អ្នកកាសែតអូស្ត្រាលីជាប់ឃុំនៅចិនបានទទួលសេរីភាពវិញ
ជាប់ពន្ធនាគារនៅក្នុងប្រទេសចិន អស់ជាងបីឆ្នាំ អ្នកកាសែតជាតិអូស្ត្រាលី ឆឹង ឡី (Cheng Lei)បានទទួលសេរីភាពនិងបានត្រលប់ទៅដល់ក្រុងមែលប៊នប្រទេសអូស្ត្រាលីវិញហើយនៅថ្ងៃពុធទី១១តុលា២០២៣នេះ។ នេះបើតាមសេចក្តីប្រកាសរបស់លោកនាយករដ្ឋមន្ត្រីអង់តូនីអាល់បានីស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
ពលរដ្ឋអូស្ត្រាលីសូមជូនពរឱ្យអ្នកស្រីឆឹងឡីបានរស់ជួបជុំកូនតូចៗទាំងពីរ។ នេះជាសេចក្តីប្រកាសរបស់លោកនាយករដ្ឋមន្ត្រីអូស្ត្រាលីអង់តូនី អាល់បានីស៊ី នៅចំពោះអ្នកសារព័ត៌មានដោយអះអាងថាអ្នកស្រី ឆឹង ឡី មានក្តីសោមនស្សរីករាយណាស់ដែលបានវិលត្រលប់មកផ្ទះវិញ។
មានអាយុ៤៨ឆ្នាំ កើតនៅប្រទេសចិន ហើយបាននិរទេសខ្លួនមករស់នៅអូស្ត្រាលីតាំងពីបឋមវ័យ អ្នកស្រី ឆឹង ឡី បានវិលទៅបម្រើការងារនៅក្នុងប្រទេសកំណើតវិញ។ តែចិនមិនអនុញ្ញាតឱ្យពលរដ្ឋមានសញ្ជាតិពីរទេ។ អ្នកស្រីធ្លាប់ធ្វើការឱ្យបណ្តាញទូរទស្សន៍អាមេរិកCNBC នៅក្នុងប្រទេសចិន រយៈពេល៩ឆ្នាំ មុននឹងក្លាយជាអ្នកផ្សាយព័ត៌មាននៅទូរទស្សន៍សាធារណៈចិនCGTN។ អ្នកស្រីមានមុខនិងល្បីខាងជួបសម្ភាសន៍ប្រធានក្រុមហ៊ុនសហគ្រាសនានាជាច្រើននៅលើពិភពលោក។
អតីតអ្នកកាសែតចិននេះ បានជាប់ឃុំតាំងពីខែសីហា២០២០មក។ ជាផ្លូវការ អ្នកស្រីជាប់ចោទពីបទបានផ្តល់ឯកសារសម្ងាត់រដ្ឋទៅឱ្យបរទេស។ នៅឆ្នាំ២០២២ តុលាការបានសម្រេចជំនំជម្រះក្តីនិងកាត់ទោសអ្នកស្រីដោយបិទទ្វារ។ សូម្បីតែឯកអគ្គរដ្ឋទូតអូស្ត្រាលីប្រចាំទីក្រុងប៉េកាំងក៏មិនបានទទួលការអនុញ្ញាតឱ្យចូលស្តាប់សវនាការដែរ។
មុនការចាប់ខ្លួន អ្នកស្រីបានបង្ហោះសារលើបណ្តាញសង្គមហ្វេសប៊ុក រិះគន់លោកប្រធានាធិបតីចិនស៊ីជិនពីង និងចំណាត់ការប្រឆាំងវិបត្តិកូវីដ១៩របស់អាជ្ញាធរចិន។ ពីក្នុងពន្ធនាគារ អ្នកស្រីបានរៀបរាប់អំពីលក្ខខណ្ឌដ៏លំបាកនៃការជាប់ឃុំឃាំង ដោយអ្នកស្រីអាចទទួលពន្លឺថ្ងៃបានត្រឹមតែ១០ម៉ោងប៉ុណ្ណោះក្នុងមួយឆ្នាំ។ អាជ្ញាធរអូស្ត្រាលីបានផ្សព្វផ្សាយសារនេះជាសាធារណៈកាលពីខែសីហាកន្លងទៅ។
ការចាប់ឃុំឃាំងអ្នកកាសែតនេះបានជំរុញឱ្យទំនាក់ទំនងចិនអូស្ត្រាលីដែលនៅពេលនោះល្អក់កករស្រាប់ កាន់តែធ្លាក់ចុះដុនដាបមួយកំរិតទៀត។ ប៉ុន្តែថ្ងៃនេះ ជាមួយនឹងការដោះលែងអ្នកស្រីឆឹងឡី ក្រោយការបញ្ចប់ដំណើរបែបបទតុលាការ លោកនាយករដ្ឋមន្ត្រីអូស្ត្រាលី បានប្រកាសទៅបំពេញទស្សនកិច្ចផ្លូវការនៅប្រទេសចិន។ ការដោះលែងអ្នកកាសែតបានសម្រួលឱ្យទស្សនកិច្ចអាចប្រព្រឹត្តទៅបាននៅក្នុងឆ្នាំនេះតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ