កូរ៉េខាងត្បូងកំពុងចរចាយ៉ាងសកម្មដើម្បីចូលរួមក្នុងគម្រោងការយោធាអាមេរិក អង់គ្លេសនិងអូស្ត្រាលី AUKUS
កូរ៉េខាងត្បូងបោះដៃ ចង់ចូលក្នុងបក្សសម្ព័ន្ធAUKUSដើម្បីអាចផលិតមីស៊ីលអ៊ីពែសូនិក។ នៅក្រោយកិច្ចប្រជុំថ្នាក់រដ្ឋមន្រ្តីការបរទេស និងការពារជាតិរបស់អូស្ត្រាលី កូរ៉េខាងត្បូង កាលពីថ្ងៃពុធទី១ឧសភា នៅទីក្រុងមែលប៊ន រដ្ឋមន្រ្តីការពារជាតិកូរ៉េខាងត្បូង លោកShin Won-Sik និយាយប្រាប់អ្នកកាសែតថា ប្រទេសរបស់លោកកំពុងពិភាក្សាយ៉ាងសកម្មដើម្បីចូលរួមនៅក្នុងគម្រោងបច្ចេកវិទ្យាយោធា របស់បក្សសម្ព័ន្ធAUKUS ដែលអាមេរិកអូស្ត្រាលី និងអង់គ្លេសបានបង្កើតឡើងកាលពីឆ្នាំ២០២១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២០
សម្ព័ន្ធភាពAUKUS ដែលអូស្ត្រាលី អង់គ្លេស និងអាមេរិក រួមគ្នាបង្កើតឡើងនៅឆ្នាំ ២០២១ អាចនឹងឃើញចំនួនសមាជិកកើនឡើងបន្ថែមទៀត។ បន្ទាប់ពីយកពេលពិចារណា ដូច ជប៉ុន និងនូវែលសេឡង់ កូរ៉េខាងត្បូងតាមរយៈរដ្ឋមន្រ្តីការពារជាតិបាននិយាយថា ខ្លួនកំពុងពិភាក្សាដើម្បីចូលរួមនៅក្នុងសម្ព័ន្ធភាពAUKUS។
AUKUS បានលេចចេញរូបរាងនៅឆ្នាំ ២០២១ ឆ្នាំដែលអូស្ត្រាលីលុបចោលកិច្ចសន្យាឈប់ទិញនាវាមុជទឹកបារាំង និងងាកទៅចងសម្ព័ន្ធភាពជាមួយអាមេរិក អង់គ្លេស ដើម្បីផលិតរួមគ្នានាវាមុជទឹកដើរដោយថាមពលនុយក្លេអ៊ែរ។ គម្រោងការរបស់សម្ព័ន្ធភាពAUKUS មានបែងចែកជាបីដំណាក់កាល។ ដំណាក់កាលទី១ គឺបញ្ជូននាវាមុជទឹករបស់អាមេរិក និងអង់គ្លេសទៅប្រតិបត្តិការទ័ពនៅមូលដ្ឋានជើងទឹកអូស្ត្រាលី។ នៅដំណាក់កាលទី២ អូស្ត្រាលីទិញនាវាមុជទឹកអាមេរិកប្រភេទVirginia ចំនួន៣ គ្រឿង ដែលដើរដោយថាមពលនុយក្លេអ៊ែរ យ៉ាងយូរបំផុតនៅឆ្នាំ២០៣០។ ចំណែកនៅដំណាក់កាលទី៣ ដែលជាដំណាក់កាលដ៏សំខាន់បំផុត ប្រទេសទាំងបីនៅក្នុងសម្ព័ន្ធAUKUS រួមគ្នាផលិតនាវាមុជទឹកចម្បាំង ប្រភេទថ្មីដើរដោយថាមពលនុយក្លេអ៊ែរ។
ឆ្លើយសំណួររបស់អ្នកកាសែត នៅក្រោយកិច្ចប្រជុំជាមួយសមភាគីអូស្ត្រាលី រដ្ឋមន្រ្តីការពារជាតិកូរ៉េខាងត្បូងបញ្ជាក់ថា នៅក្នុងសម្ព័ន្ធAUKUS កូរ៉េខាងត្បូងនឹងមិនចូលរួមនៅក្នុងគម្រោងការផលិតនាវាមុជទឹក ប៉ុន្តែ ចាប់អារម្មណ៍គម្រោងការទី២របស់AUKUS ដែលផ្តោតទៅលើការអភិវឌ្ឍសព្វាវុធធ្វើសង្រ្គាមទំនើបៗ ដូចជា កម្មវិធីបញ្ញាសិប្បនិម្មិត មីស៊ីលអ៊ីពែសូនិក ដ្រូនក្រោមទឹក និងបច្ចេកវិទ្យាឈានមុខផ្សេងទៀត។
បើតាមយោបល់របស់រដ្ឋមន្រ្តីការពារជាតិអូស្ត្រាលី លោកRichard Marles កូរ៉េខាងត្បូងជាប្រទេសដែលមានបច្ចេកវិទ្យាយោធាទំនើបខ្លាំង។ មានព្រំដែនជាមួយកូរ៉េខាងជើងដែលទើបប្រកាសខ្លួនជាមហាអំណាចនុយក្លេអ៊ែរ កូរ៉េខាងត្បូងសំបូរទៅដោយអាវុធទំនើបៗ ជាមួយបច្ចេកវិទ្យាឈានមុខបើធៀបនឹងប្រទេសក្នុងតំបន់។ ឆ្លើយតបទៅរដ្ឋមន្រ្តីអូស្ត្រាលី រដ្ឋមន្រ្តីការពារជាតិកូរ៉េខាងជើងនិយាយថា កូរ៉េខាងត្បូងពេញចិត្តដែលសមាជិករបស់សម្ព័ន្ធAUKUS ដូចជាអូស្ត្រាលី ពិចារណាចង់ឲ្យកូរ៉េខាងត្បូងក្លាយជាដៃគូ។ ម្យ៉ាង លោកសង្ឃឹមថា កងទ័ព វិទ្យាសាស្រ្ត និងសមត្ថភាពបច្ចេកវិទ្យារបស់កូរ៉េខាងត្បូង នឹងចូលរួមចំណែកក្នុងការធានាសន្តិសុខ សន្តិភាព និងការអភិវឌ្ឍគម្រោងការទី២របស់សម្ព័ន្ធAUKUS។
សម្ព័ន្ធAUKUSបានទាក់ទាញឲ្យចិន និងអាមេរិកចោទប្រកាន់គ្នាទៅវិញទៅមកថា ជាដើមហេតុធ្វើឲ្យបាត់បង់តុល្យភាពសន្តិសុខនៅក្នុងតំបន់ឥណ្ឌូប៉ាស៊ីហ្វិក។ ដោយចេះតែឃើញចិន ពង្រីកដែនឥទ្ធិពលនៅប៉ាស៊ីហ្វិក អាមេរិកព្យាយាមចាប់ប្រមូលផ្តុំប្រទេសសម្ព័ន្ធមិត្តរបស់ខ្លួនឲ្យរួមកម្លាំង ក្នុងរូបភាពពង្រឹងសហប្រតិបត្តិការ ចងសម្ព័ន្ធភាពយោធា ដូចជា សម្ព័ន្ធAUKUS ជាដើម។ ចិនវិញបានចេញប្រឆាំងខ្លាំង និងចោទប្រកាន់សម្ព័ន្ធAUKUS អូស្ត្រាលី អង់គ្លេស និងអាមេរិកថា មានចេតនាញុះញង់ឲ្យមានការបែកបាក់នៅអាស៊ី និងជំរុញឲ្យមានការរីកសាយភាយអាវុធនុយក្លេអ៊ែរនៅអាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ