បន្ធូរច្បាប់ដើម្បីនាំចេញយន្តហោះចម្បាំង តើជប៉ុនកំពុងដោះដៃចេញពីគោលការណ៍សន្តិនិយម?
រដ្ឋាភិបាលជប៉ុន នៅថ្ងៃអង្គារនេះ បានបើកភ្លើងខៀវឲ្យលក់នាំចេញយន្តហោះចម្បាំងដែលជប៉ុន កំពុងចាប់ដៃសហការផលិតជាមួយអង់គ្លេស និងអ៊ីតាលី។ នៅក្នុងរយៈពេលតែ៤ខែ រដ្ឋាភិបាលជប៉ុនបានបន្ធូរបន្ថយជាបន្តបន្ទាប់ ច្បាប់ដែលធ្លាប់តែរឹតបន្តឹង ហាមការលក់នាំចេញសព្វាវុធ។ រដ្ឋាភិបាលជប៉ុនអនុញ្ញាតឲ្យនាំចេញសព្វាវុធ និងធ្លាប់ប្រកាសបង្កើនទ្វេដងថវិកាកងទ័ព ពីពេលនេះ ដល់ឆ្នាំ ២០២៧។ ការណ៍នេះធ្វើឲ្យមានការចោទជាសំណួរថា តើជប៉ុនកំពុងងាកដើរចេញពីគោលការណ៍សន្តិនិយមរបស់ខ្លួនឬយ៉ាងណា?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:២៤
រដ្ឋាភិបាលជប៉ុនប្រកាសបន្ធូរបន្ថយច្បាប់នាំចេញគ្រឿងបរិក្ខាយោធា ដើម្បីបើកផ្លូវឲ្យមានការលក់នាំចេញយន្តហោះចម្បាំងទំនើបថ្មី ដែលជប៉ុនកំពុងចាប់ដៃសហការផលិតជាមួយអ៊ីតាលី និងអង់គ្លេស។ នៅចុងឆ្នាំ២០២២ ជប៉ុន អង់គ្លេស និងអ៊ីតាលីបានចុះហត្ថលេខាលើកិច្ចព្រមព្រៀងស្តីពីការរួមគ្នាផលិតយន្តហោះចម្បាំងជំនាន់ចុងក្រោយបំផុត ឈ្មោះ Tempest ដែលប្រើកម្មវិធីបញ្ញាសិប្បនិម្មិត និងSensors ទំនើបសម្រាប់ជួយអ្នកបើកយន្តហោះ។
ប៉ុន្តែ នៅមុនបន្ធូរបន្ថយច្បាប់ស្តីពីការនាំចេញបរិក្ខាយោធា ជប៉ុនធ្លាប់វាយតម្លៃថា ការផលិតយន្តហោះសម្រាប់តែការប្រើប្រាស់ក្នុងស្រុកជប៉ុន ឬលក់ទៅឲ្យ តែអង់គ្លេស ឬអ៊ីតាលី នឹងមិនធ្វើឲ្យគេចំណេញនោះទេ។ រដ្ឋាភិបាលជប៉ុនសង្ឃឹមថា ការបន្ធូរបន្ថយច្បាប់ស្តីពីការលក់សព្វាវុធ ដើម្បីអនុញ្ញាតឲ្យលក់នាំចេញយន្តហោះចម្បាំងទៅប្រទេសដទៃ ក្រៅពីអង់គ្លេស និងអ៊ីតាលី ដែលជាដៃគូរបស់ជប៉ុន នឹងធ្វើឲ្យជប៉ុនទទួលបានចំណូលដើម្បីយកទៅទូទាត់ជាមួយការចំណាយដ៏សន្ធឹកសន្ធាប់ដើម្បីផលិតយន្តហោះដ៏ទំនើបTempest។
សម្រាប់លោកនាយករដ្ឋមន្រ្តីជប៉ុន ហ្វូមីអូ គីស៊ីដា ការអនុញ្ញាតលក់យន្តហោះទៅឲ្យប្រទេសទី៣ សំខាន់ ដើម្បីឲ្យជប៉ុនទទួលបានការជឿទុកចិត្ត ពីសំណាក់ប្រទេសដៃគូ នៅក្នុងគម្រោងការអភិវឌ្ឍសព្វាវុធ ទៅថ្ងៃអនាគត។ ការបន្ធូរបន្ថយច្បាប់ដើម្បីជំរុញការលក់នាំចេញសព្វាវុធ ផលិតនៅជប៉ុន ធ្វើឡើងនៅតែប៉ុន្មានសប្តាហ៍មុនដែលលោកនាយករដ្ឋមន្រ្តីជប៉ុនត្រូវធ្វើទស្សនកិច្ចនៅទីក្រុងវ៉ាស៊ីនតោន ជាទីដែលប្រមុខរដ្ឋាភិបាលជប៉ុនចង់ទៅបញ្ជាក់ប្រាប់សម្ព័ន្ធមិត្តអាមេរិកថា ជប៉ុនត្រៀមខ្លួន ធ្វើជាដៃគូរបស់អាមេរិកនៅក្នុងគម្រោងការអភិវឌ្ឍយោធា។
យោងតាមរដ្ឋាភិបាលជប៉ុន មានតែប្រទេសចំនួន ១៥ ដែលបានចុះកិច្ចព្រមព្រៀងយោធាជាមួយជប៉ុនតែប៉ុណ្ណោះ ដែលមានសិទ្ធិទិញយន្តហោះទំនើបថ្មីផលិតនៅជប៉ុន។ នៅក្នុងចំណោមប្រទេសទាំង១៥ មានអាមេរិក បារាំង ឥណ្ឌា ហ្វីលីពីន អូស្ត្រាលី ឬអេមីរ៉ាតអារ៉ាប់រួមជាដើម។ ម្យ៉ាង បើតាមរដ្ឋាភិបាលជប៉ុន ជប៉ុននឹងមិនលក់យន្តហោះចម្បាំងទៅប្រទេសណាដែលកំពុងជាប់ដៃប្រលូកផ្ទាល់នៅក្នុងសង្រ្គាមដាច់ខាត។ ការប្រើប្រាស់យន្តហោះចម្បាំងរបស់ជប៉ុនទៀតសោត គឺត្រូវគោរព ស្របទៅតាមច្បាប់អង្គការសហប្រជាជាតិ។
នៅក្នុងសន្និសីទកាសែត នៅថ្ងៃអង្គារ អ្នកនាំពាក្យរដ្ឋាភិបាលជប៉ុន លោក Yoshimasa Hayashi បានសង្កត់ធ្ងន់ថា ការសម្រេចបន្ធូរបន្ថយច្បាប់លើកនេះផ្តោតតែទៅលើការលក់នាំចេញយន្តហោះចម្បាំងដែលជប៉ុនរួមគ្នាអភិវឌ្ឍ និងផលិតជាមួយអង់គ្លេស និងអ៊ីតាលីតែប៉ុណ្ណោះ។ វិធានការថ្មីរបស់រដ្ឋាភិបាលអាចកំណត់ត្រឹមការលក់យន្តហោះចម្បាំងមែន ប៉ុន្តែ នេះជាលើកទី២ ក្នុងរយៈពេល៤ខែ ដែលរដ្ឋាភិបាលជប៉ុនបានកែប្រែច្បាប់របស់ខ្លួន។ នៅខែធ្នូចុងឆ្នាំមុន ជប៉ុនទើបបានបន្ធូរបន្ថយច្បាប់ស្តីពីការនាំចេញគ្រឿងបរិក្ខាយោធាម្តងហើយ ដើម្បីបានសិទ្ធិលក់ប្រព័ន្ធខែលមីស៊ីល Patriot ដែលជប៉ុនបានទទួលអាជ្ញាប័ណ្ណពីអាមេរិកដើម្បីផលិត នៅក្នុងទឹកដីរបស់ខ្លួន។ ជប៉ុនត្រូវការលក់ប្រព័ន្ធខែលមីស៊ីលPatriot ដែលអាមេរិកត្រូវការសម្រាប់បញ្ជូនទៅអ៊ុយក្រែន។
រដ្ឋាភិបាលជប៉ុន នៅតែអះអាងថា ខ្លួននៅតែគោរពគោលការណ៍សន្តិនិយម ដែលមានចែងនៅក្នុងរដ្ឋធម្មនុញ្ញជប៉ុន តាមរយៈត្រួតពិនិត្យយ៉ាងល្អិតល្អន់ប្រទេសដែលទទួលទិញអាវុធពីជប៉ុន។ នៅក្រោយចាញ់សង្រ្គាមលោកលើកទី២ ជប៉ុន ត្រូវអនុវត្តតាមរដ្ឋធម្មនុញ្ញដែលអាមេរិកជាអ្នកតាក់តែងហាមមិនឲ្យជប៉ុនត្រលប់ទៅធ្វើសង្រ្គាម ឬលូកដៃ ចូលក្នុងជម្លោះអន្តរជាតិ។ ទៅតាមការចងក្រងរបស់អាមេរិក រដ្ឋធម្មនុញ្ញសន្តិនិយមរបស់ជប៉ុននៅបានហាមជប៉ុនមិនឲ្យលក់នាំចេញអាវុធទៅបរទេស ចំណែកកងទ័ពជប៉ុនមានសិទ្ធិត្រឹមតែស្វ័យការពារតែប៉ុណ្ណោះ។
ប៉ុន្តែ នៅចំពោះមុខការគំរាមកំហែងអាវុធនុយក្លេអ៊ែររបស់កូរ៉េខាងជើង ការប្រឈមមុខជាមួយចិន និងការគំរាមកំហែងរបស់រុស្ស៊ី រដ្ឋាភិបាលជប៉ុនតាំងពីសម័យដឹកនាំរបស់លោកស្ហ៊ីនហ្សូ អាបេ នៅឆ្នាំ ២០១៤ បានលុបចោលជាលើកទី១ បំរាមការលក់អាវុធទៅបរទេស។ នៅចុងឆ្នាំ ២០២២ ជប៉ុនបានបង្កើតទ្រឹស្តីថ្មីស្តីពីសន្តិសុខជាតិ ដែលនៅក្នុងនោះ ជប៉ុនត្រូវបង្កើនថវិកាកងទ័ពឲ្យបានទ្វេដង ដើម្បីពង្រឹងសមត្ថភាពកងទ័ពជប៉ុន និងដើម្បី សម្របខ្លួនទៅតាមស្ថានការណ៍ប្រែប្រួលនៅក្នុងតំបន់ និងពិភពលោកទាំងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ