លួនជាប្រធានាធិបតីហ្វីលីពីន។ នៅខែតុលា ឆ្នាំមុន លោកឌុយទែកតេ ផ្ទាល់ធ្វើដំណើរទៅកាន់ប្រទេសជប៉ុន ដែលជាដៃគូពាណិជ្ជកម្មទី១ និងប្រទេសផ្តល់ជំនួយសំខាន់បំផុតសម្រាប់ហ្វីលីពីន។
នៅក្នុងជំនួបអាហារពេលល្ងាច លោកប្រធានាធិបតីហ្វីលីពីន ឌុយទែកតេ បានលើកសរសើរជប៉ុន ដែលលោកចាត់ទុកជាមិត្តដ៏ជិតស្និទ្ធរបស់ហ្វីលីពីន។ ជាការឆ្លើយតប លោកនាយករដ្ឋមន្រ្តីអាបេ បានប្រកាសថា ជប៉ុននឹងផ្តល់ជំនួយដល់រដ្ឋាភិបាលហ្វីលីពីន សម្រាប់យុទ្ធនាការប្រយុទ្ធប្រឆាំងគ្រឿងញៀន។ ក្នុងរយៈពេល ៦ខែ សង្រ្គាមប្រឆាំងគ្រឿងញៀន របស់លោកឌុយទែកតេ ដែលអាមេរិក និងសហភាពអឺរ៉ុបរិះគន់ថា បានរំលោភសិទ្ធិមនុស្ស បានធ្វើឲ្យមនុស្សស្លាប់ យ៉ាងហោច ៦ពាន់នាក់។
ស្ថិតនៅក្រោមអាណានិគមរបស់អាមេរិក កាលពីអតីតកាល ហ្វីលីពីន ធ្លាប់ត្រូវបានជប៉ុនចូលត្រួតត្រា៣ឆ្នាំ ក្នុងសង្រ្គាមលោកលើកទី២។ ប៉ុន្មានទសវត្សរ៍ចុងក្រោយ ប្រទេសទាំងពីរបានក្លាយជាសម្ព័ន្ធមិត្តនឹងគ្នា ជាមួយអាមេរិក។ កាលពីដើមឆ្នាំ ២០១៦ អធិរាជជប៉ុន បានធ្វើដំណើរជាប្រវត្តិសាស្រ្តទៅហ្វីលីពីន ដើម្បីចូលរួមរំលឹកខួបសង្រ្គាមលោកលើកទី ២នៅទីក្រុងម៉ានីល។
ក្រៅពីប្រយុទ្ធប្រឆាំងគ្រឿងញៀន លោកប្រធានាធិបតីហ្វីលីពីនបញ្ជាក់ថា ជប៉ុន និងហ្វីលីពីននឹងជំរុញ ការសហការគ្នាលើផ្នែកសន្តិសុខជើងទឹក។ ជប៉ុន និងហ្វីលីពីន សុទ្ធតែកំពុងជាប់មានជម្លោះដណ្តើមដីកោះជាមួយប្រទេសចិន នៅសមុទ្រចិនខាងត្បូង និងសមុទ្រចិនខាងកើត។
រដ្ឋាភិបាលជប៉ុន រួសរាន់ពង្រឹងចំណងជាមួយហ្វីលីពីន របស់លោកឌុយទែកតេ ដែលកាលពីពេលថ្មីៗនេះបានប្រកាស ងាកខ្លួនចេញពីអាមេរិក ទៅចាប់ដៃជាមួយរុស្ស៊ី និងចិន ដែលប្រទេសទាំងពីរសុទ្ធតែមានជម្លោះដែនទឹក និងឥទ្ធិពលក្នុងតំបន់ជាមួយ ប្រទេសជប៉ុន។
បន្ទាប់ពីហ្វីលីពីន លោកនាយករដ្ឋមន្រ្តី នឹងបន្តដំណើរទស្សនកិច្ចទៅប្រទេសអូស្ត្រាលី ឥណ្ឌូណេស៊ី ហើយនិងវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ