អាស៊ាននិងអូស្ត្រាលីអំពាវនាវឱ្យមានបទឈប់បាញ់ភ្លាមនិងជានិរន្តរ៍នៅហ្កាហ្សា
ក្រៅពីបរិហារទង្វើគំរាមកំហែងសន្តិសុខនៅសមុទ្ទចិនខាងត្បូង ប្រមុខដឹកនាំក្រុមប្រទេសជាសមាគមប្រជាជាតិអាស៊ីអាគ្នេយ៍ហៅកាត់ថាអាស៊ាន និងអូស្ត្រាលី បានចេញសេចក្តីថ្លែងការណ៍រួមនៅថ្ងៃពុធទី ៦មីនា២០២៤ អំពាវនាវសុំឱ្យមានបទឈប់បាញ់ភ្លាមនិងជានិរន្តរ៍នៅតំបន់ហ្កាហ្សា និងបានចាត់ទុកស្ថានភាពមនុស្សធម៌នៅក្នុងដែនដីមួយចំណិតរបស់ប៉ាឡេស្ទីនថា អាក្រក់ក្រៃ។
ចុះផ្សាយនៅថ្ងៃ៖
ស្តាប់ - ០២:១១
ស្ថានភាពនៅក្នុងតំបន់ហ្កាហ្សា ជាប្រធានបទពិភាក្សាគ្នាយ៉ាងចម្រូងចម្រាសក្នុងអំឡុងជំនួបប្រជុំបីថ្ងៃរវាងអូស្ត្រាលីនិងអាស៊ាន ដែលមានឥណ្ឌូណេស៊ីនិងម៉ាឡេស៊ីជាប្រទេសអ៊ីស្លាមដ៏ធំជាងគេបំផុត (៤០%នៃពលរដ្ឋអ៊ីស្លាមនៅលើពិភពលោករស់ក្នុងតំបន់អាស៊ីអាគ្នេយ៍) និងជាអ្នកគាំទ្របុព្វហេតុប៉ាឡេស្ទីនខ្លាំងបំផុត។
ប៉ុន្តែទោះមានតានតឹងការទូតយ៉ាងខ្លាំងក្តី ក៏នៅទីបំផុត ជំនួបកំពូលអាស៊ានអូស្ត្រាលីបានបិទបញ្ចប់នៅថ្ងៃពុធទី ៦ មីនានេះ ដោយចេញសេចក្តីថ្លែងការណ៍រួម អំពាវនាវជាលក្ខណៈទូទៅសុំឱ្យមានបទឈប់បាញ់ភ្លាម និងជានិរន្តរ៍នៅតំបន់ហ្កាហ្សា។
នៅក្នុងសេចក្តីថ្លែងការណ៍ អាស៊ាននិងអូស្ត្រាលី ក៏បានថ្កោលទោសរាល់គ្រប់សកម្មភាពវាយប្រហារលើជនស៊ីវិល និងលើហេដ្ឋារចនាសម្ព័ន្ធស៊ីវិលដែលជំរុញឱ្យវិបត្តិមនុស្សធម៌ នៅតំបន់ហ្កាហ្សាកាន់តែធ្លាក់ដុនដាបបន្ថែម ដោយកំហិតជាអាទិ៍ ការចែកចាយស្បៀងអាហារ ទឹកស្អាត ព្រមទាំងវត្ថុជាសេចក្តីត្រូវការគ្រឹះរបស់មនុស្ស។ អាស៊ាននិងអូស្ត្រាលី បានទទូចសុំឱ្យមានការផ្តល់ជំនួយមនុស្សធម៌ យ៉ាងលឿនរហ័ស គ្មានការរារាំង និងបានទៅដល់ជាប្រាកដដល់ជនរងគ្រោះពិត ដូចជាសុំបង្កើនសមត្ថភាពបញ្ជូនជំនួយតាមច្រកព្រំដែនផ្លូវគោក ឬតាមផ្លូវទឹក។ ប៉ុន្តែនៅក្នុងសេចក្តីថ្លែងការណ៍រួម គ្មានទេពាក្យគ្រោះទុរ្ភិក្សនៅហ្កាហ្សា ព្រោះសមាជិកអាស៊ានមួយផ្នែកទៀត មានអាទិ៍សិង្ហបុរី មានទំនាក់ទំនងជិតស្និទ្ធនឹងអ៊ីស្រាអែល បានជំទាស់ ដើម្បីកុំឱ្យប៉ះពាល់ដល់ចិត្តអ៊ីស្រាអែល។
ថ្វីបើអូស្ត្រាលីបានសម្រេចផ្អាកការផ្តល់ហិរញ្ញប្បទានដល់ទីភ្នាក់ងារទទួលបន្ទុកជនភៀសខ្លួនប៉ាឡេស្ទីនរបស់អង្គការសហប្រជាជាតិហើយក៏ដោយ ក៏អូស្ត្រាលីបានប្រកាសជាមួយអាស៊ាន គាំទ្រសកម្មភាពរបស់ស្ថាប័ននេះដែរ។
ជាចុងក្រោយ នៅជុំវិញបញ្ហាសមុទ្ទចិនខាងត្បូងវិញ ដោយមិនវាយប្រហារដោយចំៗលើចិន អាស៊ាននិងអូស្ត្រាលីបានប្រកាសលើកទឹកចិត្តឱ្យគ្រប់ប្រទេសបញ្ចៀសរាល់គ្រប់សកម្មភាពជាឯកតោភាគីណាដែលគំរាមកំហែងដល់សន្តិភាព សន្តិសុខនិងស្ថិរភាពតំបន់ ដើម្បីប្រែក្លាយសមុទ្ទចិនខាងត្បូងទៅជាសមុទ្ទសន្តិភាព និងរុងរឿង។ ជាប្រតិកម្មតប អ្នកនាំពាក្យចិន លោកស្រីម៉ៅ នីង បានចង្អុលមុខសហរដ្ឋអាមេរិកថាប្រើហ្វីលីពីនជាកូនអុក នៅក្នុងសមុទ្ទចិនខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ