ជប៉ុនលង់ក្នុងរឿងអាស្រូវអាហារបំប៉ន ក្រោយមានករណីស្លាប់ពីរនាក់បន្ថែមទៀត
អាហារបំប៉នរបស់សហគ្រាសឱសថកូបាយ៉ាស្ហ៊ី កំពុងក្លាយជារឿងអាស្រូវកាន់តែធំៗឡើង។ ជាសរុបចំនួនមនុស្សស្លាប់ដែលទំនងបណ្តាលមកពីអាហារបំប៉ន បានឡើងដល់បួននាក់ហើយ និងមានយ៉ាងហោច៧៥នាក់ផ្សេងទៀតកំពុងសម្រាកព្យាបាលនៅក្នុងមន្ទីរពេទ្យ។ នេះបើតាមសេចក្តីប្រកាសរបស់ កូបាយ៉ាស្ហ៊ី សហគ្រាសឱសថរបស់ជប៉ុន ដែលជាម្ចាស់អាជីវកម្មអាហារបំប៉ន នៅថ្ងៃព្រហស្បតិ៍ទី២៨មីនា២០២៤។ ក្រុមហ៊ុននិងរដ្ឋាភិបាលជប៉ុនបានប្រកាសបើកអង្កេតភ្លាម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៥
រឿងអាស្រូវអាហារបំប៉នបានចាប់ផ្ទុះឡើងកាលពីថ្ងៃសុក្រសប្តាហ៍មុន បន្ទាប់ពីសហគ្រាសឱសថកូបាយ៉ាស្ហ៊ី (Kobayashi) បានប្រកាសប្រមូលផលិតផលអាហារបំប៉នបីមុខធ្វើពីមេអង្ករក្រហមពីទីផ្សារ។ បីថ្ងៃក្រោយ សហគ្រាសបានប្រកាសករណីស្លាប់ដំបូង រួចករណីស្លាប់ទីពីរនៅថ្ងៃពុធម្សិលមិញ និង២នាក់ថ្មីទៀតនៅថ្ងៃព្រហស្បតិ៍នេះ។ ជាសរុប មានមនុស្ស៤នាក់ បានស្លាប់ ព្រមទាំងយ៉ាងហោច៧៥នាក់ បើតាមអាជ្ញាធរ (ឬជាងមួយរយនាក់បើតាមសារព័ត៌មាន) កំពុងទទួលការព្យាបាល។
ជនរងគ្រោះទីមួយ ទំនងជាបានប្រើប្រាស់ថ្នាំបំប៉ននេះរយៈពេលបីឆ្នាំជាប់គ្មានដាច់។ ចំណែកអ្នកស្លាប់នៅថ្ងៃនេះទាំងពីរ ក៏ប្រើផលិតផលបំប៉នសម្រាប់បញ្ចុះជាតិខ្លាញ់កូឡេស្តេរ៉ូលមួយប្រភេទរបស់ក្រុមហ៊ុនដែរ។ សហគ្រាសឱសថ កូបាយ៉ាស្ហ៊ី ដែលជាម្ចាស់ផលិតផលអាហារបំប៉ន និងក្រសួងសុខាភិបាលជប៉ុន សម្រេចបើកអង្កេតភ្លាម ដើម្បីស្វែងរកចំណងហេតុនិងផលដែលនាំដល់មរណភាព និងធ្លាក់ខ្លួនឈឺ។ តែរដ្ឋមន្ត្រីក្រសួងសុខាភិបាលជប៉ុន បានសម្តែងការសោកស្តាយ ដែលក្រុមហ៊ុនកូបាយ៉ាស្ហ៊ី មិនអាចផ្តល់ព័ត៌មាន មកឱ្យរដ្ឋាភិបាលបាន។
អាចរកទិញបានដោយគ្មានវេជ្ជបញ្ជា អាហារបំប៉នជាប់រឿងអាស្រូវនេះ មានផ្ទុកមេអង្ករធ្វើពីស្រូវក្រហមផ្អាប់ ឬហៅថា បេនី កូជី ដែលត្រូវបានគេចាត់ទុកជាថ្នាំធម្មជាតិសម្រាប់សម្រកជាតិខ្លាញ់ក្នុងឈាម។ ប៉ុន្តែក្រុមគ្រូពេទ្យបានទាញសញ្ញាអាសន្នតាំងពីជាយូរឆ្នាំ(២០១៩)មកហើយអំពីសក្តានុពលនៃគ្រោះថ្នាក់របស់ធាតុផ្សំមួយនេះ។ ការសិក្សាជាច្រើនបានបង្ហាញឱ្យឃើញថា អាស្រ័យទៅការលាយផ្សំជាមួយសារធាតុគីមីផ្សេងៗទៀត អាហារបំប៉នមានបេនីកូជី អាចនឹងធ្វើឱ្យខូចសរីរាង្គ ដូចជាថ្លើមឬតម្រងនោម។
តាំងពីចូលឆ្នាំ២០២៤នេះ សហគ្រាសផលិតបេនីកូជី ប្រមាណ១៨តោនកន្លះ ហើយលក់បោះដុំទៅឱ្យក្រុមហ៊ុនផ្សេងទៀតចំនួន ១៦តោន។ កូបាយ៉ាស្ហ៊ីជាអ្នកផ្គត់ផ្គង់បេនីកូជីទៅឱ្យ៥២ក្រុមហ៊ុននៅជប៉ុន និងពីរនៅតៃវ៉ាន់។ ក្រុមហ៊ុននៅជប៉ុនភាគច្រើនបានសម្រេចប្រមូលគ្រប់ផលិតផលមានជាតិមេអង្ករក្រហមចេញពីទីផ្សារដែរ។ ផលិតផលទាំងនោះមានដូចជា ស្រាសាកេមានហ្កាស គ្រឿងសម្រាប់ធ្វើទឹកជ្រលក់ស្រូបសាលាដ ឬម្សៅសណ្តែកផ្អាប់មីសូ។
នៅអឺរ៉ុប គណៈកម្មការបានចេញច្បាប់នៅឆ្នាំ២០២២ កំរិតការប្រើប្រាស់សារធាតុគីមីដែលធ្វើសំយោគកូឡេស្តេរ៉ូល ក្នុងអាហារបំប៉នធ្វើពីមេអង្ករក្រហម ដោយហេតុតែសំលឹងឃើញមានឥទ្ធិពលអាក្រក់លើសុខភាពអ្នកលេប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ