ជំនួបកំពូលក្រុមប្រទេស G២០ ចាប់ផ្តើមជាមួយនឹងការខ្វែងគំនិតគ្នា និងអំពើហិង្សា
ចុះផ្សាយនៅថ្ងៃ៖
ស្តាប់ - ០៦:២៣
ថ្ងៃអាទិត្យ ទី២៧ មិថុនា នេះ ជាថ្ងៃទី២ និងជាថ្ងៃចុងក្រោយនៃជំនួបកំពូលក្រុមប្រទេស G២០ នៅក្នុងទីក្រុងតូរ៉ុងតូ (Toronto) ប្រទេសកាណាដា។ ជំនួបកំពូល G២០ ដែលបានចាប់ផ្តើមកាលពីយប់មិញ ជាមួយនឹងពិធីទទួលទានអាហាររួមគ្នា រវាងប្រមុខរដ្ឋ និងប្រមុខរដ្ឋាភិបាលនៃក្រុមប្រទេស G៨ និងក្រុមប្រទេសដែលកំពុងមានសេដ្ឋកិច្ចលូតលាស់ ឬហៅថា ប្រទេសអ្នកមានថ្មី។ អ្វីជាការកត់សម្គាល់ ជំនួបកំពូលបានចាប់ផ្តើមជាមួយនឹងក្បួនបាតុកម្មយ៉ាងហិង្សានៅតាម ដងផ្លូវ។
រហូតដល់យប់អធ្រាត្រថ្ងៃសៅរ៍ឆ្លងចូលថ្ងៃអាទិត្យ ទី២៧ មិថុនានេះ ក្បួនបាតុកម្មកំពុងបន្តមានយ៉ាងគគ្រឹកគគ្រេង និងប្រកបដោយអំពើហិង្សា។ ពេញមួយរសៀលថ្ងៃសៅរ៍ ទី២៦ មិថុនា មានបាតុកររាប់ពាន់នាក់បាននំាគ្នាដង្ហែក្បួនបាតុកម្មនៅតាមផ្លូវនានា ពិសេស ផ្លូវដែលស្ថិតនៅជុំវិញកន្លែងប្រជុំ ដោយពួកគេបានសម្រេចចិត្តបោះទីតំាងប្រចំាការនៅម្តុំនោះតែម្តង។ បន្តិចក្រោយមក អំពើហិង្សាក៏ចាប់ផ្ទុះឡើងរវាងក្រុមប៉ូលីស និងក្រុមយុវជនមានគ្នាប្រមាណជា ១០០នាក់ ដែលពួកគេបានអះអាងថា បាតុកម្មរបស់ពួកគេ ជាបាតុកម្មអហិង្សា។ តែយ៉ាងណាក៏ដោយ ពួកគេត្រូវបានក្រុមប៉ូលីសប្រើខ្សែ កៀងព័ទ្ធប្រមូលផ្តុំ និងបន្ទាប់មក បានផ្តើមចាប់ក្រៀកម្តងមួយៗ។ ជាមួយនឹងទឹកភ្នែក និងការតវ៉ាផង មានអ្នកខ្លះ ត្រូវបានប៉ូលីសវាយសំពងយ៉ាងចាស់ដៃទៀតផង។ បន្តិចក្រោយមក ក្នុងរសៀលថ្ងៃសៅរ៍ដដែល ភាពអនាធិបតេយ្យក៏បានចាប់ផ្តើមឡើង ជាមួយនឹងការវាយបំបែកកញ្ចក់ហាងទំនិញ នៅតាមដងផ្លូវ និងការដុតបំផ្លាញរថយន្តប៉ូលីស។
ជារួមទៅ ពេញមួយរសៀលថ្ងៃសៅរ៍ មុននឹងជំនួបកំពូល G២០ ចាប់ផ្តើមជាផ្លូវការ ទីក្រុងតូរ៉ុងតូ (Toronto) បានក្លាយជាឆាកនៃភាពប្រទូសរ៉ាយគ្នាយ៉ាងហិង្សារវាងក្រុមប៉ូលីស និងក្រុមបាតុករដែលប្រឆំាងនឹងជំនួបកំពូលក្រុមប្រទេស G២០។ មកទល់ម៉ោងនេះ គេពិបាកនឹងផ្តល់តុល្យការរួមនៃឧប្បត្តិហេតុនោះ តែបើយោងតាមទូរទស្សន៍កាណាដា មានអ្នករងរបួសជាច្រើននាក់ និងមានបាតុករប្រមាណជា ១៥០នាក់ ត្រូវបានប៉ូលីសចាប់ខ្លួន។
ជាមួយនឹងភាពវឹកវរដែលរដ្ឋាភិបាលកាណាដា ជាម្ចាស់ផ្ទះនឹកស្មានមិនដល់នេះ បានបំផុសឲ្យមានសំណួរចោទឡើងថា ហេតុអ្វីបានជាស្ថានការណ៍ធ្លាក់ធ្ងន់ធ្ងរដល់ម្លឹង ពិសេស ជួនចំពេលដែលមានកម្លំាងប៉ូលីសរហូតដល់ទៅ ២ម៉ឺននាក់ ពោល ប៉ូលីសម្នាក់ សម្រាប់បាតុករ២នាក់។ ចៅហ្វាយក្រុងតូរ៉ុងតូ (Toronto) បានពន្យល់បកស្រាយនៅចំពោះមុខក្រុមអ្នកកាសែត ដោយបានទម្លាក់កំហុសដល់ក្រុមបាតុករជ្រុលនិយមមួយក្តាប់តូច និងថែមទំាងបានការពារ ការងាររបស់ក្រុមប៉ូលីសទៀតផង។ តែបញ្ហានៅត្រង់ថា រូបចៅហ្វាយក្រុងតូរ៉ុងតូ កំពុងទើសទាល់ចិត្តយ៉ាងខ្លំាង មិនដឹងឆ្លើយយ៉ាងម៉េច ទៅនឹងរឿងអាស្រូវទាក់ទងនឹងការចំណាយដ៏សម្បើម មិនធ្លាប់មាន ក្នុងការរក្សាសណ្តាប់ធ្នាប់ និងសន្តិសុខនៅក្នុងជំនួបកំពូល G៨ និងG ២០ ឆ្នំានេះ។ តាមតួលេខផ្តល់ដោយអង្គការទទួលបន្ទុករៀបចំសន្តិសុខឲ្យដឹងថា ការចំណាយមានរហូតដល់ទៅជាង ១ពាន់លានដុល្លារឯណោះ។
ការខ្វែងគំនិតគ្នាបានផ្តើមមាន នៅមុនបើកកិច្ចប្រជុំ
« ផ្តល់សន្ទុះកំណើនសេដ្ឋកិច្ចពិភពលោកឡើងវិញ » នេះជាកម្មវត្ថុចម្បងរបស់សហរដ្ឋអាមេរិក។ អាមេរិកដែលព្យាយាមនិយាយជំនះលើដៃគូនៅក្នុងជំនួបកំពូល G២០ ឆ្នំានេះ។ លោកប្រធានាធិបតីអាមេរិក Barack Obama បានប្រឹងប្រែងនិយាយ បញ្ចុះបញ្ចូលសម្ព័ន្ធមិត្តរបស់ខ្លួន ដូចយ៉ាងប្រទេសអង់គ្លេស ឲ្យជួយគំាទ្រនូវជំហររបស់ខ្លួន។ លោក Obama យល់ឃើញថាដើម្បីឲ្យពិភពលោកងើបចេញពីវិបត្តិសេដ្ឋកិច្ចបាន គេគួរតែនំាគ្នាផ្តោតជាសំខាន់ លើការជំរុញឲ្យមានកំណើនសេដ្ឋកិច្ច។ តែបញ្ហានៅត្រង់ថា គំនិតបែបនេះ មិនមែនជាការយល់ឃើញរបស់បណ្តាប្រទេសសមាជិកសហភាពអឺរ៉ុប និងប្រទេសមួយចំនួនទៀតទេ។ អឺរ៉ុបដែលបានឆ្លើយប្រាប់អាមេរិកវិញថា ខ្លួនគំាទ្រឲ្យមានកំណើនសេដ្ឋកិច្ច តែទន្ទឹមគ្នានេះ នយោបាយត្បិតត្បៀត សន្សំសំចៃ ដើម្បីកាត់បន្ថយឧុនភាពថវិកាជាតិ និងបំណុលសាធារណៈ ជារឿងមួយចៀសមិនរួច។ គឺនយោបាយត្បិតត្បៀត សន្សំសំចៃរបស់សហភាពអឺរ៉ុបនាពេលកន្លងមកនេះហើយ ដែលរដ្ឋបាលអាមេរិកបានសម្តែងការមិនពេញចិត្តទាល់តែសោះ។
ចំពោះទីក្រុងវ៉ាស៊ីនតោន បើគ្រប់ប្រទេសនាំគ្នាកាត់បន្ថយការចំណាយទំាងអស់គ្នា វានឹងនាំឲ្យកំណើនសេដ្ឋកិច្ចជាប់គំាង ពេលនោះ នឹងគ្មានថ្ងៃណាមួយ ដែលពិភពលោកងើបចេញរួច ពីវិបត្តិឡើយ។
ចំណុចខ្វែងគំនិតគ្នាទីពីរ គឺទាក់ទងនឹងការយកពន្ធអាករពិសេស លើសេវាធនាគាររវាងប្រទេស និងប្រទេស។ នេះជាសំណូមពរដែលបានស្នើឡើង ដោយប្រទេសបារំាង និងអាឡឺម៉ង់។ តែមានប្រទេសជាច្រើន រួមទំាងអាមេរិក និងកាណាដាផង បានជំទាស់ដាច់ខាត និងថែមទំាងមិនចង់យកត្រចៀកស្តាប់ទៀតផង។
ចំណុចខ្វែងគំនិតគ្នាទីបី គឺទាក់ទងនឹងអត្រាបា្រក់យ័នរបស់ចិន ដែលមានតម្លៃទាបជ្រុល ប្រៀបនឹងប្រាក់ដុល្លារអាមេរិកំាង។ ត្រង់ចំណុចនេះ សមាជិកម្នាក់នៃគណៈប្រតិភូចិនបានព្រមានទុករួចជាស្រេចថា ខ្លួនមិនទទួលយកគំនាបណាមួយរបស់ក្រុមប្រទេស G២០ ជាដាច់ខាត។
សរុបមកវិញគេនៅមិនទាន់ដឹងអំពីលទ្ធផលរួមនៃជំនួបកំពូលក្រុមប្រទេស G២០ ក្នុងឆ្នំា ២០១០នេះទេ។ អ្វីដែលគេដឹងគឺថា បរិយាកាសជាទូទៅ ហាក់ដូចជាមិនសូវល្អប៉ុន្មានទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ