អ្នកនាំពាក្យរាជរដ្ឋាភិបាល៖កម្ពុជាមិនដែលមានមហិច្ឆតាចង់បានទឹកដីប្រទេសផ្សេង
រដ្ឋាភិបាលកម្ពុជាបានបញ្ជាក់ពីជំហរម៉ឺងម៉ាត់របស់ខ្លួនថា កម្ពុជាគ្មានមហិច្ឆតាចង់បានទឹកដីពីប្រទេសជិតខាងណាមួយឡើយ ហើយក៏មិនឱ្យទឹកដីកម្ពុជាបាត់បង់ទៅកាន់ប្រទេសណាមួយដែរ។ ជំហររបស់កម្ពុជានាពេលនេះ ធ្វើឡើងបន្ទាប់ពីពលលរដ្ឋថៃ រួមនឹងសារព័ត៌មានក្នុងស្រុកថៃមួយចំនួនបានចុះផ្សាយថា កម្ពុជាត្រូវតែប្រគល់អតីតខេត្តរបស់ថៃ គឺខេត្តកោះកុងទៅឱ្យប្រទេសថៃវិញ និងជំរុញឱ្យរដ្ឋាភិបាលថៃរក្សាកោះខុត នៅជិតខេត្តកោះកុងឱ្យបានល្អជៀសវាងកោះមួយនេះធ្លាក់ទៅក្រោមការគ្រប់គ្រងរបស់កម្ពុជា។
ចុះផ្សាយនៅថ្ងៃ៖
ស្តាប់ - ០២:៥៧
លោក ប៉ែន បូណា អ្នកនាំពាក្យរដ្ឋាភិបាលកម្ពុជាបានថ្លែងមកវិទ្យុបារាំងអន្តរជាតិRFIនៅរសៀលថ្ងៃទី០២ មីនានេះថា ការដោះស្រាយបញ្ហាព្រំដែនជាមួយប្រទេសជិតខាងត្រូវឈរលើការចរចាដោយសន្តិវិធីមិនមែនប្រើគំនិតជាតិនិយមចង្អៀតចង្អល់ឬប្រើកម្លាំងអ្វីឡើយ។
តាមលោក ប៉ែន បូណា អ្វីដែលកើតឡើងនាពេលនេះជាបញ្ហាផ្ទៃក្នុងរបស់ប្រទេសថៃប៉ុណ្ណោះ។ លោកយល់ថាបញ្ហាព្រំដែននេះ គឺជាប្រធានបទដែលក្រុមអ្នកជាតិនិយមមិនថាកម្ពុជា ឬថៃ តែងយកមករិះគន់វាយប្រហាររដ្ឋាភិបាលរបស់ខ្លួន។ សម្រាប់អ្នកនាំពាក្យរូបនេះ រដ្ឋាភិបាលកម្ពុជាគ្រប់អាណត្តិបានខិតខំកសាងព្រំដែនជាមួយប្រទេសជិតខាងទាំងអស់ឱ្យក្លាយជាព្រំដែនសន្តិភាព មិត្តភាព សហប្រតិបត្តិការ និងអភិវឌ្ឍន៍។
ការចេញមកបញ្ជាក់របស់អ្នកនាំពាក្យរដ្ឋាភិបាលកម្ពុជានាពេលនេះ ធ្វើឡើងក្រោយពលរដ្ឋថៃ និងសារព័ត៌មានរបស់ថៃមួយចំនួនស្នើឱ្យរដ្ឋាភិបាលថៃទាមទារយកខេត្តកោះកុងមកជារបស់ថៃវិញ ពិសេសរក្សាកោះខុតដែលស្ថិតក្នុងខេត្តត្រាដឱ្យគង់វង្ស ជៀសវាងពីការឈ្លានពានរបស់កម្ពុជា។
សារព័ត៌មានថៃ បានអះអាងថា ខេត្តកោះកុង គឺជាអតីតខេត្តប្រាចាន់តះគិរីខេត្ត និងជាបងប្អូនរបស់ខេត្តប្រាជុបគិរីខាន់ ដែលធ្លាក់ក្រោមការគ្រប់គ្រងរបស់កម្ពុជាក្នុងអំឡុងឆ្នាំ១៨៥៥ ក្នុងគ្រាដែលបារាំងចូលមកកាន់កាប់ក្នុងតំបន់ឥណ្ឌូចិន។
បន្ថែមពីនេះ ពលរដ្ឋថៃស្នើឱ្យរដ្ឋាភិបាលខ្លួន កុំបន្ទន់ឥរិយាបថជាមួយកម្ពុជាក្នុងការទាមទារយកតំបន់ប្រេងត្រួតស៊ីគ្នាក្នុងឈួងសមុទ្រថៃ ដោយពួកគេលើកឡើងថា ការទាមទាររបស់កម្ពុជាក្នុងតំបន់ប្រេងត្រួតស៊ីគ្នាបានរំលោភយកផ្នែកខ្លះនៃដែនកោះខុតរបស់ថៃ។
កាលពីថ្ងៃទី២៩ កុម្ភៈ ឆ្នាំ២០២៤ ក្រុមជាតិនិយមថៃក៏បានប្រមូលផ្តុំគ្នាដាក់ញត្តិជំរុញឱ្យកងទ័ពជើងទឹកថៃប្រកាន់ជំហរ ការពារដែនអធិបតេយ្យភាពក្នុងកិច្ចចរចារបញ្ហាតំបន់ប្រេងត្រួតស៊ីគ្នាជាមួយកម្ពុជា និងត្រូវធានាថាដែនទឹកថៃមិនធ្លាក់ក្នុងដៃកម្ពុជាសូម្បីមួយចង្អាម។
សូមជម្រាបថា តំបន់ប្រេងត្រួតស៊ីគ្នានេះមានទំហំ២៦០០០គីឡូម៉ែត្រការ៉េ ដែលភាគីកម្ពុជា និងថៃរំពឹងថា ក្រោយការដោះស្រាយបញ្ចប់ តំបន់ប្រេងខាងលើនេះនឹងផ្តល់ប្រយោជន៍ផ្នែកសេដ្ឋកិច្ចមហាសាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ