បន្ទាប់ពីស្ងប់មួយរយៈពេលយូរ ហុងកុងផ្តើមបាតុកម្មជាថ្មីប្រឆាំងនឹងច្បាប់សន្តិសុខជាតិ
ថ្ងៃអង្គារ៍ទី២៧កុម្ភៈ ហុងកុងផ្តើមមានសកម្មភាពបាតុកម្មជាថ្មី។ បាតុកម្មដ៏កម្រនេះប្រឆាំងនឹងច្បាប់សន្តិសុខជាតិ ដែល ក្រុមបាតុកម្មគាំទ្រលទ្ធិប្រជាធិបតេយ្យ យល់ថាជាច្បាប់បំពានសិទ្ធិមនុស្សនិងរំលាយប្រជាធិបតេយ្យ។ អាជ្ញាធរហុងកុងបានដាក់ចេញគម្រោងច្បាប់សន្តិសុខជាតិថ្មីបន្ថែម ពាក់ព័ន្ធសំណុំរឿងក្បត់ជាតិនិងចារកម្ម។ ដំណឹងច្បាប់ថ្មីនេះប្រកាសឲ្យដឹងពីឆ្នាំទៅមិញ ហើយមន្ត្រីជាន់ខ្ពស់ក្រសួងយុត្តិធម៌ហុងកុង អះអាងថា«គ្មាននរណាជំទាស់ឡើយ» បន្ទាប់ពីអាជ្ញាធរបានដាក់ឲ្យប្រឹក្សាផ្តល់យោបល់ជាសាធារណៈ ពេញ១ខែរួចមកហើយ។ ការប្រកាសបែបនេះ ត្រូវក្រុមបាតុករហុងកុងនិងសកម្មជនគាំទ្រប្រជាធិបតេយ្យ ច្រានចោលទាំងស្រុង។
ចុះផ្សាយនៅថ្ងៃ៖
ស្តាប់ - ០៣:០៤
ក្រោមក្រសែភ្នែករបស់តម្រួតនគរបាលហុងកុង ពួកបាតុកម្មគាំទ្រលទ្ធិប្រជាធិបតេយ្យហុងកុង បានសម្តែងមតិនិងលើកបដារិះគន់គម្រោងច្បាប់ថ្មីស្តីពីសន្តិសុខជាតិ។ បាតុកម្ម នៅថ្ងៃអង្គារ ទី២៧កុម្ភៈ ធ្វើឡើងដ៏កម្រ បន្ទាប់ពីខកខានជាច្រើនខែឆ្នាំមកហើយ។ ពេលនេះ ការសម្តែងមតិរៀបចំធ្វើឡើងនៅមុខការិយាល័យនីតិប្រតិបត្តិហុងកុង តែម្តង។
បាតុករ អ្នកស្រី យូ វៃប៉ាន់ សកម្មជនលេចធ្លោនៃអង្គការសម្ព័ន្ធសង្គមប្រជាធិបតេយ្យហុងកុង បានអះអាងថា មាត្រាគម្រោងច្បាប់ថ្មីនេះ ធ្វើឲ្យខូចលទ្ធិប្រជាធិបតេយ្យ និងប៉ះពាល់ដល់សិទ្ធិមនុស្សនៅហុងកុង។ សកម្មជនមួយរូបទៀត ឈ្មោះ ចាន់ ពូយីង ថ្លែងថាច្បាប់សន្តិសុខជាតិមានសារៈសំខាន់ពិតមែនហើយសម្រាប់ប្រជាពលរដ្ឋ តែវាត្រូវតែបង្កើតឡើងដោយឈរលើស្មារតីប្រជាធិបតេយ្យ សេរីភាព និងនីតីរដ្ឋ។
គួររំឭកថា ចិនដីគោក បានដាក់ឲ្យអនុវត្តច្បាប់សន្តិសុខជាតិរបស់ខ្លួននៅហុងកុង ក្នុងថ្ងៃទី១ កក្កដា ឆ្នាំ ២០២០។ ក្រោមអំណាចច្បាប់នេះ តុលាការហុងកុងបានកាត់ទោសសកម្មជនគាំទ្រប្រជាជាធិបតេយ្យ និងអ្នកនយោបាយប្រឆាំងជាច្រើននាក់ មកហើយ។ ខែតុលា ឆ្នាំទៅមិញ លោក ចន លី ថ្នាក់ដឹកនាំអាជ្ញាធរហុងកុង ក៏បានប្រកាសពីបំណងបង្កើតច្បាប់ថ្មីបន្ថែមទៀត ស្តីពីសន្តិសុខជាតិរបស់ខ្លួន ទាក់ទងនឹងបទល្មើសចំនួន ៧ ដូចជា បទល្មើសក្បត់ជាតិ និងសំណុំរឿងចារកិច្ច ជាដើម។
គម្រោងច្បាប់ថ្មីនេះ ត្រូវអាជ្ញាធរដាក់ឲ្យប្រឹក្សាផ្តល់យោបល់ជាសាធារណៈ ពេញ១ខែ ដែលត្រូវផុតកំណត់ ថ្ងៃពុធ ទី២៨កុម្ភៈ។ លោក ប៉ូល ឡាំ រដ្ឋលេខាធិការក្រសួងយុត្តិធម៌ហុងកុង អះអាងថា នៅក្នុងពេលទុកឲ្យផ្តល់យោបល់ជាសាធារណៈ គ្មានអ្នកជំទាស់សោះឡើយ។ ផ្ទុយទៅវិញ បាតុករអ្នកស្រី យូ វៃប៉ាន់ លើកឡើងថា ពលរដ្ឋហុងកុងជាច្រើននាក់ បានថ្លែងក្តីបារម្ភ និងជំទាស់។
ជាការសម្គាល់ មន្ត្រីចិនជាន់ខ្ពស់ទទួលបន្ទុកដែនដីហុងកុងនិងម៉ាកាវ លោក ចៅ ប៉ាវឡុង បានធ្វើដំណើរកាលពីសប្តាហ៍មុន ទៅហុងកុង ហើយនិងបានជួបជាមួយមន្ត្រីគ្រប់គ្រងជាន់ខ្ពស់តំបន់ស្វយ័តហុងកុង និងអ្នកជំនាញធំៗ ដើម្បីបិទទ្វារជជែកគ្នាអំពីគម្រោងច្បាប់ថ្មីស្តីពីសន្តិសុខជាតិហុងកុង។
នៅហុងកុង ក្នុងថ្ងៃអង្គារ៍ដដែល តុលាការបានកាត់ទោស បុរសម្នាក់ឈ្មោះ ចូសេប ចន ឈ្មោះដើម វុង គិន-ឆុង ពីបទល្មើសញុះញ៉ុងជំរុញឲ្យធ្វើអប្បគមន៍បំបែករដ្ឋ។ លោកនេះ មានសញ្ជាតិ២ ហុងកុង-ព័រទុយហ្កាល់។ មុនពេលចាប់ខ្លួន លោក ចូសេប ចន ធ្លាប់ធ្វើជាប្រធានបក្សឯករាជ្យជាតិហុងកុង មូលដ្ឋាននៅអង់គ្លេស។ លោកក៏បានគ្រប់គ្រង់បណ្តាញព័ត៌មានអនឡាញជាច្រើនដែលនិយមរិះគន់ប្រឆាំងអាជ្ញាធរហុងកុងដែលស្និទនឹងចិនដីគោក។ មន្ត្រីទូតទុយហ្កាល់ បានប្រាប់ទីភ្នាក់ងារព័ត៌មានបារាំងអាអេហ្វប៉េ ថាតាំងពីថ្ងៃចាប់ខ្លួនដាក់មន្ទីរឃុំឃាំងក្នុងខែមិថុនា២០២២មក ស្ថានកុងស៊ុលព័រទុយហ្កាល់ប្រចាំនៅហុងកុង មិនអាចចូលសួរសុខទុក្ខទណ្ឌិតរូបនេះ បានសោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ