លោកដូណាល់ត្រាំ គំរាមប្រើកម្លាំងយោធា បើបាតុកម្មហិង្សានៅតែបន្ត
នៅពេលថ្លែងជាសាធារណៈ ដោយផ្ទាល់ពីសេតវិមាន លោក ដូណាល់ ត្រាំ បានប្រកាសស្តារសណ្តាប់ធ្នាប់សង្គមឡើងវិញ និងបានគំរាមប្រើកម្លាំងទ័ព ដាក់ពង្រាយតាមផ្លូវថ្នល់ គ្រប់រដ្ឋ ប្រសិនបើបាតុកម្មហិង្សានៅតែបន្ត។ លោកប្រធានាធិបតីបានជ្រើសរើស ដំឡើងសំឡេងមួយកំរិតទៀត ក្នុងពេលដែល លទ្ធផលកោសល្យវិច័យជាផ្លូវការ បានបង្ហាញ បុរសស្បែកខ្មៅ ចច ហ្វឡយ ពិតជាបានស្លាប់ដោយការថប់ដង្ហើមនៅពេលប៉ូលិសយកជង្គង់សង្កត់កឱ្យដកខ្យល់លែងរួច។
ចុះផ្សាយនៅថ្ងៃ៖
ស្តាប់ - ០២:០៦
លោកប្រធានាធិបតីអាមេរិក បានបញ្ជា នៅថ្ងៃចន្ទទី ១មិថុនា ឱ្យបញ្ចប់ភ្លាម បាតុកម្មប្រឆាំងនឹងការរើសអើងពណ៌សម្បុរដ៏ហិង្សា ដែលកំពុងបន្តពុះកញ្ជ្រោលនៅតាមទីក្រុងធំៗ សំខាន់ៗ និងនៅរដ្ឋធានីរបស់សហរដ្ឋអាមេរិក តាំងពី ចន ហ្វឡយ បុរសស្បែកខ្មៅ អាយុ៤៦ឆ្នាំ ស្លាប់ ដោយស្នាដៃប៉ូលិសអាមេរិកស្បែកសមក។
នៅក្នុងសុន្ទរកថា ពីសេតវិមាន ដែលផ្សាយបន្តផ្ទាល់តាមកញ្ចក់ទូរទស្សន៍ លោក ដូណាល់ ត្រាំ បានចាត់ទុកអំពើហិង្សារាលដាលជាសកម្មភាពអនាធិបតេយ្យ អសណ្តាប់ធ្នាប់ស៊ីវិល នៅថ្ងៃទី ៣១ឧសភា ថាជាទង្វើដ៏គួរឱ្យអៀនខ្មាស និងជាទង្វើបែបភេរវនិយមផ្ទៃក្នុង។ ស្ថានភាពបែបនេះ បើយោងតាមច្បាប់បះបោរ អាមេរិកអាចប្រមូលនិងបញ្ចេញកងកម្លាំងទ័ព ដើម្បីបញ្ចប់សកម្មភាពកុប្បកម្ម សកម្មភាពបំផ្លិចបំផ្លាញ លួច ដុត សម្បត្តិរដ្ឋ-ឯកជន។ ដើម្បីការពារអាមេរិក ប៉ូលិស និងយោធាប្រដាប់អាវុធនឹងត្រូវដាក់ពង្រាយយ៉ាងច្រើនសន្ធឹកសន្ធាប់ ដល់ទៅរាប់ពាន់នាក់ នៅតាមផ្លូវ ក្នុងរដ្ឋធានី វ៉ាស៊ីនតោន។ នេះជាការគូសបញ្ជាក់បន្ថែមរបស់លោកប្រធានាធិបតី។
សូមបញ្ជាក់ថា លើកចុងក្រោយដែលសហរដ្ឋអាមេរិកធ្លាប់បានប្រើច្បាប់នេះ គឺនៅឆ្នាំ១៩៩២ តាមសំណើរបស់អភិបាលរដ្ឋកាលីហ្វ័រញ៉ា ក្រោយការស្លាប់របស់ពលរដ្ឋអាមេរិកស្បែកខ្មៅឈ្មោះ Roney King។
ជាងនេះទៀត លោកដូណាល់ ត្រាំ បានអំពាវនាវឱ្យអភិបាលក្រុង និងអភិបាលរដ្ឋអាមេរិកទាំងអស់ ពង្រាយកម្លាំងការពារ ក្រុង និងរដ្ឋរបស់ខ្លួន។ ប្រសិនបើក្រុងណារដ្ឋណាមិនចាត់វិធានការ បណ្តោយឱ្យមានការខូចខាតទ្រព្យសម្បត្តិ និងជីវិតពលរដ្ឋ នោះលោកនឹងបញ្ជូនយោធាឱ្យជួយដោះស្រាយ។ រហូតមកទល់នឹងពេលនេះ ពុំទាន់មានអភិបាលក្រុងឬរដ្ឋណា ទាមទារសុំអន្តរាគមន៍យោធាទេ។ អភិបាលភាគច្រើនយល់ថា ការពង្រាយទ័ព អាចនឹងធ្វើស្ថានភាពកាន់តែយ៉ាប់យឺន។
ចប់សុន្ទរកថា លោកប្រធានាធិបតីបានធ្វើដំណើរដោយថ្មើរជើង ទៅវិហារកាតូលិក Saint-John ដែលនៅក្បែរសេតវិមាន និងដែលទើបរងការដុតនិងបំផ្លិចបំផ្លាញពីសំណាក់បាតុករ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ