អាមេរិក និងអង់គ្លេសបើកការវាយប្រហារផ្លូវអាកាសលើក្រុមឧទ្ទាមហ៊ូទី នៅទឹកដីយេម៉ែន
ស្ថានការណ៍នៅដើមបូព៌ាកំពុងឈានដល់របត់ថ្មី បន្ទាប់ពីអាមេរិក និងអង់គ្លេសបើកការវាយប្រហារផ្លូវអាកាសទៅលើកក្រុមឧទ្ទាមហ៊ូទី នៅក្នុងទឹកដីយេម៉ែន។ នៅយប់ថ្ងៃព្រហស្បតិ៍ ឈានចូលដល់ថ្ងៃសុក្រទី ១២មករានេះ យន្តហោះចម្បាំងអាមេរិក និងអង់គ្លេសបានចេញទៅទម្លាក់គ្រាប់លើទីតាំងយោធាសំខាន់ៗរបស់ក្រុមហ៊ូទី នៅរដ្ឋធានីសាណា ទីក្រុងកំពង់ផែ ហូដេដា និងទីក្រុងមួយចំនួនទៀត ដែលស្ថិតក្រោមការគ្រប់គ្រងរបស់ពួកឧទ្ទាមហ៊ូទី។ លោកប្រធានាធិបតីអាមេរិក ចូ បៃដិនបានចេញមុខការពារប្រតិបត្តិការយោធានៅយេម៉ែន ដើម្បីស្តារសន្តិសុខចរាចរណ៍នៅសមុទ្រក្រហម ប៉ុន្តែ អ៊ីរ៉ង់ដែលជាអ្នកគាំទ្ររដ្ឋាភិបាលយោធាហ៊ូទី ថ្កោលទោស រិះគន់អាមេរិក និងអង់គ្លេសថា កំពុងរំលោភដែនអធិបតេយ្យភាពរបស់យេម៉ែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:២៨
នៅយប់ថ្ងៃព្រហស្បតិ៍ ឈានចូលដល់ថ្ងៃសុក្រ អាមេរិក និងអង់គ្លេសបញ្ជូនយន្តហោះចម្បាំងទៅវាយប្រហារទីតាំងសំខាន់របស់ក្រុមហ៊ូទីយេម៉ែន នៅរដ្ឋធានីសាណា ទីក្រុងកំពង់ផែជាប់សមុទ្រក្រហម និងតំបន់ភាគខាងជើងយេម៉ែនដែលស្ថិតក្រោមការកាន់កាប់របស់ក្រុមហ៊ូទី។ នៅក្នុងសេចក្តីប្រកាសព័ត៌មាន នៅថ្ងៃសុក្រនេះ អាមេរិក អង់គ្លេស និងសម្ព័ន្ធទាំង៨ ដូចជាអូស្ត្រាលី កាណាដា ហូឡង់ អាល្លឺម៉ង់ នូវែលសេឡង់ បារ៉ែន និងកូរ៉េខាងត្បូង បានអះអាងថា គោលដៅនៃការវាយប្រហារទៅលើក្រុមហ៊ូទី ក្នុងទឹកដីយេម៉ែន គឺដើម្បីបន្ថយភាពតានតឹង និងស្តារស្ថិរភាព សុវត្ថិភាពនៅសមុទ្រក្រហម។
នៅក្រោយការវាយប្រហារនៅទឹកដីយេម៉ែន លោកប្រធានាធិបតីអាមេរិក ចូ បៃដិននិយាយថា ការវាយប្រហាររបស់អាមេរិក និងសម្ព័ន្ធមិត្ត ជាសារច្បាស់ៗថា អាមេរិកមិនអត់ឱនដាច់ខាតការវាយប្រហារមកលើកងទ័ពអាមេរិក និងការយាយីបង្កគ្រោះថ្នាក់ដល់សេរីភាពចរាចរណ៍ពាណិជ្ជកម្ម អន្តរជាតិ នៅក្នុងពិភពលោក។
អាមេរិក និងអង់គ្លេស សម្រេចវាយប្រហារទៅលើទីតាំងយោធាសំខាន់ៗរបស់ក្រុមហ៊ូទី នៅប្រទេសយេម៉ែន ដែលមានផងដែរ រដ្ឋធានីសាណា ដើម្បីសងសឹកនឹងក្រុមហ៊ូទី ដែលបន្តផ្គើន បាញ់មីស៊ីល និងបញ្ជូនយន្តហោះដ្រូន វាយប្រហារកប៉ាល់ចម្បាំងរបស់អាមេរិកនិងអង់គ្លេស នៅសមុទ្រក្រហម កាលពីថ្ងៃព្រហស្បតិ៍។
នៅថ្ងៃពុធ ក្រុមប្រឹក្សាសន្តិសុខអង្គការសហប្រជាជាតិបានបោះឆ្នោតលើសេចក្តីសម្រេច ស្នើដោយអាមេរិក ដែលនៅក្នុងនោះ គេទាមទារឲ្យក្រុមហ៊ូទី បញ្ឈប់ជាបន្ទាន់ ការវាយប្រហារកប៉ាល់ដឹកទំនិញអន្តរជាតិ។ ប៉ុន្តែ បើតាមនាយករដ្ឋមន្រ្តីអង់គ្លេស លោករីស៊ី ស៊ូណាក់ បើទោះជាមានការព្រមានជាញឹកញាប់ពីសហគមន៍អន្តរជាតិ ក្រុមហ៊ូទីយេម៉ែននៅតែមិនព្រមឈប់ធ្វើសកម្មភាពដ៏គ្រោះថ្នាក់ ដោយប្រើដ្រូន និងមីស៊ីលវាយប្រហារ ២៧ដង ទៅលើកប៉ាល់ដឹកទំនិញអន្តរជាតិ នៅសមុទ្រក្រហម។
ប្រតិបត្តិការយោធារបស់ប្រទេសទាំង១០ ដឹកនាំដោយអាមេរិក និងអង់គ្លេស កាលពីយប់ថ្ងៃព្រហស្បតិ៍ គ្រាន់តែជាការឆ្លើយតបទៅនឹងក្រុមហ៊ូទី និងជាវិធានការការពារស្របច្បាប់ មិនហួសប្រមាណ មិនបង្កឲ្យគ្រោះថ្នាក់បាត់បង់ជីវិតប្រជាជនស៊ីវិលយេម៉ែន។
អ្នកនាំពាក្យរបស់ក្រុមហ៊ូទី អះអាងនៅថ្ងៃសុក្រនេះថា ការវាយប្រហារផ្លូវអាកាសរបស់អាមេរិកនិងអង់គ្លេសបានសម្លាប់មនុស្ស៥នាក់ និងរបួស ៦នាក់។ បានទទួលជំនួយយោធា និងការគាំទ្រហិរញ្ញវត្ថុពីអ៊ីរ៉ង់ ក្រុមឧទ្ទាមហ៊ូទី ដែលធ្វើសង្រ្គាមចូលកាន់កាប់ទឹកដីមួយភាគធំនៅយេម៉ែន បានគំរាមអាមេរិក និងអង់គ្លេសថា កំពុងប្រព្រឹត្តកំហុសដ៏ធ្ងន់ធ្ងរ ព្រោះថា ក្រុមហ៊ូទីនឹងមិននៅស្ងៀម នៅក្រោយការវាយប្រហាររបស់អាមេរិកនោះទេ។ ម្យ៉ាង សកម្មភាពយោធារបស់អាមេរិក និងសម្ព័ន្ធមិត្តនឹងមិនធ្វើឲ្យក្រុមហ៊ូទីផ្លាស់ប្តូរចិត្តឈប់វាយប្រហារប្រយោជន៍របស់អ៊ីស្រាអែលដែរ។ តាំងពីពាក់កណ្តាលខែវិច្ឆិកាមក ដើម្បីបង្ហាញសាមគ្គីភាពជាមួយក្រុមហាម៉ាសនៅហ្កាហ្សា ក្រុមហ៊ូទីចាប់ផ្តើមប្រើដ្រូន មីស៊ីលវាយប្រហារកប៉ាល់ដឹកទំនិញ ដែលសង្ស័យថា មានជាប់ទាក់ទងនឹងអ៊ីស្រាអែល។
អ៊ីរ៉ង់វិញ តាមរយៈអ្នកនាំពាក្យរបស់ក្រសួងការបរទេសថ្កោលទោសថា ដោយបើកការវាយប្រហារផ្លូវអាកាសទៅលើក្រុមហ៊ូទី នៅយេម៉ែន អាមេរិក និងអង់គ្លេសកំពុងរំលោភច្បាប់អន្តរជាតិ រំលោភដែនអធិបតេយ្យភាពរបស់យេម៉ែន។ អ្នកនាំពាក្យរបស់អ៊ីរ៉ង់ព្រមានដែរថា ការវាយប្រហារនៅថ្ងៃព្រហស្បតិ៍ នឹងមិនផ្តល់លទ្ធផលអ្វី ក្រៅតែពីដុតបញ្ឆេះ ឲ្យមានអស្ថិរភាព និងអសន្តិសុខនៅក្នុងតំបន់។
ប្រទេសចិនបានប្រតិកម្មភ្លាមភ្លែតនៅថ្ងៃសុក្រនេះ ដោយបានសំដែងក្តីបារម្ភពីស្ថានការណ៍កាន់តែតានតឹងនៅសមុទ្រក្រហម។ ប៉េកាំងអំពាវនាវឲ្យគ្រប់ភាគី អត់ធ្មត់ ដើម្បីជៀសវាងកុំឲ្យជម្លោះកាន់តែរីកធំ។ បើតាមអ្នកនាំពាក្យរបស់ក្រសួងការបរទេសចិន សមុទ្រក្រហមជាច្រកដ៏សំខាន់ សម្រាប់ការដឹកជញ្ជូនថាមពល ពាណិជ្ជកម្មអន្តរជាតិ។ ដូច្នេះ ចិនសង្ឃឹមថា គ្រប់ភាគីដើរតួនាទីស្ថាបនានិងទទួលខុសត្រូវខ្ពស់ដើម្បីការពារសន្តិសុខ និងស្ថិរភាពក្នុងតំបន់។ រុស្ស៊ីឯណោះវិញ នៅក្រោយការវាយប្រហាររបស់អាមេរិក និងអង់គ្លេសទៅលើក្រុមហ៊ូទី នៅយេម៉ែនបានទាមទារឲ្យក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំបន្ទាន់នៅថ្ងៃសុក្រនេះ នៅទីក្រុងញូវយ៉ក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ