គណៈកម្មការសិទ្ធិមនុស្សអង្គការសហប្រជាជាតិសុំឱ្យហុងកុងរំលាយច្បាប់សន្តិសុខជាតិ
គណៈកម្មការសិទ្ធិមនុស្សអង្គការសហប្រជាជាតិ បានសម្តែងការព្រួយបារម្ភចំពោះស្ថានភាពកាន់តែអាក្រក់នៅហុងកុង និងបានស្នើសុំនៅថ្ងៃពុធទី ២៧ កក្កដា ២០២២នេះ ឱ្យអាជ្ញាធរហុងកុងរំលាយចោលច្បាប់សន្តិសុខជាតិដែលតាក់តែងដោយប៉េកាំង កាលពីពីរឆ្នាំមុន។
ចុះផ្សាយនៅថ្ងៃ៖
ស្តាប់ - ០២:០៤
ប្រមូលផ្តុំទៅដោយអ្នកជំនាញឯករាជ្យ តែមិននិយាយក្នុងនាមអង្គការ គណៈកម្មការសិទ្ធិមនុស្សអង្គការសហប្រជាជាតិ ខ្វល់ខ្វាយខ្លាំងណាស់ចំពោះការបកស្រាយអត្ថន័យនិងការអនុវត្តទាំងបំពានច្បាប់សន្តិសុខជាតិ។ បើតាមគណៈកម្មការដែលមានសមាជិក១៨រូប ច្បាប់សន្តិសុខនេះត្រូវបានអនុម័តឱ្យប្រើប្រាស់ដោយគ្មានពិគ្រោះយោបល់ជាមួយសាធារណជននិងសង្គមស៊ីវិលទេ។ ម្យ៉ាងវិញទៀត ច្បាប់នេះ គ្មានលម្អិតឱ្យច្បាស់លាស់ថាតើឥរិយាបថណា ទង្វើណាជាកំហុសព្រហ្មទណ្ឌទេ។ ហេតុដូច្នេះហើយបានជាគណៈកម្មការចង់ឱ្យអាជ្ញាធរហុងកុងចាត់វិធានការជាក់ស្តែងណាដែលអាចរំលាយច្បាប់នេះ ហើយក្នុងពេលរង់ចាំហុងកុងត្រូវកុំប្រើវា។
ច្បាប់សន្តិសុខជាតិហុងកុង តាក់តែងឡើងដោយប៉េកាំង នៅឆ្នាំ២០២០ ដើម្បីបិទបញ្ចប់មហាបាតុកម្ម ដ៏ហិង្សា របស់ក្រុមអ្នកប្រជាធិបតេយ្យ។ តាំងពីចូលជាធរមានមក បក្សប្រឆាំងបានរងការបង្ក្រាប សកម្មជនខ្លះទៀតដែលជាតំណាងអ្នកប្រជាធិបតេយ្យដ៏លេចធ្លោ ត្រូវបង្ខំចិត្តរត់ចាកចេញពីប្រទេស និងខ្លះទៀតត្រូវបានហាមឃាត់មិនឱ្យបំពេញការងារ ឬខ្លះត្រូវជាប់ឃុំ។ ច្បាប់សន្តិសុខជាតិហុងកុងនេះក្រសោប រាល់សកម្មភាពបះបោរ វិទ្ធង្សនា ភេរវកម្ម និងឃុបឃិតជាមួយបរទេស ដាក់ក្នុងកន្ត្រកតែមួយ ជាទោសឧក្រិដ្ឋទាំងអស់គ្នា។
ជាលើកទីមួយ គិតចាប់តាំងជាច្រើនទស្សវត្សរ៍មកដែល “ការបះបោរ” ត្រូវបានរាប់បញ្ចូល ជាបទល្មើសនៅហុងកុង និងត្រូវបានគេប្រើប្រាស់វាដើម្បីចោទ ក្រុមបញ្ញាវន្តនៅសាកលវិទ្យាល័យ អ្នកកាសែត និងមនុស្សផ្សេងទៀត ដែលចង់ប្រើសិទ្ធិស្របច្បាប់របស់ខ្លួន ក្នុងការបញ្ចេញមតិ។ នេះបើតាមការបរិហាររបស់គណៈកម្មការ ដោយថ្នូចថ្នូរទៀតថា សំណុំរឿងសន្តិសុខជាតិត្រូវបានផ្ទេរទៅឱ្យតុលាការចិន និងផ្តល់អំណាចដ៏ធំធេងទៅឱ្យមេដឹកនាំហុងកុង។ នេះជាការចិញ្ចាំឯករាជ្យភាពផ្នែកតុលាការ និងរំខានដំណើរការច្បាប់មិនឱ្យប្រព្រឹត្តទៅយុត្តិធម៌និងសមធម៌។
គណៈកម្មការបានអំពាវនាវឱ្យរំលាយច្បាប់នេះ រួចសភាហុងកុងគិតគូរតាក់តែងច្បាប់សន្តិសុខជាតិថ្មី មានតម្លាភាព និងសម្រួលឱ្យមានការចូលរួមដោយសេរី ដោយបើកចំហ សម្រាប់សង្គមស៊ីវិលនិងសាធារណជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ