កាណាដាផ្តល់បណ្ណការងារបើកចំហរាប់ម៉ឺនកន្លែងដល់ពលរដ្ឋហុងកុង
ចុះផ្សាយនៅថ្ងៃ៖
ស្តាប់ - ០៤:៣៤
នាពេលថ្មីៗ ប្រទេសកាណាដាបានផ្តល់បណ្ណការងារបើកចំហដល់ប្រជាពលរដ្ឋហុងកុងចំនួនរាប់ម៉ឺននាក់។ ពួកគេភាគច្រើនជាយុវជនវ័យក្មេង និងទទួលបានការអប់រំកម្រិតខ្ពស់។ រដ្ឋកាណាដាមិនតម្រូវឱ្យពួកគេស្ថិតក្នុងស្ថានភាពមានការងារធ្វើនោះទេ។ តើនយោបាយនេះបង្កផលប៉ះពាល់អ្វីខ្លះដល់ទីផ្សារកម្លាំងពលកម្មនៅហុងកុង? និងតើហេតុអ្វីពលរដ្ឋហុងកុងកាន់តែច្រើនកំពុងពិចារណាធ្វើចំណាកស្រុកទៅបរទេស?
ផ្អែកតាមការចេញផ្សាយរបស់កាសែត The South China Morning Post ប្រទេសកាណាដាបានចេញលិខិតអនុញ្ញាតការងារបើកចំហ (Open Work Permits) ជិត ១២៥០០កន្លែងដល់ប្រជាជនហុងកុង ចាប់តាំងពីឆ្នាំមុន។ ស្ទើរតែមួយភាគបួននៃការអនុញ្ញាតផ្លូវការបានទៅដល់ពលរដ្ឋហុងកុងដែលមានអាយុចាប់ពី២៥ឆ្នាំ ឬក្រោមនេះ។ នៅហុងកុង ច្បាប់ថ្មីរបស់កាណាដានេះបានបង្កឱ្យមានការព្រួយបារម្ភកាន់តែខ្លាំងអំពីកង្វះខាតកម្លាំងពលរដ្ឋនៅហុងកុង។ ហុងកុងបច្ចុប្បន្នគឺជាមជ្ឈមណ្ឌលហិរញ្ញវត្ថុមួយដ៏ធំក្នុងពិភពលោក។
ប្រទេសកាណាដា ដូចជាប្រទេសអង់គ្លេស និងអូស្ត្រាលីផងដែរ បានប្រកាសពីច្បាប់អនុញ្ញាតថ្មី និងបង្កភាពងាយស្រួលជាងមុន ក្នុងការទទួលពលរដ្ឋចំណាកស្រុកថ្មីសម្រាប់ប្រជាជនហុងកុង បន្ទាប់ពីរដ្ឋាភិបាលចិនបានដាក់ច្បាប់សន្តិសុខជាតិនៅក្នុងហុងកុង កាលពីខែមិថុនា ឆ្នាំ២០២០ និងបានហាមប្រាមអំពើអបគមន៍ អំពើបំបះបំបោរ (វិទ្ធង្សនា) ភេរវកម្ម និងការឃុបឃិតជាមួយកងកម្លាំងបរទេស។
ឆ្លើយតបទៅនឹងសំណួររបស់កាសែត The South China Morning Post ស្ថាប័នអន្តោប្រវេសន៍ ជនភៀសខ្លួន និងសញ្ជាតិរបស់កាណាដា (IRCC) បាននិយាយថា លិខិតអនុញ្ញាតការងារបើកចំហសរុបមានចំនួន ១២៤៨៤ ត្រូវបានចេញ ចាប់ពីខែមីនាឆ្នាំមុនដល់ខែមិថុនាឆ្នាំ២០២២នេះ។
ក្នុងចំណោមចំនួនសរុប ស្ទើរតែមួយភាគបួននៃអ្នកស្នើជាពលរដ្ឋហុងកុងមានអាយុពី២៥ឆ្នាំ ឬក្រោមនេះ ហើយស្ទើរតែពាក់កណ្តាលមានអាយុពី២៦ទៅ៣០ឆ្នាំ។ ប្រមាណ១៣ភាគរយ ពួកគេមានអាយុពី៣១ទៅ៣៥ឆ្នាំ និង៧ភាគរយមានអាយុពី ៣៦ទៅ៤០ឆ្នាំ។
មានតែប្រហែល៥ភាគរយប៉ុណ្ណោះគឺជាពលរដ្ឋហុងកុងដែលមានអាយុពី៤១ទៅ៤៥ ឆ្នាំ នៅពេលដែលពលរដ្ឋហុងកុងនៅក្នុងក្រុមពីអាយុ៤៦ទៅ៥០ឆ្នាំ និងលើសពី៥០ឆ្នាំ ពួកគេតំណាងក្រុមមាន ២ភាគរយ។
មិនដូចទិដ្ឋាការការងារ (Work Visas) ទេ បណ្ណការងារបើកចំហអនុញ្ញាតឱ្យបុគ្គលចូលប្រទេសកាណាដាដោយមិនចាំបាច់ភ្ជាប់ជាមួយនិយោជកជាក់លាក់ ពោលគឺ ប្រទេសកាណាដាមិនតម្រូវឱ្យមានលិខិតបញ្ជាក់ការងារពីក្រុមហ៊ុននោះទេ។
ដើម្បីមានលក្ខណៈគ្រប់គ្រាន់សម្រាប់ស្នើលំនៅឋានអចិន្ត្រៃយ៍ (Permanent Residence) អ្នកដែលមានបណ្ណការងារបើកចំហរយៈពេល៣ឆ្នាំត្រូវធ្វើការពេញម៉ោងយ៉ាងហោចណាស់មួយឆ្នាំ ឬធ្វើការរហូតដល់ ១៥៦០ម៉ោង។
លិខិតអនុញ្ញាតការងារបើកចំហត្រូវបានផ្តល់ឱ្យតែចំពោះពលរដ្ឋដែលមានកម្រិតអប់រំក្រោយថ្នាក់មធ្យមសិក្សា ឬនៅកម្រិតឧត្ដមសិក្សាដែលពួកគេត្រូវបានទទួល ក្នុងរយៈពេលប្រាំឆ្នាំកន្លងមក។ ប្តី ឬប្រពន្ធ ឬដៃគូ និងកូនក្នុងបន្ទុក ក៏អាចទទួលបានបណ្ណការងារ ឬការសិក្សាផងដែរ។
អ្នកប្រឹក្សាផ្នែកធនធានមនុស្សនៅទីក្រុងហុងកុង បាននិយាយថា ទិន្នន័យស្តីពីការធ្វើចំណាកស្រុករបស់ពលរដ្ឋហុងកុងបានចង្អុលបង្ហាញយ៉ាងច្បាស់អំពី ការរួមកាន់តែតូចនៃកម្លាំងពលកម្មរបស់មនុស្សវ័យក្មេងដែលមានទេពកោសល្យនៅក្នុងទីក្រុងហុងកុង។ ហុងកុងបច្ចុប្បន្នក៏កំពុងមានប្រជាជនវ័យចំណាស់ និងកំណត់ត្រាអត្រាកំណើតទាបផងដែរ។
លោកស្រី Alexa Chow Yee-ping នាយកគ្រប់គ្រងទីភ្នាក់ងារជ្រើសរើសបុគ្គលិករបស់ស្ថាប័ន ACTS Consulting បាននិយាយថា ផែនការរបស់កាណាដានេះក្នុងការទទួលយកយុវជន និងអ្នកដែលមានការអប់រំខ្ពស់ កំពុងបង្កការគំរាមកំហែងដល់កម្លាំងពលកម្មនៅហុងកុង។
លោកស្រីបានបន្ថែមថា ពាក់ព័ន្ធនឹងការចាកចេញនៃយុវជនក្មេង និងមានការអប់រំខ្ពស់ពីហុងកុង រដ្ឋាភិបាលហុងកុងក៏កំពុងលើកទឹកចិត្តយុវជនឱ្យធ្វើការនៅក្នុងតំបន់ Greater Bay ដែលតភ្ជាប់ទីក្រុងហុងកុង ម៉ាកាវ និងទីក្រុងចំនួនប្រាំបួន នៅក្វាងទុង ហើយបានផ្តល់ការឧបត្ថម្ភធនផងដែរសម្រាប់ពួកគេ។
លោកស្រី Chow បាននិយាយថា "និយោជក ឬម្ចាស់ក្រុមហ៊ុន ទំនងមិនទាន់មានផលប៉ះពាល់ខ្លាំងទេ នៅក្នុងពេលឥឡូវនេះ ព្រោះថាពួកគេបានកាត់បន្ថយការចំណាយភាគច្រើន ឬបញ្ឈប់ការជួលបុគ្គលិកក្នុងអំឡុងពេលជំងឺរាតត្បាតកូវីដ១៩ ក៏ប៉ុន្តែពួកគេនឹងប្រឈមមុខនឹងការលំបាកកាន់តែខ្លាំង ក្នុងការជួលបុគ្គលិកឡើងវិញ នៅពេលដែលសេដ្ឋកិច្ចហុងកុងងើបកើនឡើងមកវិញ ប្រហែលជានៅឆ្នាំក្រោយ។"
ហេតុអ្វីពលរដ្ឋហុងកុងកាន់តែច្រើនកំពុងពិចារណាធ្វើចំណាកស្រុកទៅបរទេស?
ដោយសារវិបត្តិ និងភាពមិនប្រាកដប្រជា ទាំងលើទិដ្ឋភាពនយោបាយ និងសេដ្ឋកិច្ច ពលរដ្ឋហុងកុងកាន់តែច្រើន កំពុងពិចារណាចាកចេញពីប្រទេសរបស់ខ្លួន ដើម្បីទៅរស់នៅជាអចិន្ត្រៃយ៍នៅបរទេស។ ផ្អែកតាមការសិក្សាស្រាវជ្រាវថ្មីៗ បង្ហាញថា ប្រទេសអាទិភាព ដែលជាទិសដៅសម្រាប់ពលរដ្ឋហុងកុងទាំងនោះ រួមមានកាណាដា អូស្រា្ដលី កោះតៃវ៉ាន់ និងចក្រភពអង់គ្លេស ជាដើម។
ជាក់ស្ដែង ពលរដ្ឋហុងកុងត្រូវប្រឈមនឹងវិបត្តិនយោបាយជាបន្តបន្ទាប់។ នៅឆ្នាំ២០១៤ បាតុកម្មឆ័ត្រដើម្បីប្រជាធិបតេយ្យ ត្រូវបង្អាក់ដោយរដ្ឋាភិបាល។ ក្នុងពេលដំណាលគ្នា សេរីភាពរបស់ពួកគេ ត្រូវគំរាមកំហែងកាន់តែខ្លាំង ដោយរដ្ឋាភិបាលចិនដីគោក។ កាលពីខែមិថុនា ឆ្នាំ២០២០ គណបក្សកុម្មុយនីស្តចិន បានដាក់ចេញឱ្យអនុវត្ត ច្បាប់សន្តិសុខជាតិ។ ច្បាប់នេះ មានគោលបំណង គ្រប់គ្រងហុងកុង ឱ្យកាន់តែតឹងតែងជាងមុន។ អ្នកជំនាញខ្លះ បានលើកឡើងថា សេរីភាពបញ្ចេញមតិនៅហុងកុងត្រូវបាត់បង់ទៅវិញ ក្រោមបរិបទប្រព័ន្ធនយោបាយ “ប្រទេសមួយ ប្រព័ន្ធពីរ”។ ប្រព័ន្ធនយោបាយនេះ ត្រូវបង្កើតឡើងក្នុងឆ្នាំ១៩៩៧ ហើយនឹងត្រូវបញ្ចប់នៅ ៥០ឆ្នាំក្រោយ។ ក៏ប៉ុន្តែ ត្រឹមនៅឆ្នាំ២០២០ រដ្ឋាភិបាលចិនដីគោក បានបង្កើនអំណាចចង់បានហុងកុងមកវិញរួចទៅហើយ។ ជាក់ស្ដែង ពលរដ្ឋហុងកុងយ៉ាងច្រើនត្រូវចាប់ខ្លួនពីបទរំលោភច្បាប់ថ្មី ក្រោយការចេញច្បាប់នេះ។
ក្រៅពីវិបត្តិនយោបាយ បញ្ហាសេដ្ឋកិច្ច ក៏បាននិងកំពុងជំរុញឱ្យពលរដ្ឋហុងកុងយ៉ាងច្រើន ធ្វើការសម្រេចចិត្តចាកចេញពីមាតុភូមិរបស់ខ្លួនផងដែរ។ នាពេលបច្ចុប្បន្ន ហុងកុង ជាទីក្រុងមួយក្នុងចំណោមទីក្រុងដ៏ថ្លៃបំផុត ដើម្បីរស់នៅ នៅលើពិភពលោក។ ចំណាត់ថ្នាក់ទីក្រុងហុងកុង ស្ថិតនៅពីលើ ទាំងទីក្រុងញូវយ៉ក តូក្យូ និងឡុងដ៍។ នេះបើផ្អែកលើការស្ទង់មតិអំពីថ្លៃចំណាយនៃការរស់នៅ ដែលធ្វើឡើងដោយស្ថាប័ន The Economist Intelligence Unit៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ