ប៉ូលិសអាមេរិកបំបែកជំរំនិងចាប់ខ្លួននិស្សិតបាតុករគាំទ្រប៉ាឡេស្ទីននៅសកលវិទ្យាល័យColumbia
នៅសហរដ្ឋអាមេរិក នគរបាលក្រុងញូវយ៉ក បានចាប់ខ្លួនពួកយុវជននិស្សិតបាតុករជាច្រើននាក់ ដែលបោះជំរំនិងធ្វើបាតុកម្មសម្តែងមតិគាំទ្រពលរដ្ឋប៉ាឡេស្ទីន នៅសកលវិទ្យាល័យ Columbia។ ក្រៅពីចាប់ខ្លួនហ្វូងនិស្សិតបាតុករ, ប៉ូលិសអាមេរិកក៏បានបោសសម្អាតជំរំប្រមូលផ្តុំក្នុងបរិវេណកន្លែងសិក្សា ហើយដាក់ពង្រាយកងកម្លាំងសមត្ថកិច្ចប្រចាំការ ដើម្បីយាមឃ្លាំមើល កុំឲ្យមានសកម្មភាពបោះជំរំជាថ្មី។ អន្តរាគមន៍របស់នគរបាលក្រុងញូវយ៉កនេះ ត្រូវរងការរិះគន់យ៉ាងខ្លាំងពីសំណាក់ក្រុមការពារសិទ្ធិមនុស្ស ថាប៉ូលិសអាមេរិក«ប្រព្រឹត្តឃោរឃៅហួសហេតុ» ក្នុងសង្គម«បិតាប្រជាធិបតេយ្យ»។
ចុះផ្សាយនៅថ្ងៃ៖
ស្តាប់ - ០៣:០១
ជាច្រើនថ្ងៃមកហើយ ដែលបណ្តាយុវជននិស្សិតអាមេរិក បានធ្វើបាតុកម្មសម្តែងមតិនៅបណ្តាសកលវិទ្យាល័យអាមេរិក និងនៅរដ្ឋជាច្រើន ផ្សេងៗគ្នា។ បរិវេណសកលវិទ្យាល័យខ្លះក៏មានបោះជំរំដេកចាំតែម្តង តួយ៉ាងនៅសកលវិទ្យាល័យ Columbia។ ពួកបាតុករច្រើននាក់, គេសម្គាល់ឃើញមានពាក់កំណត់ទទូលក្បាល ឬរុំជុំវិញក ជាកំណត់ប្រពៃណីរបស់ពួកអារ៉ាប់។ ពួកគេស្រែកថា «សេរីភាពប៉ាឡេស្ទីន»។ ដោយអត់ទ្រាំពុំបាន, លោកស្រី Minouche Shafik សាកលវិទ្យាធិការ នៃសកលវិទ្យាល័យ Columbia បានសរសេរលិខិតស្នើសុំអន្តរាគមន៍ពីនគរបាលក្រុងញូវយ៉ក ដោយសម្អាងថា ព្រោះតែសកម្មភាពរបស់បាតុករជាច្រើនថ្ងៃនេះ ធ្វើឲ្យសកលវិទ្យាល័យ គ្មានជម្រើសអ្វីផ្សេងទេ។
យប់ថ្ងៃអង្គារ ទី៣០មេសា ឈានចូលថ្ងៃពុធ ទី១ឧសភា ប៉ូលិសអាមេរិកប្រឆាំងកុបកម្ម ច្រើនរាប់រយនាក់ បានធ្វើអន្តរាគមន៍ បង្ក្រាប ចាប់ខ្លួននិស្សិតបាតុករ និងបោសសម្អាត ជំរំ សកលវិទ្យាល័យ Columbia។ អន្តរាគមន៍ខ្នាតធំដូច្នេះ ជាគាស់រម្លើងតែម្តង។ នៅម៉ោងប្រហែល៣ទៀបភ្លឺនៅអាមេរិក អ្នកនាំពាក្យនគរបាលក្រុងញូវយ៉ក បញ្ជាក់ថា «បោះសម្អាតស្អាតអស់ហើយ គ្មានមនុស្សស្នាក់នៅក្នុងបរិវេណសកលវិទ្យាល័យ Columbia ទៀតទេ»។ បណ្តាញអ្នកកាសែតក្នុងស្រុកអាមេរិក ក៏រាយការណ៍ដែរថា សម្ភារៈបោះជំរំរបស់និស្សិតបាតុករ ត្រូវប៉ូលិសបោសសម្អាត និងបោះចោលក្នុងគំនរសំរាមអស់ហើយ។
លិខិតសុំអន្តរាគមន៍របស់សាកលវិទ្យាធិការ Columbia ក៏បានស្នើឲ្យដាក់ពង្រាយកងកម្លាំងសមត្ថកិច្ចប្រចាំការ ដើម្បីយាមឃ្លាំមើល កុំឲ្យមានសកម្មភាពបោះជំរំជាថ្មី ហើយនិងសុំឲ្យប៉ូលិសមានវត្តមាន យ៉ាងហោច រហូតដល់ថ្ងៃទី១៧ ឧសភា ដ្បិតសាលានឹងមានកម្មពិធីចែកសញ្ញាបត្រ នៅពាក់កណ្តាលខែនេះ។
នៅសហរដ្ឋអាមេរិក ប្រមាណជា ២សប្តាហ៍មកហើយ ដែលនិស្សិតអាមេរិកងើបបោះបោលបាតុកម្មសម្តែងមតិ ប្រឆាំងនឹងសង្គ្រាមអ៊ីស្រាអែលនៅតំបន់ហ្កាហ្សា ហើយនិងបង្ហាញការគាំទ្រចំពោះលពរដ្ឋប៉ាឡេស្ទីន។ សកម្មភាពនេះ នាំឲ្យគេរំឮកនឹកដល់ ចលនានិស្សិតប្រឆាំងនឹងសង្គ្រាមនៅវៀតណាម ក្នុងអំលុងទសវត្សរ៍១៩៦០-១៩៧០។
ដូចគ្នានេះដែរ នៅប្រទេសបារាំង សកម្មភាពបាតុកម្មប្រឆាំងអ៊ីស្រាអែលនិងគាំទ្រប៉ាឡេស្ទីន ផ្តួចផ្តើមពីក្រុមនិស្សិត ក៏មានច្រើនកន្លែងដែរ នៅរដ្ឋធានី និងតាមបណ្តាខេត្ត។ សកលវិទ្យាល័យបារាំង បណ្តាមហាវិទ្យាល័យធំៗ ដូចជា នៅ Sorbonne និងនៅវិទ្យាស្ថាននយោបាយ Sciences Po នៅក្រុងប៉ារីស និងសាលាខេត្តដទៃ ក្រុមនិស្សិតបាតុករគាំទ្រប៉ាឡេស្ទីន បានទាមទារឲ្យផ្តាច់កិច្ចសហការផ្លាស់ប្តូរនិស្សិតជាមួយអ៊ីស្រាអែល និងដាក់សម្ពាធរដ្ឋអំណាច ឲ្យបញ្ចប់សង្គ្រាមនៅហ្កាហ្សា។ នៅប្រទេសអង់គ្លេស សន្ទុះនិស្សិតបាតុករ ក៏ស្ទុះខ្លាំងណាស់ដែរ នៅទីក្រុងឡុងដ្រ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ