មិនខុសពីឆ្នាំមុន បរិយាសកាសភ័យខ្លាច គ្របដណ្តប់លើការរំលឹកវិញ្ញាណក្ខន្ធព្រឹត្តិការណ៍ទីលានធានអានមិន
នៅចិនខួបលើកទី៣៤ នៃការបង្រាបបាតុកម្មនៅទីលានធានអានមិន ៤ មិថុនា ១៩៨៩ ត្រូវគ្របសង្កត់ដោយបរិយាកាសភ័យខ្លាច មិនខុសពីឆ្នាំមុនៗនោះទេ។ អាជ្ញាធរចិនបានប្រើគ្រប់វិធី ដើម្បីរារាំង និងបំភ័យ មិនឲ្យមានការរំលឹក ឬនិយាយអ្វីទាំងអស់ ទាក់ទិននឹងព្រឹត្តិការណ៍នេះ មិនថានៅទីលានធានអានមិនទីក្រុងប៉េកាំង ឬនៅលើបណ្តាញសង្គមនោះទេ។ នៅហុងកុងឯណោះ ដែលតែងតែមានជួបជុំគ្នាអុជទានដើម្បីរំលឹកវិញ្ញាណក្ខន្ធ អាជ្ញាធរបានចាប់ខ្លួនមនុស្សជាច្រើននាក់ នៅព្រឹកថ្ងៃអាទិត្យទី៤មិថុនាម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥៩
ការចងចាំ ស្តីពីព្រឹត្តិការណ៍បង្ក្រាបបាតុកម្មនៅទីលានធានអានមិន ថ្ងៃទី៤មិថុនា ឆ្នាំ១៩៨៩ ត្រូវបានរដ្ឋអំណាចកុម្មុយនីស្តចិន ប្រឹងប្រែងគ្រប់មធ្យោបាយដើម្បីលុបដានប្រវត្តិសាស្ត្រដ៏សោកសង្រេងមួយនេះ។ យុវជនចិនសម័យថ្មី ភាគច្រើនមិនធ្លាប់ដឹងឮ អំពីព្រឹត្តិការណ៍ នៃការតវ៉ាទាមទារសិទ្ធិសេរីភាព និងលទ្ធិប្រជាធិបតេយ្យរបស់យុវជនចិន នាសម័យទសវត្សឆ្នាំ៨០នោះឡើយ។
យោងតាម លោក Stephane Lagarde អ្នករាយការណ៍ព័ត៌មានវិទ្យុបារាំង RFI ប្រចាំនៅក្រុងប៉េកាំង គឺដូចជារៀងរាល់ឆ្នាំ អាជ្ញាធរចិនបានរឹងបន្តិងសន្តិសុខ យ៉ាងម៉ឺងម៉ាត់នៅទីលានធានអានមិន។ ជាងនេះទៀត សូម្បីតែអេម៉ូទីកុន រូបទៀន នៅលើកម្មវិធីទូរស័ព្ទដៃ ក៏ត្រូវបានអាជ្ញាធរចិនលុបចោលដែរ ដើម្បីកុំឲ្យមនុស្សយកវាទៅប្រើ ជានិម្មិតរូបនៃការអុជទៀន រំលឹកវិញ្ញាណក្ខន្ធជនរងគ្រោះ។
តែយ៉ាងណា ការព្យាយាមខ្ទប់ ឬចង់លុបទំព័រប្រវត្តិសាស្ត្រនេះ គឺមិនអាចធ្វើទៅបានទាំងស្រុងទេ ដរាបណានៅតែមានប្រជាជនចិនខ្លះ ដែលមានសេចក្តីក្លាហាន ហាននិយាយរំលឹកអំពីហេតុការណ៍នេះ បើទោះបីជាដឹងថាត្រូវប្រឈមនឹងចាប់ដាក់ឃុំក៏ដោយ។ យ៉ាងណាមិញ ក្រុមស្ត្រីជាម្តាយរបស់ជនរងគ្រោះ ដែលបានស្លាប់នៅទីលានធានអានមិន បានអំពាវនាវសាជាថ្មីម្តងទៀត ឲ្យរដ្ឋអំណាចគណបក្សកុម្មុយនីស្តចិន ហ៊ានសារភាពទទួលកំហុស ចំពោះការសម្លាប់យ៉ាងព្រៃផ្សៃដែលខ្លួនបានធ្វើទៅលើយុវជនចិន។
ដោយឡែក នៅហុងកុងឯណោះ សង្កាត់ Causeway Bay ដែលជានិច្ចជាកាល តែងតែមានការជួបជុំអុជទៀនរំលឹកវិញ្ញាណក្ខន្ធជនរងគ្រោះ ឆ្នាំនេះក៏បានស្ងាត់ជ្រងំដែរ។ ជាមួយនឹងច្បាប់សន្តិសុខជាតិ ដែលប៉េកាំងបានដាក់កំហិត ហុងកុងគឺមិនខុសពីខេត្តផ្សេងៗរបស់ចិនទេ ពោលគឺមិនអាចជួបជុំធ្វើបាតុកម្មអ្វីបានទាំងអស់ ជាពិសេសការជួបជុំ នៅថ្ងៃទី៤មិថុនា។ លោក ចន លី ប្រមុខរដ្ឋបាលហុងកុង បានប្រាកាសគំរាមទុកជាមុនថា ប្រជាជនហុងកុងណា ដែលហ៊ានបំពានច្បាប់ គឺត្រូវតែសុខចិត្តត្រៀមខ្លួនទទួលយកផលវិបាក។
ត្រឹមព្រឹកថ្ងៃអាទិត្យទី៤មិថុនា មនុស្សយ៉ាងហោច៨នាក់ ត្រូវបានសមត្ថកិច្ចហុងកុងចាប់ខ្លួន។ ក្នុងចំណោមអ្នកត្រូវគេចាប់ខ្លួន គឺមានស្ត្រីសកម្មជនប្រជាធិបតេយ្យហុងកុង អាយុ៦៥ឆ្នាំម្នាក់ ដែលត្រូវគេស្គាល់ឈ្មោះថា ម៉ាដាម វង់។ អ្នកខ្លះត្រូវនគរបាលចាប់បញ្ជូនខ្លួនយកទៅ បន្ទាប់ពីពួកគេបានស្រែកថា « នាំគ្នាលើកទៀនឡើង » ឬ ស្រែកថា « សូមប្រជាជនហុងកុង កុំភ្លេចថ្ងៃទី៤មិថុនាឲ្យសោះ »។
សូមរំលឹកថា នៅយប់ថ្ងៃទី៣ ឈានចូលថ្ងៃទី៤មិថុនា ឆ្នាំ១៩៨៩ គណបក្សកុម្មុយនីស្តចិនបានបញ្ជាកងទ័ពចិន ឲ្យមកបំបែកបាតុកម្ម របស់យុវជនសិស្សនិស្សិត យ៉ាងសាហាវព្រៃផ្សៃបំផុត។ ប្រភពផ្សេងៗគ្នា បានបង្ហាញតួលេខចំនួនមនុស្សស្លាប់ខុសគ្នា។ បើផ្អែកតាមអង្គការ Amnesty International និងលោក Liu XiaoBo ជ័យលាភីពានរង្វាន់ណូបែលសន្តិភាព ដែលមានវត្តមាននៅទីលានធានអានមិនផ្ទាល់ គឺយ៉ាងហោចបាតុករចំនួនជាង១០០០នាក់ ដែលត្រូវបានកងទ័ពសម្លាប់នៅថ្ងៃកើតហេតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ