ហុងកុង បានកាត់ទោសអនីតិជន ក្រោមច្បាប់សន្តិសុខជាតិ
ថ្ងៃសៅរ៍នេះ ជាលើកទី១ តុលាការហុងកុងបានផ្តន្ទាទោសដាក់ពន្ធនាគា អនីតិជន នៅក្រោមច្បាប់ការពារសន្តិសុខជាតិ។ សមាជិកក្រុមគាំទ្រឯករាជ្យភាព ចំនួន ៤នាក់ ដែលមានអាយុក្រោម ១៨ឆ្នាំ ត្រូវបានតុលាការកាត់ទោសឲ្យជាប់ពន្ធនាគារក្នុងបទចោទប្រកាន់ បះបោរប្រឆាំងរដ្ឋាភិបាល។ ពួកគេត្រូវជាប់ឃុំខ្លួន នៅក្នុងមជ្ឈមណ្ឌលបណ្តុះបណ្តាលកែប្រែសម្រាប់ជនមានអាយុពី១៤ ទៅ ២០ ឆ្នាំ។
ចុះផ្សាយនៅថ្ងៃ៖
ស្តាប់ - ០១:៤២
ជនជាប់ទោសទាំងអស់មានប្រាំនាក់ ដែល៤នាក់មិនទាន់គ្រប់អាយុ ត្រូវបានកាត់ទោសឱ្យជាប់ពន្ធនាគារ រហូតដល់ ៣ ឆ្នាំ។ ពួកគេត្រូវបានចោទប្រកាន់ពីបទ សមគំនិតដើម្បីញុះញង់ឱ្យមានការបះបំបោរ ផ្តួលរបបគ្រប់គ្រងរដ្ឋ ដែលមានចែងនៅក្នុងច្បាប់ការពារសន្តិសុខជាតិ ដែលចិនបានដាក់ឱ្យប្រើប្រាស់នៅទីក្រុងហុងកុង កាលពីពាក់កណ្តាលឆ្នាំ ២០២០។
ច្បាប់សន្តិសុខជាតិបានចែងថា ជនណាដែលញុះញង់ធ្វើការបះបំបោរ ផ្តួលរបបគ្រប់គ្រងរដ្ឋ ត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ ប្រសិនបើករណីនេះមានលក្ខណៈធ្ងន់ធ្ងរ។
ជនជាប់ទោសមិនទាន់គ្រប់អាយុរួមមាន ក្មេងស្រីអាយុ 16 ឆ្នាំម្នាក់ និងក្មេងៗអាយុ 17 ឆ្នាំបីនាក់ទៀត ដែលបានចូលរួមជាសមាជិកនៃក្រុមគាំទ្រឯករាជ្យតូចមួយ ធ្វើការផ្សព្វផ្សាយ អំពាវនាវការបះបោរដោយហិង្សា ប្រឆាំងនឹងរដ្ឋាភិបាលចិន នៅតាមស្តង់ លើផ្លូវសាធារណៈ និងនៅតាមប្រព័ន្ធបណ្តាញសង្គមកាលពីឆ្នាំមុន។
ជាក់ស្តែងក្រុមនេះបានផ្សព្វផ្សាយសាររបស់ខ្លួននៅកន្លែងដែលភាពមមាញឹកដូចជាស្ថានីយ៍រថភ្លើង ហើយបានធ្វើសន្និសីទសារព័ត៌មាន និងរៀបចំការផ្សាយតាមអ៊ីនធឺណិត អស់រយៈពេល ៤ ខែ។ ក្រុមជនជាប់ចោទនេះបានលើកឡើងពីការធ្វើបដិវត្តន៍របស់បារាំង និងការតស៊ូរបស់អ៊ុយក្រែនសម្រាប់លទ្ធិប្រជាធិបតេយ្យ ដើម្បីគាំទ្របុព្វហេតុរបស់ពួកគេ។
ស្របពេលនេះដែរ អាជ្ញាធរក៏បានបើកការកាត់ទោស លើបទអំពើភេរវកម្មដាច់ដោយឡែកមួយ លើសមាជិកផ្សេងទៀតនៃក្រុមគាំទ្រឯករាជ្យភាពនេះ។ ពួកគេត្រូវបានចោទប្រកាន់ថា បានព្យាយាមផលិតគ្រឿងផ្ទុះនិង មានផែនការបំផ្ទុះគ្រាប់បែកផងដែរ។
ការគាំទ្រចលនាប្រជាធិបតេយ្យរបស់ហុងកុងត្រូវបានធ្លាក់ចុះ ដោយសារការដាក់សម្ពាធរបស់ច្បាប់សន្តិសុខជាតិ និងការអនុវត្តច្បាប់បះបោរកាលពីសម័យអាណានិគម។ មកដល់ពេលនេះមានរហូតដល់ ២១០ នាក់ត្រូវបានចាប់ខ្លួនក្រោមច្បាប់នេះ ហើយក្នុងនោះ ១៣០ នាក់ត្រូវបានថ្កោលទោសជាផ្លូវការណ៍ ទៅលើទស្សនៈនយោបាយ របស់ពួកគេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ