Microsoft វិនិយោគនៅឥណ្ឌូណេស៊ី ១៧០០លានដុល្លារក្នុងវិស័យបញ្ញាសិប្បនិម្មិត AI
ក្រុមហ៊ុនMicrosoft នឹងវិនិយោគទឹកប្រាក់ចំនួន ១៧០០លានដុល្លារ នៅឥណ្ឌូណេស៊ី ក្នុងវិស័យបច្ចេកវិទ្យាបញ្ញាសិប្បនិម្មិត ដែលកំពុងតែរីកចម្រើនខ្លាំង។ នេះបើផ្អែកតាមការប្រកាស របស់លោក Satya Nadella អគ្គនាយកMicrosoft ដែលបានទៅជួបលោកប្រធានាធិបតីឥណ្ឌូណេស៊ី ចូកូ វីដូដូ នៅថ្ងៃអង្គារទី៣០មេសានេះ។ សូមបញ្ជាក់ថា ជាមួយនឹងប្រជាជនប្រមាណ២៨០លាននាក់ ឥណ្ឌូណេស៊ីគឺជាទីផ្សារដ៏មានសក្តានុពលបំផុតនៅតំបន់អាស៊ីអាគ្នេយ៍ ក្នុងវិស័យសេដ្ឋកិច្ចបច្ចេកវិទ្យាទំនើប។
ចុះផ្សាយនៅថ្ងៃ៖
ស្តាប់ - ០៣:១២
នៅវិមានប្រធានាធិបតីទីក្រុងចាការតា លោក Satya Nadella អគ្គនាយកMicrosoft បានចូលទៅជួបសំណេះសំណាល ជាមួយលោក ចូកូ វីដូដូ នៅថ្ងៃអង្គារទី៣០មេសា។ ចប់ជំនួបនេះ លោកប្រធានាធិបតីឥណ្ឌូណេស៊ី បានថ្លែងសុន្ទរកថាស្តីអំពីសក្តានុពលនៃវិស័យបច្ចេកវិទ្យាបញ្ញាសិប្បនិម្មិត ហើយដែលឥណ្ឌូណេស៊ី កំពុងតែទទួលបាននូវចំណាប់អារម្មណ៍ជាខ្លាំង ពីសំណាក់បណ្តាក្រុមហ៊ុនបច្ចេកវិទ្យាធំៗ។ លោកចូកូ វីដូដូ បានប្រកាសថា ក្រុមហ៊ុនMicrosoft បានសម្រេចថានឹងមកវិនិយោគនៅឥណ្ឌូណេស៊ី ក្នុងវិស័យបញ្ញាសិប្បនិម្មិតជាមួយនឹងទឹកប្រាក់ចំនួន ១៧០០លានដុល្លារ។
លោក Satya Nadella អគ្គនាយកMicrosoft បានបញ្ជាក់បន្ថែមថា ការវិនិយោគនេះ គឺផ្តោតទៅលើការសាងសង់ទីតាំងមជ្ឈមណ្ឌលទិន្នន័យ ជាច្រើនកន្លែង ដើម្បីអនុញ្ញាតឲ្យឥណ្ឌូណេស៊ី អាចទទួលបានហេដ្ឋារចនាសម្ព័ន្ធបច្ចេកវិទ្យាដ៏ទំនើបចុងក្រោយបង្អស់។ ហើយបន្ថែមពីនេះ ក្រុមហ៊ុន Microsoft នឹងធ្វើការបណ្តុះបណ្តាលជំនាញបច្ចេកវិទ្យាបញ្ញាសិប្បនិម្មិត ដល់មនុស្សចំនួនប្រមាណ២លាន៥សែននាក់ទូទាំងអាស៊ីអាគ្នេយ៍ ដែលក្នុងនោះគ្រាន់តែនៅឥណ្ឌូណេស៊ី គឺមានប្រមាណ៨៤ម៉ឺននាក់ ពីពេលនេះដល់ឆ្នាំ២០២៥។
ក្រុមហ៊ុន Microsoft បានចេញលិខិតប្រកាសមួយ ដោយបានបញ្ជាក់ថា នេះគឺជាការបោះទុនវិនិយោគធំបំផុតមិនធ្លាប់មាន ដែលMicrosoftបានធ្វើនៅឥណ្ឌូណេស៊ី។ ជាការវិនិយោគដែល Microsoft នឹងឆ្លើយតបទៅនឹងការរីកចម្រើនខ្លាំងបំផុត នៃវិស័យសេវាកម្មCloud នៅឥណ្ឌូណេស៊ី។ លិខិតនេះបានលើកឡើងថា យោងតាមការសិក្សាវិភាគទីផ្សារ ធ្វើឡើងដោយការិយាល័យប្រឹក្សាអន្តរជាតិ Kearney គឺវិស័យបច្ចេកវិទ្យាបញ្ញាសិប្បនិម្មិត នឹងចូលរួមបង្កើនចំណូលដុល PIB នៅទូទាំងអាស៊ីអាគ្នេយ៍ សរុបចំនួន១០០០ពាន់លានដុល្លារ ពីនេះដល់ឆ្នាំ២០៣០។ ហើយគ្រាន់តែទីផ្សារឥណ្ឌូណេស៊ី គឺអាចបានទទួលដល់ទៅ១ភាគ៣នៃចំណែកនេះ។ ចេញពីឥណ្ឌូណេស៊ី លោក Satya Nadella អគ្គនាយកMicrosoft នឹងបន្តដំណើរទៅថៃ និងម៉ាឡេស៊ី ក្នុងសប្តាហ៍នេះ ដើម្បីផ្សព្វផ្សាយអំពីបច្ចេកវិទ្យាបញ្ញាសិប្បនិម្មិត។
គួរកត់សំគាល់ថា ក្រុមហ៊ុនMicrosoft កំពុងតែឡើងសន្ទុះនាំមុខខ្លាំង ក្នុងវិស័យបច្ចេកវិទ្យាបញ្ញាសិប្បនិម្មិត បន្ទាប់ពីបានចុះកិច្ចព្រមព្រៀងសហការជាមួយOpen AI ក្នុងតម្លៃទឹកប្រាក់១៣០០០លានដុល្លារ កាលពីឆ្នាំ២០២៣។ ការលក់សេវាកម្មនិងផលិតផលរបស់ Microsoft បានកើនឡើងចំនួន១៧% រវាងពីខែមករាដល់ខែមីនា ជាមួយនឹងប្រាក់ចំណូលសរុប ៦១,៩ពាន់លានដុល្លារ។
គួរបញ្ជាក់ដែរថា មិនមែនមានតែ Microsoft ទេ ដែលចាប់អារម្មណ៍ទីផ្សារឥណ្ឌូណេស៊ី។ កាលពីថ្ងៃទី១៧មេសា លោក Tim Cook អគ្គនាយកក្រុមហ៊ុន Apple ក៏បានទៅជួបថ្នាក់ដឹកនាំឥណ្ឌូណេស៊ីដែរ ដើម្បីសិក្សាពីគម្រោងវិនិយោគ ស្របពេលដែល Apple កំពុងរកផ្លូវបណ្តាញផ្គត់ផ្គង់ផ្សេងក្រៅពីចិន។ ផ្អែកតាមលោក Tim Cook គឺApple ចាប់អារម្មណ៍លើវិស័យ កម្មន្តសាលរបស់ឥណ្ឌូណេស៊ី ដើម្បីផលិតនិងបង្គំផលិតផលរបស់Apple៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ