នៅហុងកុង ប៉ូលិសបារម្ភពីគ្រោះថ្នាក់ខ្លាំងសម្រាប់ក្បួនបាតុកម្មនាថ្ងៃទី១ តុលា
នៅហុងកុង មួយថ្ងៃមុនចិនដីគោកប្រារព្ធខួប ៧០ឆ្នាំនៃការបង្កើតសាធារណរដ្ឋប្រជាមានិតចិន ស្ថានភាពហាក់កាន់តែឡើងតានតឹងខ្លាំងជាមួយនឹងក្បួនបបាតុកម្មរបស់ក្រុមអ្នកគាំទ្រប្រជាធិបតេយ្យ។ ប៉ូលិសហុងកុងបានព្រមានក្នុងថ្ងៃចន្ទ ទី៣០ កញ្ញាពីស្ថានភាពប្រកបដោយគ្រោះថ្នាក់ខ្លាំង ខណៈដែលក្រុមអ្នកគាំទ្រប្រជាធិបតេយ្យហុងកុងគ្រោងធ្វើបាតុកម្មនៅថ្ងៃអង្គារ ទី១ តុលាដែលជាថ្ងៃប្រារព្ធខួប ៧០ឆ្នាំនៃការបង្កើតសាធារណរដ្ឋប្រជាមានិតចិន។ ក៏ដូចជានៅក្នុងបាតុកម្មចុងសប្តាហ៍មុនៗ បាតុកម្មក្នុងថ្ងៃអាទិត្យ ២៩ កញ្ញាបានបង្កឲ្យមានហិង្សារវាងបាតុករ និងកម្លាំងប៉ូលិស។ កម្លាំងប៉ូលិសដែលគេបានមើលឃើញថា មិនញញើតនឹងប្រើកម្លាំងចាស់ដៃ និងមធ្យោបាយធ្ងន់ៗគ្រប់ប្រភេទដើម្បីបង្រ្កាបលើបាតុករទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៤
« ក្នុងរយៈពេលចុងក្រោយនេះ គេបានសង្កេតឃើញមានការបាញ់គ្រាប់បែកផ្សែងបង្ហូរទឹកភ្នែកម្តងហើយ ម្តងទៀត ដោយសំដៅលើមុខ។ ទង្វើរបៀបនេះមិនមែនជារឿងថ្មីទេ។ តែអ្វីដែលថ្មី និងមានការផ្លាស់ប្តូរនៅក្នុងយុទ្ធសាស្រ្តរក្សាសណ្តាប់ធ្នាប់របស់កម្លាំងប៉ូលិស គឺចំនួនគ្រាប់ដែលប៉ូលិសបានប្រើ ទោះជាគ្រាប់ធ្វើពីកៅស៊ូ ឬគ្រាប់ខ្សាច់ជាដើម ពោលគឺច្រើនជាងពីសព្វមួយដង។
ធ្ងន់ធ្ងរជាងនេះទៀតនោះ គឺការបន្លំខ្លួនរបស់កម្លាំងប៉ូលិសនៅក្នុងហ្វូងបាតុករ និងការឃាត់ខ្លួនបាតុករដោយបំពាន និងគ្មានរើសមុខ។ នៅម្ខាង គេបានសង្កេតឃើញវត្តមានក្រុមប៉ូលិសជាច្រើនក្រុមបន្លំខ្លួនជាបាតុករ និងចូលរួមនៅក្នុងបាតុកម្មដោយគេមិនអាចដឹងពីតួនាទីពិតប្រាកដរបស់ពួកគេទេ។ ចំណែកនៅម្ខាងទៀត មានការចាប់ខ្លួនមនុស្សតាមទំនើងចិត្តកាន់តែច្រើន និងមិនរើសមុខ ពិសេសអ្នកធ្វើដំណើរតាមផ្លូវ និងជនស៊ីវិលដែលពួកគេមិនមានជាប់ពាក់ព័ន្ធនឹងបាតុកម្មទាល់តែសោះ។
ទង្វើរបៀបនេះមានកាន់តែច្រើនឡើងៗ។ រដ្ឋអំណាចហុងកុងចង់បង្កើតឲ្យមានបរិយាកាសគួរឲ្យភ័យខ្លាចមួយដើម្បីបំភិតបំភ័យសាធារណៈជនជួបជុំ និងបញ្ជៀសការប្រមូលផ្តុំដ៏ច្រើនសម្បើមមួយនៅថ្ងៃទី១ តុលាដែលជាខួបគម្រប់ ៧០ឆ្នាំនៃការបង្កើតសាធារណរដ្ឋប្រជាមានិតុចិន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ