សហជីពជប៉ុនតវ៉ាបានការដំឡើងប្រាក់ខែជាង ៥% ដែលខ្ពស់មិនធ្លាប់មាននៅជប៉ុន
រដ្ឋាភិបាលជប៉ុន និងសហព័ន្ធសហជីពដែលប្រមូលផ្តុំសហជីពជប៉ុនជាង៧៧០សំដែងក្តីរីករាយ ពេញចិត្ត នៅបន្ទាប់ពីការចរចាជាមួយក្រុមហ៊ុនសហគ្រាសស្តីពីការដំឡើងប្រាក់ខែបានផ្តល់លទ្ធផលជាវិជ្ជមាន។ តាមសហព័ន្ធសហជីព Rengo បន្ទាប់ពីតវ៉ាសុំដំឡើងប្រាក់ខែ៣,៨%កាលពីឆ្នាំមុន សហជីពជប៉ុននៅថ្ងៃសុក្រទី ១៥មីនាទទួលជោគជ័យម្តងទៀតក្នុងការទាមទារឲ្យក្រុមហ៊ុនសហគ្រាសជប៉ុនដំឡើងប្រាក់ខែឲ្យបុគ្គលិករបស់ខ្លួន ប្រមាណ៥,២៨%។ នៅក្នុងរយៈពេល៣០ឆ្នាំ នេះជាលើកទី១ ដែលក្រុមហ៊ុនជប៉ុនសុខចិត្តដំឡើងប្រាក់ខែបុគ្គលិក ក្នុងបរិមាណមួយដ៏ខ្ពស់ បំបែកឯតទគ្គកម្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:៣៦
ជាមហាអំណាចសេដ្ឋកិច្ចពិភពលោកទី៤ ក៏ពិតមែន ប៉ុន្តែ នៅជប៉ុន ប្រាក់ខែរបស់អ្នកធ្វើការមិនសូវជាខ្ពស់ប៉ុន្មាននោះទេ។ ជាមធ្យម អ្នកធ្វើការទទួលបានបា្រក់ខែរង្វង់ ២ពាន់អឺរ៉ូ ក្នុងមួយខែ។ ៤០%នៃបុគ្គលិកដែលមានការងារតែមួយ ឬការងារមិនសូវជាប់លាប់បានប្រាក់កម្រៃប្រចាំខែមិនដល់១៥០០អឺរ៉ូ។ គិតចាប់តាំងពីឆ្នាំ ១៩៩៩ មកដល់ឆ្នាំ២០២៣ ប្រាក់ខែនៅ ជប៉ុនកើនឡើងដោយតិចតួចបំផុត ដោយសារជប៉ុនគ្មានសន្ទុះកំណើនសេដ្ឋកិច្ចធំដុំ។ នៅប៉ុន្មានទសវត្សរ៍មកនេះ សហជីពជប៉ុនផ្តោតសំខាន់លើការការពារសន្តិសុខការងារ ជាជាងតវ៉ាទាមទារដំឡើងប្រាក់ខែឲ្យបុគ្គលិកជប៉ុន។
នៅឆ្នាំ ២០២២ នៅពេលវិបត្តិអតិផរណាចាប់អង្រួនជប៉ុន ក៏ដូចជាពិភពលោកទាំងមូល ដោយសារតែ បញ្ហាវត្ថុធាតុដើម និងថាមពលប្រេងឡើងថ្លៃដោយសារសង្រ្គាមរុស្ស៊ីឈ្លានពាន អ៊ុយក្រែន និងវិបត្តិជំងឺកូវីដ សហជីពជប៉ុនចាប់ភ្លឺភ្នែក គ្មានជម្រើសអ្វីក្រៅតែទាមទារសុំដំឡើងប្រាក់ខែ ដើម្បីឲ្យអ្នកធ្វើការជប៉ុនអាចចិញ្ចឹមជីវិតដោយសមរម្យ និងលែងត្រូវរឹតត្បិតគ្រប់ច្រកល្ហកដូចមុន។
នៅឆ្នាំមុន ដោយមានការជួយជំរុញ គាំទ្រពីរដ្ឋាភិបាលរបស់លោកនាយករដ្ឋមន្រ្តីគីស៊ីដា សហជីពជប៉ុនទាមទារបានសម្រេចឲ្យក្រុមហ៊ុនជប៉ុនដំឡើងប្រាក់ខែជាមធ្យម ប្រមាណ ៣,៥៨%។ គិតចាប់តាំងពីឆ្នាំ ១៩៩០ នេះជាលើកទី១ ដែលក្រុមហ៊ុនជប៉ុនសុខចិត្តដំឡើងប្រាក់ខែឲ្យបុគ្គលិក ក្នុងបរិមាណមួយដ៏ខ្ពស់ បំបែកឯតទគ្គកម្ម។ នៅថ្ងៃសុក្រ ទី ១៥មីនា សហជីពជប៉ុនបានទទួលជ័យជំនះជាប្រវត្តិសាស្រ្តមួយទៀត បន្ទាប់ពីចរចាទាមទារការដំឡើងប្រាក់ខែ ដល់ទៅ ជាង៥% ដែលជាអត្រាដ៏ខ្ពស់មិនធ្លាប់មាន។
ប៉ុន្តែ មិនមែនគ្រប់អ្នកធ្វើការនៅជប៉ុនដែលទទួលបានអត្ថប្រយោជន៍ពីការដំឡើងប្រាក់ខែ ដែលជាលទ្ធផលនៃការចរចារបស់សហជីព។ ប្រជាជនជប៉ុនប្រមាណ៨០%ដែលគេបានស្ទង់មតិ មិនបានសំដែងក្តីត្រេកអរដូចរដ្ឋាភិបាល នៅត្រង់ថា បុគ្គលិក៧០% ធ្វើការនៅតាមក្រុមហ៊ុនធុនតូច និងមធ្យម ដែលមិនសូវមានមធ្យោបាយដើម្បីដំឡើងប្រាក់ខែបុគ្គលិកឲ្យបាន៥%ដូចសហគ្រាស ក្រុមហ៊ុនធំៗ។
នៅឆ្នាំមុន ក្រុមហ៊ុនធុនតូច និងមធ្យមធ្លាប់បង្ហាញសមានចិត្តល្អ យល់ព្រមដំឡើងប្រាក់ខែតាមការទាមទាររបស់សហជីព នោះបើទោះបីជាត្រូវប្រឈមនឹងបញ្ហាដែលត្រូវដំឡើងតម្លៃទំនិញផលិតរបស់ខ្លួនក្តី។ កាលណោះ ក្រុមហ៊ុនធុនតូចនិងមធ្យមរបស់ជប៉ុនគ្មានជម្រើសច្រើន ព្រោះតែខ្វះកម្លាំងពលកម្ម។ ខ្វះកម្លាំងពលកម្ម ដោយសារតែ ចំនួនមនុស្សចាស់ច្រើន និងការធ្លាក់ថយចុះចំនួនប្រជាជនជប៉ុន។
លើកនេះក្រុមហ៊ុនតូច និងមធ្យមរបស់ជប៉ុនមិនប្រាកដថា នឹងអាចសំដែងសាមគ្គីភាព ឬចិត្តល្អជាមួយបុគ្គលិករបស់ខ្លួនដូចមុនទៀត។ គេអាចដំឡើងប្រាក់ខែ ទៅតាមសមត្ថភាព មធ្យោបាយរបស់ខ្លួន។ រដ្ឋាភិបាលជប៉ុនវិញ សង្ឃឹមថា ការដំឡើងប្រាក់ខែរបស់បុគ្គលិកជប៉ុននឹងជំរុញការទិញប្រើប្រាស់ក្នុងស្រុក ដែលជាកម្លាំងចលកររុញច្រានកំណើនសេដ្ឋកិច្ច។
ការរំពឹងទុករបស់រដ្ឋាភិបាលជារឿងមួយ ប៉ុន្តែ នៅជប៉ុន អ្នកធ្វើការទទួលបានប្រាក់ខែជាមធ្យម ៤ម៉ឺនអឺរ៉ូ ក្នុងមួយឆ្នាំ(តួលេខនៅឆ្នាំ ២០២១)។ យុវជនជប៉ុនមួយចំនួនបានចាកចេញទៅរកការងារនៅបរទេសជាទីដែលពួកគេអាចទទួលបានប្រាក់ខែគួរឲ្យទាក់ទាញ ជាងនៅជប៉ុន។ ជាក់ស្តែង ការងារជាវិស្វករព័ត៌មានវិទ្យានៅវៀតណាម ធ្វើឲ្យគេបានទទួលប្រាក់ខែច្រើនជាងនៅជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ