កូរ៉េខាងត្បូងបរាជ័យក្នុងការបាញ់សាកល្បងរ៉ុកកែតអវកាស ទៅកាន់គន្លងតារាវិថី
ក្តីសង្ឃឹមរបស់កូរ៉េខាងត្បូង ចង់ក្លាយជាប្រទេសមហាអំណាចអវកាសត្រូវរលាយសូន្យទៅវិញ តែប៉ុន្មានម៉ោងក្រោយការបាញ់បង្ហោះសាកល្បងរ៉ុកកែតអវកាសនុរី Nuri។ នុរី បានហោះចេញផុតពីដីមែន ប៉ុន្តែមិនអាចទៅដល់គន្លងតារាវិថីដូចការចង់បានទេ។
ចុះផ្សាយនៅថ្ងៃ៖
ស្តាប់ - ០២:១៣
រ៉ុកកែតបីជាន់ មានដំណើរការល្អ ហោះឡើងដល់កម្ពស់៧០០គីឡូម៉ែត្រ ហើយផ្កាយរណបសិប្បនិម្មិតទម្ងន់មួយតោនកន្លះ ក៏បានផ្តាច់ខ្លួនចេញពីកាំជ្រួចប្រកបដោយជោគជ័យ ប៉ុន្តែមិនអាចទៅភ្ជាប់ខ្លួនក្នុងគន្លងតារាវិថីបានដូចការចង់បានទេ។ ពោលគឺការបង្ហោះរ៉ុកកែតអវកាស មិនអាចបំពេញបេសកកម្មបានចប់សព្វគ្រប់។ នេះបើតាមសេចក្តីប្រកាសរបស់លោក មូន ចែអ៊ីន ប្រធានាធិបតីកូរ៉េខាងត្បូង។ មូលហេតុគឺបណ្តាលមក ពីម៉ាស៊ីនរបស់កាំជ្រួចជាន់ទីបី បានរលត់នៅ៤៦វិនាទី មុនកំណត់។ បើតាមការលម្អិតរបស់រដ្ឋមន្ត្រីក្រសួងវិទ្យាសាស្ត្រកូរ៉េខាងត្បូង លោក Lim Hye-sook។
ប៉ុន្តែសម្រាប់លោកប្រធានាធិបតី ទោះបីជាបេសកកម្មមិនអាចសម្រេចកម្មវត្ថុក៏ដោយ ក៏កូរ៉េខាងត្បូងមានមោទនភាពនឹងការសាកល្បងជាលើកទីមួយ បង្ហោះរ៉ុកកែតផលិតក្នុងស្រុកទាំងស្រុង នេះដែរ។ កូរ៉េខាងត្បូងនឹងធ្វើការសាកល្បងជាថ្មី នៅខែឧសភា ខាងមុខ ព្រោះប្រទេសណាមានបច្ចេកវិទ្យាអវកាសនាំមុខគេ នឹងនាំមុខគេ នៅពេលអនាគត ហើយកូរ៉េខាងត្បូងអាចធ្វើបាន ដោយមិនទាន់ហួសពេលទេ។ នេះជាការគូសបញ្ជាក់បន្ថែមរបស់លោក មូន ចែអ៊ីន។
សូមបញ្ជាក់ថា នៅពេលបាញ់បង្ហោះ សភាកូរ៉េខាងត្បូង បានផ្អាកសកម្មភាពប្រជុំរបស់ខ្លួន ចំណែកលោកប្រធានាធិបតីមូនចែអ៊ីន បានអញ្ជើញទៅចូលរួមតាមដានការបាញ់សាកល្បងរ៉ុកកែតអវកាសដោយផ្ទាល់ផង។ ការបាញ់បង្ហោះចេញដែលហាក់ដូចជាមានដំណើរការល្អ ហើយអាចនាំដល់ជោគជ័យ។
មានសេដ្ឋកិច្ចលូតលាស់ខ្លាំងលំដាប់ទី១២ពិភពលោក ជាប្រទេសមានបច្ចេកវិទ្យាជឿនលឿនជាងគេបំផុតមួយខាងផ្នែកទូរស័ព្ទចល័ត កូរ៉េខាងត្បូងយឺតយ៉ាវខ្លាំងក្នុងវិស័យអវកាស។ កាលពីឆ្នាំ២០០៩-២០១០ សេអូលបានសាកល្បងបង្ហោះកាំជ្រួចទៅអវកាសដោយប្រើបច្ចេកវិទ្យារុស្ស៊ីពីរលើក តែត្រូវបរាជ័យទាំងពីរដង។ កាំជ្រួចទីពីរបានផ្ទុះឆេះនៅពេលហោះចេញបានតែពីរនាទី។ តែកូរ៉េខាងត្បូងបង្ហោះរ៉ុកកែត(ប្រើបច្ចេកវិទ្យារុស្ស៊ី) បានសម្រេច នៅឆ្នាំ២០១៣។ ហើយកាលពីខែមីនា២០២១ លោកម៉ូន ចែអ៊ីន បានកំណត់កម្មវត្ថុអវកាសបង្ហោះយានអវកាសទៅក្នុងតារាវិថីនៅឆ្នាំ ក្រោយ និង ប្រែក្លាយក្តីស្រមៃបង្ហោះយានទៅឋានព្រះចន្ទនៅឆ្នាំ ២០៣០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ