ហុងកុង៖ ការបោះឆ្នោតលើកទី១ ដែលមានតែ “បេក្ខជនស្នេហាជាតិ” មានប្រជាជនទៅបោះតិចខ្លាំង
នៅហុងកុង កាលពីថ្ងៃអាទិត្យទី១០ធ្នូ មានការបោះឆ្នោតជ្រើសរើសសមាជិកក្រុមប្រឹក្សាសង្កាត់ទាំង១៨។ ជាការបោះឆ្នោតលើកទី១ ដោយអនុឡោមតាមច្បាប់បោះឆ្នោតថ្មី ដាក់កំហិតដោយប៉េកាំង ដែលអនុញ្ញាតឲ្យតែ “បេក្ខជនស្នេហាជាតិ” ប៉ុណ្ណោះ ទើបអាចឈរឈ្មោះឲ្យគេបោះឆ្នោតបាន។ ជាការកត់សំគាល់ ការបោះឆ្នោតកាលពីថ្ងៃអាទិត្យ មានការចូលរួមតិចបំផុតពីសំណាក់ប្រជាពលរដ្ឋហុងកុង ពោលគឺអត្រាអ្នកទៅបោះឆ្នោត មានប្រមាណតែ២៧,៥៤%តែប៉ុណ្ណោះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៤០
អាជ្ញាធរហុងកុង បានព្យាយាមផ្សព្វផ្សាយពាណិជ្ជកម្ម ដាក់ផ្ទាំងបដាពាសពេញទីក្រុង ដើម្បីជំរុញប្រជាជនឲ្យទៅបោះឆ្នោត ។ មិនត្រឹមប៉ុណ្ណោះទេ គណៈកម្មាធិការរៀបចំការបោះឆ្នោត បានសម្រេចពន្យាម៉ោងបិទការិយាល័យបោះឆ្នោត ដល់ទៅ១ម៉ោងកន្លះបន្ថែមទៀត។
តែយ៉ាងណា យោងតាមតួលេខផ្សាយលើគេហទំព័ររដ្ឋបាលហុងកុង នៅព្រឹកថ្ងៃចន្ទ ក្នុងចំណោមប្រជាជនហុងកុង ៤លាន៣សែននាក់ គឺមានតែ ១លាន២សែននាក់ទេ ដែលបានទៅចូលរួមបោះឆ្នោត ជ្រើសរើសសមាជិកក្រុមប្រឹក្សាសង្កាត់ កាលពីថ្ងៃអាទិត្យ ទី១០ធ្នូ។ នេះគឺជាអត្រាអ្នកទៅចូលរួមបោះឆ្នោតទាបបំផុត នៅក្នុងប្រវត្តិសាស្ត្រហុងកុង។
ទោះជាយ៉ាងនេះក្តី លោក John Lee ប្រធានរដ្ឋបាលហុងកុងបានអបអរសាទរ ថាការបោះឆ្នោតនេះ បានប្រព្រឹត្តិទៅយ៉ាងរលូន។ លោកបន្ថមេថា ការបោះឆ្នោតនេះ គឺជំហានចុងក្រោយមួយ ដើម្បីឈានទៅរៀបចំអនុវត្តគោលនយោបាយគ្រិះ “ហុងកុងក្រោមការគ្រប់គ្រងរបស់អ្នកស្នេហាជាតិ”។
សូមបញ្ជាក់ថា ហុងកុងមានច្បាប់បោះឆ្នោតថ្មី កាលពីខែឧសភា ដែលត្រូវបានប៉េកាំងដាក់បញ្ជាមក។ កាលពីមុន គឺប្រជាជនហុងកុង មានសិទ្ធិបោះឆ្នោតដោយផ្ទាល់ ដើម្បីជ្រើសសមាជិកក្រុមប្រឹក្សាសង្កាត់ ដែលមានទាំងអស់៤៦២អាសនៈ។ ក៏ប៉ុន្តែយោងតាមច្បាប់ថ្មី គឺមានតែអាសនៈ៨៨ប៉ុណ្ណោះ ដែលប្រជាជនហុងកុងអាចបោះឆ្នោតជ្រើសតាំងដោយផ្ទាល់។ ចំណែកសមាជិក៣៨២ទៀត គឺត្រូវបានតែងតាំងដោយរដ្ឋបាលតំបន់ហុងកុង ឬក៏ជាអ្នកដែលគេចាត់ទុកថាជាមនុស្សស្មោះនឹងរដ្ឋាភិបាលជាដើម។ បេក្ខជនទាំង៨៨នាក់ ដែលប្រជាជនអាចបោះឆ្នោតជ្រើសរើសដោយផ្ទាល់នោះទៀតសោត ក៏ត្រូវតែឆ្លងកាត់ការសម្រេច ពីសំណាក់គណៈកម្មាធិការចំនួន៣ ស្ថិតក្រោមបង្គាប់របស់រដ្ឋបាលហុងកុង។ ពោលគឺទាល់តែបេក្ខជននោះ ត្រូវគេចាត់ទុកថា ជា “បេក្ខជនស្នេហាជាតិ” ទើបអាចឈរឈ្មោះបាន។
លោកJohn Lee ប្រធានរដ្ឋបាលហុងកុង ធ្លាប់បានលើកឡើងថា ចាប់ពីពេលនេះទៅ ក្រុមប្រឹក្សាសង្កាត់ទាំង១៨នៅហុងកុង លែងដូចមុនហើយ។ ពោលគឺក្រុមប្រឹក្សាទាំងនេះ លែងជាទីកន្លែងដែលក្រុមប្រឆាំង ប្រើប្រាស់ដើម្បីធ្វើសកម្មភាពវិទ្ធង្សនា ទាមទារឯករាជ្យ ឬធ្វើឲ្យខូចសន្តិសុខជាតិ ទៀតហើយ។
គួរបញ្ជាក់ដែរ ថាការពិតក្រុមប្រឹក្សាសង្កាត់ហុងកុង មានតួនាទី ពាក់ព័ន្ធតែកិច្ចការគ្រប់គ្រងជាក់ស្តែង ក្នុងសង្កាត់នីមួយៗតែប៉ុណ្ណោះ តួយ៉ាង ការគ្រប់គ្រងប្រព័ន្ធលូ កិច្ចការដឹកជញ្ជូន និងគ្រប់គ្រងគ្រឿងបរិក្ខានៅតាមទីសាធារណៈតែប៉ុណ្ណោះ។ លោក John Burns សាស្ត្រាចារ្យម្នាក់នៅសកលវិទ្យាល័យហុងកុង បានលើកឡើងថា ប្រជាជនហុងកុងមិនសូវយកចិត្តទុកដាក់ នឹងការបោះឆ្នោតកាលនេះទេ ព្រោះវាមិនមានអ្វីសំខាន់។ ដោយឡែក លោក Kenneth Chan នយោបាយវិទូនៅហុងកុង បានលើកឡើងថា ចំនួនអ្នកទៅបោះឆ្នោតតិចបំផុតមិនធ្លាប់មាន កាលពីថ្ងៃអាទិត្យ វាគឺជារឿងអាម៉ាសខ្លាំងណាស់ សម្រាប់អាជ្ញាធរហុងកុង។
គួរកត់សំគាល់ដែរថា ផ្អែកតាមបណ្តាញព័ត៌មានហុងកុង អាជ្ញាធរបានបញ្ចេញកម្លាំងនគរបាល ចំនួន ១២០០០នាក់ ដើម្បីរារាំងរាល់សកម្មភាពទាំងអស់ ដែលប្រឆាំងនឹងការបោះឆ្នោតកាលពីថ្ងៃអាទិត្យ។ យ៉ាងហោចណាស់ មានមនុស្ស៦នាក់ ដែលជាសមាជិក ចលនាសម្ព័ន្ធសង្គមប្រជាធិបតេយ្យហុងកុង ត្រូវបានគេចាប់ខ្លួនកាលពីថ្ងៃអាទិត្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ